ޕީޖީއަށް ދިން ހަމަލާ އާ ގުޅިގެން އިތުރު މީހަކު ޝަރީއަތް ނިމެންދެން ބަންދުކޮށްފި

ޕްރޮސެކިޔުޓަރ ޖެނެރަލް ހުސައިން ޝަމީމަށް ހަމަލާދިން މައްސަލައާ ގުޅިގެން އިތުރު މީހަކު ޝަރީއަތް ނިމެންދެން ބަންދުކޮށްފައިވާކަމަށް ފުލުހުން ބުނެފިއެވެ.

ފުލުހުން ބުނީ އުމުރުން 22 އަހަރުގެ އެމީހާ ހައްޔަރުކޮށްފައިވަނީ ހުކުރު ދުވަހު ކަމަށެވެ. އަދި އެމީހާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ޝަރީޢަތް ނިމެންދެން އެމީހާ ބަންދުކުރުމަށް ކޯޓުން އަމުރުކޮށްފައިވާކަމަށް ފުލުހުން ބުނެއެވެ.

މިމައްސަލައިގައި މީގެ ކުރިން ވަނީ ދެ މީހަކު ހައްޔަރުކޮށްފައެވެ. މީހުންނަކީ ރ. އަލިފުށި ރިވެލި، އުމުރުން 23 އަހަރުގެ މިދުހަތު އާދަމް އާއި ލ ގަމު، ތުނޑި، ޖަވާހިރުވިލާ އުމުރުން 22 އަހަރުގެ މުހައްމަދު ޖަޒްލާނެވެ. މި ދެމީހުން ވެސް ވަނީ ޝަރީޢަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފައެވެ. މިމީހުން ބަންދުކުރުމަށް ނެރުނު ކޯޓު އަމުރުގައި ބުނެފައިވަނީ ތަހުގީގަށް ފާހަގަކުރެވިފައިވާ ގޮތުގައި ހަމަލާދީފައިވަނީ މަރުތޭލެއް ފަދަ އެއްޗަކުންނެވެ. އަދި ފުޓޭޖުތަކުން ފާހަގަކުރެވޭ ގޮތުގައި ހަމަލާ އަމާޒުކުރީ ޝަމީމުގެ ބޮލަށްކަމަށާއި ނަމަވެސް އެހަމަލާ އަރާފައިވަނީ ޝަމީމުގެ އަތުގެ މުލައްދަނޑިއަށެވެ.

ޕީޖީ ޝަމީމަށް ހަމަލާދީފައިވަނީ ޖެނުއަރީ މަހުގެ 31 ވަނަ ދުވަހު ހެނދުނުގެ ވަގުތެއްގައެވެ. ފުލުހުން ބުނީ މި ހަމަލާއަކީ ދުރާލާ ރޭވިގެން ދީފައިވާ ހަމަލާއެއް ކަމަށެވެ. އަދި އެ ހަމަލާގައި ހައްޔަރު ކުރި ދެމީހުންގެ އިތުރުން އެހެން މީހުންގެ ބައިވެރިވުން އޮތުމަކީ އެކަށީގެންވާ ކަމެއްކަަަމަށް ވެސް ވަނީ ބުނެފައެވެ. މި ހަމަލާގައި ޕީޖީގެ ވައަތުގައި ރެނދުލާފައިވާ ކަމަށް ޕީޖީ ވަނީ ވިދާޅުވެފައެވެ.