ކައުންސިލުތަކަށް 25 ފަޅުރަށް ދޫކުރަން ހުޅުވާލައިފި
17 ފެބުރުއަރީ 2024 | ހޮނިހިރު 13:15މީހުން ދިރިއުޅޭ ރަށްރަށާ 700 މީޓަރާ ހަމައަށް ހުންނަ ފަޅުރަށްރަށާއި ފަޅުތަކަކީ އެ ރަށްރަށުގެ އިޚްތިސާސްގެތެރޭގައި ހިމެނޭ ތަންތަން
ރާއްޖޭގެ ރަށްތައް
މަސްވެރިކަމާއި ދަނޑުވެރިކަމާއި އިގުތިސާދީ ބޭނުންތައް ފިޔަވައި އެ ނޫން ބޭނުންތަކަށް ފަޅުރަށްރަށް ދޫކުރުމާބެހޭ ގަވާއިދުގެ ދަށުން، 25 ރަށެއް ކައުންސިލުތަކަށް ދޫކުރުމަށް ހުޅުވާލައިފިއެވެ.
މި ގަވާއިދަކީ ދިރާސާ ކުރުމަށާއި އިޖުތިމާއީ ބޭނުންތަކަށް ފަޅު ރަށްތައް ކުއްޔަށް ދޫކުރެވޭގޮތަށް، "މަސްވެރިކަމާއި ދަނޑުވެރިކަމާއި އިގުތިސާދީ ބޭނުންތައް ފިޔަވައި އެ ނޫން ބޭނުންތަކަށް ފަޅުރަށްރަށް ދޫކުރުމާބެހޭ ގަވާއިދު"ގެ ނަމުގައި މިދިޔަ އަހަރު ގެޒެޓްކުރި ގަވާއިދެކެވެ.
މޯލްޑިވްސް ލޭންޑް އެންޑް ސަރވޭ އޮތޯރިޓީން ކޮށްފައިވާ އިއުލާނުގައި ދޫކުރަން ހުޅުވާލާފައިވާ ރަށްތަކަކީ:
ކައުންސިލްތަކުން އެދޭ، އެ އަތޮޅެއްގައި ހިމެނޭ ރަށްރަށާއި ފަޅުތަކުގެ ތެރެއިން، އާމްދަނީ ހޯދުމަށް އެ ކައުންސިލަކަށް ރަށެއް ނުވަތަ ފަޅެއް ވަކި އުސޫލުތަކެއްގެ ދަށުން ލިބޭނެގޮތެއް، ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ހަމަޖެއްސެވީ މިދިޔަ ޑިސެމްބަރު މަހުގެ ތެރޭގައެވެ. ގާނޫނު ބުނާގޮތުން، މީހުން ދިރިއުޅޭ ރަށްރަށާ 700 މީޓަރާ ހަމައަށް ހުންނަ ފަޅު ރަށްރަށާއި ފަޅުތައް އެއީ އެ ރަށްރަށުގެ އިޚްތިސާސް ތެރޭގައި ހިމެނޭ ތަންތަނެވެ. އަދި އޭގެ ބޭރުން ވެސް ބައެއް ރަށްރަށުގެ އިޚްތިސާސްގެ ތެރެއަށް ރަށްރަށް ހިމަނާފައިވެއެވެ.
މިދިޔަ އަހަރުގެ ޑިސެމްބަރު މަހުގެ 5 ވަނަ ދުވަހު ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވިދާޅުވެފައިވަނީ، ކައުންސިލްތައް އިތުރަށް ބާރުވެރި ކުރުވުމަށްޓަކައި، ކައިރީގައި ހުންނަ ފަޅުރަށްތަކާއި ފަޅުތައް ކައުންސިލްގެ ބެލުމުގެ ދަށަށް ގެނައުމުގެ ފުރުސަތު ހުޅުވާލަން ނިންމަވާފައި ވާކަމަށެވެ. އެގޮތަށް ނިންމަވާފައިވަނީ މައިގަނޑު ދެ ކަމެއް މަތިކުރުމަށްފަހުއެވެ. އެ ދެ ކަމަކީ؛ ސަރުކާރުގެ ގައުމީ ތަރައްގީގެ ޕްލޭނާ ދިމާވާ ނިންމުމަކަށް ވުމާއެކު، އެ ފަޅެއް ނުވަތަ އެރަށެއް ނިސްބަތްވާ އަތޮޅުގައި ހިމެނޭ، މީހުން ދިރިއުޅޭ އެހެން ހުރިހާ ރަށެއްގެ ރައްޔިތުންގެ ރުހުން އެކަމަށް އޮތުންކަމަށް ރައީސް ވިދާޅުވިއެވެ.
