ސްކޫލް ދަރިވަރުންގެ އަޚުލާގާއި ސުލޫކު ހެޔޮގޮތުގައި ބައްޓަން ކުރުމަށް ބާރުއެޅުމާއެކު، ކުށް މަދު މުޖުތަމައެއް ބިނާކުރުމަށް ސާނަވީ ތައުލީމު ހާސިލު ކުރަމުންދާ ދަރިވަރުންނަށް ކުރިއަށް ގެންދާ ''ކޭމްޕް ފުރާވަރު'' އިމާދުއްދިން ސްކޫލުގައި ފަށައިފިއެވެ.
ފުލުހުން ބުނީ ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިއަށްގެންދާ އެ ކޭމްޕުގައި، ދިރިއުޅުމުގެ ރިވެތި އަދަބުތައް ދަރިވަރުންނަށް ދަސްކޮށްދިނުމާއި، ރަނގަޅު ތަރުބިއްޔަތަށް މަގުދައްކައިދީ ހަރުދަނާ ބައެއްގެ ގޮތުގައި ދެމިތިބުމަށް ބާރުއަޅައިދޭ ގިނަ ހަރަކާތްތަކެއް ކުރިއަށްގެންދާނެ ކަމަށެވެ.
ފުލުހުން ބުނީ ދަރިވަރުންނާ ގުޅުންހުރި ގާނޫނުތަކާއި ގަވާއިދުތަކުގެ މައުލޫމާތު ހިއްސާކޮށް، އާންމު އިޖުތިމާއީ މިންގަނޑުތަކާ ޚިލާފަށް ކުރެވޭ ކަންކަމުން ދުރުހެލިކުރުވައި، އަދި ސްކޫލާއި މުޖުތަމައުގައި އުޅޭއިރު ދަރިވަރުންނަށް ކޮންމެހެން އެނގެންޖެހޭ ކަންކަން ދަސްކޮށްދިނުމަށް މައުލޫމާތު ދިނުމުގެ ސެޝަންތަކާއި އެހެނިހެން ހަރަކާތްތައް ކުރިއަށްގެންދާނެ ކަމަށެވެ.
ކްރައިމް ޕްރިވެންޝަން އެންޑް ޕަބްލިކް އެފެއަރޒާއި އިމާދުއްދީން ސްކޫލް ގުޅިގެން ކުރިއަށްގެންދާ ކޭމްޕް ފުރާވަރުގައި 50 އަންހެން ދަރިވަރުންނާއި 58 ފިރިހެން ދަރިވަރުން ހިމެނޭހެން 108 ދަރިވަރުން ބައިވެރިވެފައިވެއެވެ.
މިއީ ފުލުހުން ސިލްސިލާ ގޮތެއްގައި ސްކޫލްތަކުގައި ކުރިއަށްގެންދާ ކާމިޔާބު އެއް ޕްރޮގްރާމެވެ.
