އިންތިޚާބާބެހޭ ގާނޫނަށް ބައެއް އިސްލާހުތައް ގެނެސް، މަޖިލިސް އިންތިޚާބު ރޯދަ މަހުގެ ފަހުން ބޭއްވުމަށް ފާސްކޮށްފި

އިންތިޚާބުތަކާބެހޭ ގާނޫނަށް އިތުރު ބައެއް އިސްލާހުތައް ގެނައުމަށާއި، ރައްޔިތުންގެ މަޖިލިސް އިންތިޚާބު ރޯދަ މަސް ނިމޭތާ 10 ދުވަސް ފަހުން ބޭއްވުމަށް ކޮމިޓީން ފާސްކޮށްފިއެވެ.

އިންތިޚާބުތަކާބެހޭ ގާނޫނަށް އިސްލާހު ގެނައުމަށް ފާސްކުރީ، އެ މައްސަލައިގައި ދިރާސާ ކުރުމަށް އެކުލާވާލާފައިވާ ފަސް މެމްބަރުންގެ ކޮމިޓީން ބުދަ ދުވަހު ބޭއްވި ބައްދަލުވުމުގައެވެ.

ބިލަށް ގެނެސްފައިވާ އިތުރު އިސްލާހުތަކުގެ ތެރޭގައި؛ ވޯޓު ކަރުދާހުގައި ކެންޑިޑޭޓެއްގެ ނަމާ ދިމާގައި ރަނގަޅު ފާހަގައެއް ކަމަށް ބެލެވޭ ނިޝާނެއް ޖަހާފައިވާނަމަ އެއީ ސައްހަ ވޯޓެއް ކަމުގައި ބަލައިގަތުން ހިމެނެއެވެ. އަދި ފާހަގަ ފުރިހަމަކުރުމުގެ ގޮތުން، އެ ފާހަގަމަތިން ފަވާލެވޭ ގޮތަށް ރަނގަޅު ފާހަގައެއް ޖަހާފައި އޮތް ނަމަވެސް ވޯޓު ބާތިލު ނުވާގޮތަށް އިސްލާހު ގެނައުމަށް ކޮމިޓީން ވަނީ ފާސްކޮށްފައެވެ. މީގެ އިތުރުން، އިލެކްޝަންސް ކޮމިޝަނުން ގެންނަން ބޭނުންވާ ބައެއް ބަދަލުތައް ވެސް އެ ބިލުގައި ކޮމިޓީން ވަނީ ހިމަނާފައެވެ.

އޭގެ ތެރޭގައި؛ އިންތިޚާބެއް ބޭއްވުމުގެ 45 ދުވަސް ކުރިން ވޯޓަރސް ރެޖިސްޓްރީ ގެޒެޓުކޮށް، ކޮމިޝަނުގެ ވެބްސައިޓުގައި އާންމުކުރާ ގޮތަށް ގެނައި އިސްލާހާއި، ވޯޓު ކަރުދާސް ދެއްކުމަކީ ކުށެއް ކަމަށް ކަނޑައެޅުން ހިމެނެއެވެ. އަދި އެ ކުށަށް އަދަބެއް ކަނޑައެޅުމަށް ވެސް ހިމަނާފައިވެއެވެެ. އިލެކްޝަންސް ކޮމިޝަނުން ހުށަހެޅި އިސްލާހާ ގުޅިގެން ވަގުތީ ކޮމިޓީން ވަނީ، އިންތިޚާބެއްގައި ވޯޓު ކަރުދާސް ދައްކައިފިނަމަ އެއީ ކުށެއް ކަމަށް ކަނޑައަޅައި، އަދަބުގެ ގޮތުން 1 މަހާއި 3 މަހާ ދެމެދުގެ ޖަލު އަދަބެއް ކަނޑައެޅުން، ނުވަތަ 6000 ރުފިޔާއާއި 18000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމަށް ފާސްކޮށްފައެވެ.

އެ އިސްލާހުތައް ފާސްކުރީ ކޮމިޓީގެ އިއްތިފާގުންނެވެ.

އެ މައްސަލަ ބަލާ ކޮމިޓީގެ 5 މެމްބަރުންނަކީ

- ހެންވޭރު އުތުރު ދާއިރާގެ މެމްބަރު، އިބްރާހީމް މުއިއްޒު

- ފުވައްމުލަކު އުތުރު ދާއިރާގެ މެމްބަރު، މުހައްމަދު ރަޝީދު

- ކެންދޫ ދާއިރާގެ މެމްބަރު، އަލީ ހުސައިން

- މާފަންނު މެދު ދާއިރާގެ މެމްބަރު، އިބްރާހީމް ރަޝީދު

- ގައްދޫ ދާއިރާގެ މެމްބަރު، އަހުމަދު ޒާހިރު

އިންތިޚާބުތަކާބެހޭ އާއްމު ގާނޫނަށް އިސްލާހު ހުށަހަޅުއްވާފައިވަނީ އިހަވަންދޫ ދާއިރާގެ މެންބަރު މުހައްމަދު ޝިފާއުއެވެ. އެގޮތުން އިންތިޚާބުތަކާބެހޭ އާންމު ގާނޫނުގެ 43 ވަނަ މާއްދާ އިސްލާހުކުރަން ހުށަހަޅުއްވާފައިވެއެވެެ. 43 ވަނަ މާއްދާގެ (ހ)ގައި ބުނެފައިވަނީ، އިންތިޚާބުތަކުގައި އެ އިންތިޚާބެއްގައި ވޯޓު ނަގާ ގަޑިއާއި، އާންމު އުސޫލެއްގެ ގޮތުން ވޯޓު ނަގައި ނިންމާ ގަޑިއާއި، ވޯޓު ގުނަން ފަށާ ގަޑި ކަނޑައަޅައި އިއުލާންކުރާނީ އިލެކްޝަންސް ކޮމިޝަނުން ކަމަށެވެ.

މީގެ އިތުރުން މި މާއްދާގެ (ށ)ގައި ބުނެފަައިވަނީ، މި ގާނޫނުގައި ނުވަތަ އެހެން ގާނޫނެއްގައި އެހެން ގޮތަކަށް ބުނެފައި އޮތްނަމަވެސް، ރަމަޟާން މަހުގެ ދުވަހެއްގައި އިންތިޚާބެއް ބާއްވާއިގެން ނުވާނެ ކަމަށެވެ. އަދި އިންތިޚާބު ބާއްވަންޖެހޭ ތާރީޚު ރަމަޟާން މަހުގެ ދުވަހަކާ ދިމާވާނަމަ، އެ އިންތިޚާބެއް ބާއްވަންވާނީ ރަމަޟާން މަސް ނިމުމުގެ 10 ދުވަސް ފަހުން ކަމަށެވެ.

އެ ބިލަށް ވާހަކަދެއްކި ގިނަ މެމްބަރުން ވަނީ ރޯދަ މަހު އިންތިޚާބު ބޭއްވުމަށް ތާއީދު ނުކުރާކަން ފާހަގަކޮށްފައެވެ. އަދި އެއީ ވޯޓަރސް ޓަރންއައުޓް އިތުރަށް ދަށްވާނެކަމަށް މެމްބަރުން ވަނީ ބުނެފައެވެ. އަދި އިންތިޚާބުތަކާބެހޭ ގާނޫނަށް އަދިވެސް ގެންނަންޖެހޭ އިތުރު ބަދަލުތައް ހުރިކަމަށް އެ މެމްބަރުން ވަނީ ބުނެފައެވެ.

މިހާރު ގެންނަ އިސްލާހުގައި ބުނާގޮތުން، އިންތިޚާބާބެހޭ ގާނޫނުގެ 43 ވަނަ މާއްދާގެ (ނ)ގައި ބުނެފައިވަނީ މި ހާލަތުގައި، އެ އިންތިޚާބަކާގުޅޭ ޚާއްސަ ގާނޫނުގެ ދަށުން، ނުވަތަ މި ގާނޫނުގެ ދަށުން އެކި ކަންކަމަށް ކަނޑައަޅާފައިވާ މުއްދަތުތަކަށް އަމަލުކުރެވެން ނެތް ހާލަތެއް ކުރިމަތިވާނަމަ، މި މާއްދާގެ (ށ)ގައި ބުނެފައިވާ ގޮތަށް އިންތިޚާބު ބޭއްވުމަށްޓަކައި އެ މުއްދަތުތަކަށް ބަދަލުގެނެސް، އިލެކްޝަންސް ކޮމިޝަނުން އަލުން މުއްދަތުތައް ކަނޑައަޅަންވާނެ ކަމަށެވެ.

މިހާރު އިލެކްޝަންސް ކޮމިޝަނުން ނިންމާފައި ވަނީ ރޯދަ މަހުގެ 17 ވަނަ ދުވަހު މަޖިލިސް އިންތިޚާބު ބޭއްވުމަށެވެ. ނަމަވެސް އެއީ ކޮމިޝަނުން އެންމެ ބޭނުންވާ ގޮތް ނޫންކަމަށާއި، މިއީ މަޖުބޫރު ނިންމުމެއް ކަމަށް އެ ކޮމިޝަނުން ވަނީ ބުނެފައެވެ. އަދި މަޖިލިސް އިންތިޚާބަށް ލަފާދޭ ގައުމީ ކޮމިޓީގައި ހިމެނޭ އެއްވެސް ސިޔާސީ ޕާޓީއަކުން ވެސް، އަދި އިދާރާއަކުން ވެސް ރޯދަ މަހު އިންތިޚާބު ބާއްވަން ތާއީދެއް ނުކުރެއެވެ.