ނެމީބިއާގެ ރައީސް ހާގޭ ގެންގޮބް އަވަހާރަވުމާ ގުޅިގެން ރަސްމީ ގޮތުން ހިތާމަ ފާޅުކުރުމަށްޓަކައި ދެ ދުވަސް ވަންދެން ދިވެހި ދިދަ ބައިދަނޑިއަށް ތިރިކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމައިފިއެވެ.
މި ކަން އިއުލާންކުރައްވާފައި ވަނީ، ރައީސް އޮފީހުން ހޯމަ ދުވަހު ނެރުއްވި އިއުލާނެއްގައެވެ.
އެ އިއުލާނުގައި ބުނެފައިވަނީ، ނެމީބިއާގެ ރައީސް ހާގޭ ގެންގޮބް އަވަހާރަވުމާ ގުޅިގެން އެކަމުގެ ހިތާމައިގައި، 6 ފެބުރުވަރީ 2024 ވާ އަންގާރަ ދުވަހުން ފެށިގެން 7 ފެބުރުވަރީ 2024 ވާ ބުދަ ދުވަހުގެ ނިޔަލަށް، (ދެ ދުވަސް ވަންދެން) ދިވެހި ގައުމީ ދިދަ ބައިދަނޑިއަށް ތިރިކުރެއްވުމަށް ރައީސް މުއިއްޒު ނިންމަވާފައިވާ ކަމަށެވެ.
ގެއިންގޯބްގެ ރަސްމީ ފޭސްބުކް ޕޭޖުގައި އާންމުކޮށްފައިވާ ބަޔާނެއްގައި ބުނެފައިވަނީ، ރައީސް ހާގޭ ގެންގޮބް އަވަހާރަވީ އާދީއްތަ ދުވަހު، ވެރިރަށް ވިންޑްހޯކްގެ ލޭޑީ ޕޮހަމްބާ ހޮސްޕިޓަލުގައި ކަމަށެވެ.
ކެންސަރަށް ފަރުވާ ހޯއްދަވަމުން ގެންދެވި ރައީސް ހާގޭ ގެންގޮބް އަވަހާރަވިއިރު އުމުރުފުޅަކީ 82 އަހަރެވެ.
ބޮޑުވަޒީރުކަން ވެސް 12 އަހަރު ފުރުއްވި ރައީސް ހާގޭ ގެންގޮބްއަކީ 2014 ވަނަ އަހަރު ނެމީބިއާގެ ތިންވަނަ ރައީސަކަށް އިންތިޚާބުވުމުގެ ކުރިންވެސް ސިއްހީ މައްސަލަތަކެއް ކުރިމަތިވެވަޑައިގެންނެވި އޮތް ބޭފުޅެކެވެ.
