މަސްދޯންޏަކަށް އިންޑިއާ ސިފައިން އެރިކަމަށްވަންޏާ އެކަން ތަކުރާރުނުވާނެ ގޮތަކަށް ކުރެވެން ހުރިހާ މަސައްކަތެއް ކުރަންޖެހޭ: ރައީސް ޞާލިހު

ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުންދިޔަ މަސްދޯންޏަކަށް އިންޑިއާ ސިފައިން އެރިކަމަށްވަންޏާ އެކަން ތަކުރާރު ނުވާނެ ގޮތަކަށް ކުރެވެން ހުރިހާ މަސައްކަތެއް ކުރަންޖެހޭ ކަމަށް އެމްޑީޕީގެ ރައީސް އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

20 ވަނަ ރައްޔިތުންގެ މަޖިލީހަށް ކެންޑިޑޭޓުން ހޮވުމަށް އެމްޑީޕީ ކުރިއަށްގެންދާ މަޖިލީސް ޕްރައިމަރީގެ ވޯޓުލުން ބައްލަވާލެއްވުމަށްފަހު ނޫސްވެރިންނަށް މަައުލޫމާތު ދެއްވަމުން ރައީސް ޞާލިހު ވިދާޅުވީ ރާއްޖޭގެ އީއީޒެޑްގެ ތެރެއަށް ބޭރުގެ އެއްވެސް ގައުމަކަށް ހުއްދަ ނުނަގައި ވަދެވިގެން ނުވާނެ ކަމަށެވެ. މިއީ ބައިނަލްއަގުވާމީ ގާނޫނުތަކާއި ހިލާފު ކަމެއް ކަމަށް ރައީސް ޞާލިހު ވިދާޅުވިއެވެ.

ރައީސް ޞާލިހު ވިދާޅުވީ ރާއްޖޭގެ މަސްދޯންޏަކަށް އިންޑިއާގެ ސިފައިން އެރިކަމަށްވާނަމަ އެކަން ތަކުރާރު ނުވާނެ ގޮތަކަށް ކުރެވެން ހުރި ހުރިހާ މަސައްކަތެއް ކުރަންޖެހޭ ކަމަށެވެ.

މި މައްސަލައާ ގުޅިގެން އެމްއެންޑީއެފުން ބުނީ 31 ޖަނަވަރީ 2024 އަދި 1 ފެބްރުއަރީ 2024 ވަނަ ދުވަހުގެ ރޭ އިންޑިއާ ކޯސްޓްގާޑުގެ މަނަވަރަކުން ރާއްޖޭގެ ޚާއްސަ އިގުތިސާދީ ކަނޑުގެ ސަރަހައްދުގެ ތެރޭގައި، ރާއްޖޭގެ މަސްވެރިކަންކުރާ ދޯނިތަކަކަށް އަރާފައިވާތީ، މިކަމާ ގުޅިގެން ދިވެހި ސަރުކާރުން އަދި ދިވެހި ރާއްޖޭގެ ޤައުމީ ދިފާއީ ބާރުން ފިޔަވަޅުތަކެއް އަޅާފައިވާ ކަމަށެވެ.

ދިވެހިރާއްޖޭގެ ޚާއްސަ އިގްތިޞާދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްދޯނިތަކަކަށް އިންޑިޔާ އަސްކަރިއްޔާ އިން އަރާ ހިންގި އޮޕަރޭޝަނަކީ ދިވެހިރާއްޖޭގެ ކަމާގުޅޭ އެއްވެސް އިދާރާއަކާ ކޯޑިނޭޓް ކުރުމެއްނެތި އަދި ބައިނަލްއަގްވާމީ ކަނޑުގެ ގާނޫނުތަކާއި އުސޫލުތަކާއި ޚިލާފަށް ހިންގި އޮޕަރޭޝަނެއްކަމަށް ޑިފެންސް މިނިސްޓްރީން ވަނީ ބުނެފައެވެ. އަދި އޮޕަރޭޝަންގެ ތަފްސީލު ދިނުމަށް ވެސް މިނިސްޓްރީން ވަނީ އެދިފައެވެ.