މާލޭ މާރުކޭޓުތައް ހުރީ އެންމެ އެކަށީގެންވާ ފެންވަރުގައެއް ނޫން: ރައީސް
3 ފެބުރުއަރީ 2024 | ހޮނިހިރު 08:01ބިދޭސީން ގޮޅިތަކުގައި ވިޔަފާރިކުރާ މައްސަލަ އެއްކޮށް ޙައްލު ކުރެވިގެންދާނެކަމަށް ވިދާޅުވި
ރައީސުލްޖުމްހޫރިއްޔާ ޑރ މުޙައްމަދު މުއިއްޒު
މާލޭ ދަތުރުވެރިންގެ މާރުކޭޓާއި ލޯކަލް މާރުކޭޓަކީ އެންމެ އެކަށީގެންވާ ފެންވަރުގައި ހުރި ތަންތަނެއް ނޫންކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސް އެހެން ވިދާޅުވީ ހއ.ބާރަށު، މަދޮށިމާގޭ، ޢަބްދުﷲ އިބްރާހީމް މަނިކު، މާރުކޭޓުގެ ޙާލަތާ އަދި ބިދޭސީން ގޮޅިތަކުގައި ވިޔަފާރިކުރާތީ ހުރި ކަންބޮޑުވުންތަކާ ގުޅިގެން ކުރެއްވި ސުވާލަށް ދެއްވި ޖަވާބުގައެވެ.
މުއިއްޒު ވިދާޅުވީ، މާލޭ ދަތުރުވެރިންގެ މާރުކޭޓާއި ލޯކަލް މާރުކޭޓަކީ އެންމެ އެކަށީގެންވާ ފެންވަރުގައި ހުރި ތަންތަނެއް ނޫންކަމަށެވެ.
އެ ދެ މާރުކޭޓުގެ ބަދަލުގައި މިހާރު ލޯކަލް މާރުކޭޓު ހުރި ތަނުގައި އެންމެ ޒަމާނީ ފެންވަރުގައި އަދި ދުނިޔޭގެ އެންމެ ރަނގަޅު ފެންވަރުގެ ތަންތަނުގައި ހުންނަ ފަދަ މާރުކޭޓު އިމަރާތެއް އެޅުމަށް ސަރުކާރުން މިހާރުގެ ސިޓީ ކައުންސިލަށް ހުރިހާ މަގެއް ފަހިކޮށްދީފައިވާނެ ކަމަށެވެ.
އަދި އެތަނުގައި މަސް މާރުކޭޓާއި ލޯކަލް މާރުކޭޓު ހިންގޭ ގޮތަށް ހަތަރު ބުރީގެ ޒަމާނީ މާރުކޭޓެއް އެޅުމާއި، އެތަނުގެ ބޭސްމަންޓުގައި ޕާކިންގ އަށް ޖާގަ ދެވޭގޮތަށް މަސައްކަތް ވަރަށް އަވަހަށް ފެށިގެންދާނެކަމަށް މުއިއްޒު ވިދާޅުވިއެވެ. އެގޮތުން އޭޕްރީލް މަސް ތެރޭގައި އެ މަސައްކަތް ފެށިގެންދާނެކަަމަށް ރައީސް ވިދާޅުވިއެވެ.
ރައީސް ވިދާޅުވީ، އެ އިމާރަތް ޤާއިމު ކުރެވުމުން މިހާރު ހުރި މައްސަލަތަކަށް ޙައްލު އަންނާނެކަމަށެވެ.
ރައީސް ވިދާޅުވީ، އައު މާރުކޭޓު އެޅިގެންދާއިރު، ބިދޭސީން ގޮޅިތަކުގައި ވިޔަފާރިކުރާ މައްސަލަ އެއްކޮށް ޙައްލު ކުރެވިގެންދާނެކަމަށެވެ.
