މިހާރު ކުރިއަށްދާ އޭއެފްސީ އޭޝިއަން ކަޕްގެ ގަދަ 16 ވަނަ ބުރުގައި ޔުނައިޓެޑު އަރަބް އެމިރޭޓްސް (ޔޫއޭއީ) ބަލިކޮށް، ތަޖަކިސްތާނުން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

ޤަތަރުގެ އަޙުމަދު ބިން އަލީ ސްޓޭޑިއަމްގައި ކުޅުނު މެޗު ތަޖަކިސްތާނުން ކާމިޔާބު ކުރީ ޕެނަލްޓީ ޖަހައިގެންނެވެ. މެޗުގެ ފުރިހަމަ ވަގުތު ހަމަވީ ދެ ޓީމު 1-1 އިން އެއްވަރުވެގެންނެވެ. މެޗުގެ ފުރަތަމަ ހާފުގެ 30 ވަނަ މިނެޓުގައި ތަޖަކިސްތާނުން ވަނީ ލަނޑު ޖަހައި، ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ވަހްދަތު ހަނޫނޫ އެވެ. ޔޫއޭއީން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގަ އެވެ. މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި އެ ލަނޑު ޖެހީ، ޚަލީފާ އަލް ހަންމާދީ އެވެ. ދެ ޓީމު އެއްވަރުވެ، ކުޅުނު އިތުރު ވަގުތުގައި ދެ ހާފުގައި އެއްވެސް ޓީމަކަށް ލަނޑެެއް ނުޖެހެ އެވެ.

އެހެންވެ، ނަތީޖާ ނެރުމަށް ޖެހީ ޕެނަލްޓީ އެވެ. ޕެނަލްޓީގައި ތަޖަކިސްތާނުން ވަނީ ފަސް ޕެނަލްޓީ ވެސް ކާމިޔާބު ކޮށްފަ އެވެ. ޔޫއޭއީ އަށް ކާމިޔާބު ކުރެވުނީ ތިން ޕެނަލްޓީ އެވެ. އެ ޓީމުގެ އެއް ޕެނަލްޓީ ވަނީ ނާކާމިޔާބުވެފަ އެވެ. ޔޫއޭއީގެ މައްޗަށް ތަޖަކިސްތާނުން ކުރި ހޯދީ 5-3 އިންނެވެ.

ސެގަޓް އަކީ 2018 ވަނަ އަހަރުގެ ސާފް ޗެމްޕިއަންޝިޕް ރާއްޖެ އަށް ކާމިޔާބު ކޮށްދިން ކޯޗެވެ. އެކަމަކު ޑިސިޕްލިން އަށް ބާރު އަޅާ ކޯޗު ރާއްޖޭގައި ހުރިއިރު ދިމާވި އެންމެ ބޮޑު މައްސަލަ އަކީ އޭނާ އާއި ބައެއް ކުޅުންތެރިންނާ މައްސަލަ ޖެހުމެވެ. އަދި ދިވެހި ބައެއް ކޯޗުންނާ ވެސް ހިޔާލު ތަފާތު ވުމެވެ. ބޮޑު މައްސަލަ ގަނޑަކަށް ފަހު، ރާއްޖޭގެ ކޯޗުކަމުން ސެގަޓް ވަކިކުރީ 2019 ވަނަ އަހަރުގެ އޭޝިއަން ގޭމްސް އަށް ފަހު އެވެ. އޭގެ ފަހުން ތަޖަކިސްތާނާ އޭނާ ހަވާލުވީ 2022 ވަނަ އަހަރު އެވެ. އޭނާ ވަނީ ތަޖިކިސްތާނަށް 2022 ގެ ކިންގްސް ކަޕާއި މިދިޔަ އަހަރުގެ މާޑެކާ ކަޕް ވެސް ކާމިޔާބުކޮށްދީފަ އެވެ.

ސެގަޓަކީ ރާއްޖެ އައުމުގެ ކުރިން ޖޯޖިއާގެ ގައުމީ ޓީމާއި 21 އަހަރުން ދަށުގެ ކޯޗުކަން ކުރި މީހެކެވެ. އަދި އޭނާ ވަނީ ޖަރުމަނުގެ ޓީމުތަކަށް ކޯޗު ކޮށްދިނުމުގައި ގިނަ ދުވަސްތަކެއް ހޭދަކޮށްފަ އެވެ.