ފަހަތުން އަރައި، ވިޔަރެއާލުން ބާސެލޯނާ ބަލިކޮށްފި

ސްޕެނިޝް ލީގުގައި ބާސެލޯނާއާ ދެކޮޅަށް ކުޅުނު މެޗު، ފަހަތުން އަރައި ވިޔަރެއާލުން ކާމިޔާބުކޮށްފި އެވެ.

ހޮނިހިރު ދުވަހުގެ ރޭ ކުޅުނު މެޗު ވިޔަރެއާލް އިން ކާމިޔާބު ކުރީ 5-3 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ވިޔަރެއާލް އިންނެވެ. ނަމަވެސް، ބާސެލޯނާ އިން ވަނީ ފަހަތުން އަރައި ނަތީޖާ ހަމަހަމަކޮށް، ލީޑު ވެސް ނަގައިފަ އެވެ. އޭގެ ފަހުން މެޗުގެ އިތުރު ވަގުތުގައި ދެ ލަނޑު ޖަހައިގެން ވިޔަރެއާލުން ވަނީ މެޗު ކާމިޔާބުކޮށްފަ އެވެ.

މެޗުގެ ފުރަތަމަ ހާފުގެ 41 ވަނަ މިނެޓުގައި ވިޔަރެއާލަށް ލީޑު ނަގައިދިނީ ޖެރާޑް މޮރޭނޯ ޖެހި ލަނޑުންނެވެ. ދެ ވަނަ ހާފު ފަށައިގެން ނުވަ ވަނަ މިނެޓުގައި، ވިޔަރެއާލްގެ ދެ ވަނަ ލަނޑު ޖެހީ އިލްޔައިސް އަކޯމަކް އެވެ. އޭގެ ހަ މިނެޓު ފަހުން ބާސެލޯނާގެ ފުރަތަމަ ލަނޑު އިލްކާއީ ގުންޑޮގާން ޖެހީ، ޕޮލެންޑުގެ ފޯވާޑް ރޮބާޓް ލެވަންޑޯސްކީ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން 68 ވަނަ މިނެޓުގައި ބާސެލޯނާ އަށް ނަތީޖާ ހަމަހަމަ ކޮށްދިނީ ޕެޑްރީ އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ގުންޑޮގާން އެވެ. މެޗުގެ 71 ވަނަ މިނެޓުގައި ބާސެލޯނާ އަށް ލީޑު ލިބުނީ ވިޔަރެއާލްގެ އެރިކް ބާއީ އަތުން ބައި ކޮޅަށް ވަތް ލަނޑުންނެވެ.

ނަމަވެސް، މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ވިޔަރެއާލުން ވަނީ ދެ ލަނޑު ޖަހައިގެން މެޗު ކާމިޔާބުކޮށްފަ އެވެ. ނަތީޖާ ހަމަހަމަ ކުރި ލަނޑު ޖެހީ އަލެކްސަންޑަ ސޯލޯތު އެވެ. އޭގެ ފަހުން މެޗުން އެ ޓީމު މޮޅުކޮށްދިން ލަނޑު ޖެހީ ހޯސޭ ލުއިސް މޮރާލޭސް އެވެ.

މިއީ މި ސީޒަންގެ ލީގުގައި ބާސެލޯނާގެ ތިން ވަނަ ބައްޔެވެ. މިހާތަނަށް ލީގުގައި އެ ޓީމު 21 މެޗު ކުޅެފައިވާއިރު، އޭގެ ތެރެއިން މޮޅުވެފައި ވަނީ 13 މެޗުންނެވެ. ފަސް މެޗެއް ވަނީ އެއްވަރުވެފަ އެވެ. މިހާތަނަށް ލިބުނު 44 ޕޮއިންޓާއެކު ބާސެލޯނާ އޮތީ ތިން ވަނައިގަ އެވެ. އެންމެ ފަހުގެ ޗެމްޕިއަނުންގެ ޙައިސިއްޔަތުން ބާސެލޯނާ އަށް މި ސީޒަންގެ ލީގު ދިފާއު ކުރެވޭނެ ކަމުގެ ޔަގީންކަމެއް ނެތެވެ.