ލިވަޕޫލް ފައިނަލަށް ދިޔުމުން، ކްލޮޕްގެ ތައުރީފު ކުޅުންތެރިންނަށް

އިނގިރޭސި ލީގު ކަޕް (ކަރަބޯ ކަޕް) ގެ ފައިނަލުން ލިވަޕޫލަށް ޖާގަ ލިބުނީ ކުޅުންތެރިން ކުރި ބުރަ މަސައްކަތުން ކަމަށް ބުނެ، އެ ޓީމުގެ ކޯޗު ޔާގަން ކްލޮޕްް ކުޅުންތެރިންނަށް ތައުރީފު ކޮށްފި އެވެ.

ސެމީ ފައިނަލްގެ ފުރަތަމަ ލެގުގައި ލިވަޕޫލްގެ އެންފީލްޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. ފުލަމްގެ ދަނޑުގައި ކުޅުނު ދެ ވަނަ ލެގު 1-1 އިން އެއްވަރުވީއިރު، އެގްރިގޭޓުން ކުރި ހޯދީ ލިވަޕޫލް އެވެ.

އެ މެޗަށްފަހު ވާހަކަ ދައްކަމުން ކްލޮޕް ބުނީ، އަނެއްކާ ވެސް ލިވަޕޫލް ފައިނަލެއްގައި ކުޅުމަކީ ލިބޭ ވަރަށް ބޮޑު އުފަލެއް ކަމަށެވެ. ސެމީ ފައިނަލްގެ ދެ ވަނަ ލެގުގެ ކުރިން، އެއްވެސް ކަމެއް ޔަގީން ނުކުރުމަށް ކުޅުންތެރިންނަށް އިރުޝާދު ދީފައިވާނެ ކަމަށް ވެސް ކްލޮޕް ބުންޏެވެ. ކުޅުންތެރިންގެ ފަރާތުން ވެސް ފެނުނީ އެގޮތަށް ނުދެކި، ހިތްވަރާއެކު މަސައްކަތް ކުރި މަންޒަރު ކަމަށް ކްލޮޕް ބުންޏެވެ.

މީގެ އިތުރުން އޭނާ ބުނީ، ލިވަޕޫލްގައި ތިބި ކުޅުންތެރިންނަކީ ވަރަށް ގަދަޔަށް މަސައްކަތް ކުރާ، އާދަޔާ ޚިލާފު ކުޅުންތެރިންތަކެއް ކަމަށެވެ. އެ ކުޅުންތެރިން އަބަދު ވެސް ބޭނުންވަނީ މޮޅުވަން ކަމަށާއި، މަސައްކަތް ކުރަނީ ވެސް އެ ރޫޙުގައި ކަމަށް ކްލޮޕް ވަނީ ބުނެފަ އެވެ. އެހެންކަމުން، ދެން މަސައްކަތް ކުރާނީ ކުރިއަށް ހުރި އެހެނިހެން މެޗުތަކަށް ކަމަށާއި، އެއަށްފަހު ފައިނަލަށް ނިކުންނާނީ އެންމެ ވަރުގަދަ ޓީމުގެ ގޮތުގައި ކަމަށް ވެސް ކްލޮޕް ބުންޏެވެ. އޭނާ ފާާހަގަ ކުރި ގޮތުގައި މިވަގުތު ލިވަޕޫލް އޮތް ރަނގަޅު ފޯމު ދަމަހައްޓައިގެން ކުރިއަށް ދިޔުމަކީ ވަރަށް މުހިންމު ކަމެކެވެ.

އަންނަ މަހުގެ 25 ވަނަ ދުވަހު ކުޅޭ ލީގު ކަޕްގެ ފައިނަލްފައި ލިވަޕޫލް ނިކުންނާނީ ޗެލްސީއާ ދެކޮޅަށެވެ. އޭގެ ކުރިން އަންނަ މަހުގެ އެއް ވަނަ ދުވަހު، އިނގިރޭސި ޕްރިމިއާ ލީގުގައި ވެސް ޗެލްސީއާ ދެކޮޅަށް ލިވަޕޫލް ކުޅޭނެ އެވެ.