މޫސަގެ މަރު: ސައްމާހުއާއި ނާޒިޝް ވަޅިއެއް ގެންގުޅެގެން ކުރި ދައުވާ ސާބިތެއް ނުވި
މި މައްސަލައިގެ ގަޒިއްޔާތައް ބައްލަވަމުން ގެންދަވަނީ އެ ކޯޓުގެ ދެ ސެކްޝަނަކުން
ވ. ކެޔޮދޫ ދޭލިއާގޭ، މޫސާ އަހުމަދު މަރާލި މައްސަލައިގައި ދައުވާ އުފުލާފައިވާ މީހުން
ތޫނު އެއްޗަކުން ހަމަލާދީ ވ. ކެޔޮދޫ ދޭލިއާގޭ، މޫސާ އަހުމަދު މަރާލި މައްސަލައާ ގުޅުންހުރި ދައުވާތަކެއްގެ އަޑުއެހުން ކްރިމިނަލް ކޯޓުގައި ކުރިއަށް ގެންގޮސްފިއެވެ.
މިހާރު މި މައްސަލައިގެގަޒިއްޔާތައްބައްލަވަމުން ގެންދަވަނީ އެ ކޯޓުގެ ދެ ސެކްޝަނަކުންނެވެ.
އަންގާރަ ދުވަހު އޮތް މައްސަލައަކީ މަގްބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާ ކޮށްފައިވާ މައްސަލައެކެވެ. އެއީ ދައުވާލިބޭ މީހުން ވަޅިއެއް ގެންގުޅެފައިވާތީ އުފުލާފައިވާ ދައުވާއެކެވެ.
އެ ދައުވާ ކޮށްފައިވަނީ އިބްރާހީމް ސައްމާހު އަހުމަދު ފަތުހީއާއި، ސ. ހިތަދޫ ގުލްބަކާގޭ، މުހައްމަދު ނާޒިޝް ނާޒިމްގެ މައްޗަށެވެ.
ކްރިމިނަލް ކޯޓުގައި މި މައްސަލަ ކުރިއަށް ގެންދަވަނީ ގާޒީ އިބްރާހިމް އިޙްސާންއެވެ.
ކްރިމިނަލް ކޯޓުން ކުރި ޙުކުމުގައި ބުނެފައިވަނީ، އެ ދެމީހުންގެ މައްޗަށް ކުރާ މަޤްބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ކުށުގެ ދައުވާ ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުނުވާކަމަށެވެ.
މި މައްސަލައިގައި ސައްމާހު އަހުމަދު ފަތުހީގެ މައްޗަށް ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެއްވެސް އުފުލާފައިވެއެވެ.
އެ މައްސަލައިގައިވެސް އަންގާރަ ދުވަހު ޙުކުމް ކުރައްވާފައިވާއިރު، އެ ދައުވާވެސް ސާބިތުނުވާކަމަށް ވަނީ ޙުކުމް ކުރައްވާފައެވެ.
2017 ވަނަ އަހަރުގެ ސެޕްޓެމްބަރު މަހުގެ 24 ވަނަ ދުވަހު މާފަންނު އައިޓަމްސް ފިހާރަ ކައިރީގައި ތޫނު ހަތިޔާރު ބޭނުންކޮށްގެން ހިންގި ގޭންގު މާރާމާރީއެއްގައި، ވ.ކެޔޮދޫ ދޭލިޔާގޭ މޫސާ އަޙްމަދު މަރާލި މައްސަލައާއި ގުޅިގެން އިތުރު މީހުންގެ މައްޗަށްވެސް ދައުވާތަކެއް އުފުލައި ޝަރީއަތް ކުރިއަށްދެއެވެ. އެ މައްސަލަތައްވެސް އޮތީ ޙުކުމާއި ހިސާބުގައެވެ.
