ހުރިހާ މައްސަލަތަކެއްގެ ފެށުން ގުޅިފައި ވަނީ ބޯހިޔާވަހިކަމުގެ މައްސަލަތަކާއި ކަމަށާއި އެކަން ހައްލުކޮށްދިނުމަކީ ރައްޔިތުން އައްޔަންކޮށްފައި ތިބި އެންމެންގެ ޒިންމާ އެއް ކަމަށް އިންތިޚާބީ މޭޔަރ އާދަމް އާޒިމް ވިދާޅުވެއްޖެއެވެ.
ހޮނިިރު ދުވަހުގެ ރޭ ބޭއްވި ބިންވެރިންގެ ސައްލާގައި ވާހަކަދައްކަވަމުން އާޒިމް ވިދާޅުވީ މާލޭގެ މޭޔަރގެ ބައި އިލެކްޝަންގައި އާއްމުން ދިން މެސެޖަކީ އާއްމުން ބޭނުން ވަނީ ބްރިޖަކުން ދެވޭ ތަނަކަށް ދިއުމުގެ މެސެޖްކަމަށެވެ. އެތައް ޒަމާނެއްވަންދެން ދިމާވެފައިވާ ބޯހިޔާވަހިކަމުގެ މައްސަލަ އަށް މިދިޔަ ސަރުކާރުން ހައްލެއް ގެންނަން ފަށާފައިވާ ކަަމަށާއި އެ މަސައްކަތް ރަނގަޅަށް ކުރިއަށް ގެންދިއުމަށް ސަރުކާރަށް އާޒިމް ވަނީ ގޮވާލައްވާފައެވެ. އަދި ފުށިދިއްގަރުފަޅު ހިއްކުމުގެ ބަދަލުގައި އަވަހަށް އާއްމުންނަށް ދެވޭނެ ތަނެއްގައި އަސާސީ ޚިދުމަތްތައް ހަމަޖައްސާދެއްވުން އެދިވަޑައިގަންނަވާ ކަަމަށް ވެސް އާޒިމް ވިދާޅުވިއެވެ. އެގޮތުން އުތުރުތިލަފަޅު ފަދަ ކުރީ ސަރުކާރުން ހިއްކަން ފަށާފައިވާ ތަންތަން ނިންމުގެ މަސައްކަތް ސަރުކާރުން އަވަސްކޮށްދިނުމަށް ވެސް އޭނާ ވަނީ އެދިވަޑައިގައިގަންނަވާފައެވެ.
މާލޭގެ ރައްޔިތުންގެ ޒަރޫރީ ހުރިހާ ކަމެއް ޔަޤީންކޮށްދިނުމުގެ ޒިންމާ އަކީ މަލޭގެ މޭޔަރގެ ޒިންމާ އެއް ކަަމަށް އާޒިމް ވިދާޅުވިއެވެ. އަދި އޭނާ އަށް ވޯޓުދީ އައްޔަންކޮށްފައި ވަނީ އޭނާ ދެއްކި ވާހަކަތައް ބަލައިގަނެގެންކަމަށް ޤަބޫލުކުރައްވާ ކަމަށް ވިދާޅުވިއެވެ. މާލޭގައި ދިރިއުޅެމުންދާ މީހުންނާއި، މާލޭގެ ގެދޮރު ބޭނުންވާ މީހުންގެ ތެރެއިން ފުށިދިއްގަރުފަޅަށް ދާން ބޭނުންވާ މީހުން މޭޔަރ ބައި އިލެކްޝަންގައި އާޒިމް އަށް ވޯޓުދެއްވުމަށް އެދިވަޑައިގެންފައިވާނެ ކަމަށް ވެސް އާޒިމް ވަނީ ވިދާޅުވެފައެވެ. އެހެންކަމުން ރައްޔިތުން އާޒިމް މޭޔަރކަމަށް އައްޔަންކުރުމަކީ މާލޭގެ ރައްޔިތުން ބޭނުންވަނީ ބްރިޖަކުން ގުޅިފައި ހުރިތަނަކަށް ދާންކަން ސާފުކޮށްދޭ ކަމެއް ކަމަށް އޭނާ ވިދާޅުވިއެވެ.
އެ އަޑު ސަރުކާރުން އެހި ނަމަ ބިންވެރިންގެ ސައްލާ އަށް ދާނީ ހައުސިން މިނިސްޓަރކަމަށް ވެސް އާޒިމް ވަނީ ވިދާޅުވެފައެވެ. އަދި އެ ސައްލާ އަށް މިނިސްޓަރ ވަޑައިނުގަތުމުން ހިތާމަކުރައްވާ ކަމަށް ވެސް އާޒިމް ވަނީ ވިދާޅުވެފައެވެ. މާލޭގެ ގޯތީގެ މައްސަލައަކީ 40 އަހަރަށް ވުރެ ގިނަ އަހަރުވީ މައްސަލަ އަކަށް ވާއިރު ސަރުކާރުން އެކަމަށް ދޭ ސަމާލުކަން ކުޑަކަމަށް އާޒިމް ވަނީ ވިދާޅުވެފައެވެ.
ރައްޔިތުންނަށް ޚިދުމަތް ކުރުމަށް ކައުންސިލްތަކާއި، މަޖިލިސް އަދި ރައީސްކަމަށް މީހަކު ހޮވުމުގައި ރައްޔިތުންގެ ޒިންމާ އަދާކުރަމުންދާ ކަމަށާއި ބަދަލުގައި ރައްޔިތުންނަށް ދޭންޖެހޭ ޚިދުމަތްތައް ނުދެވޭ ކަމަށް ވެސް އާޒިމް ވިދާޅުވިއެވެ. ބޯހިޔާވަހިކަމަށް ހައްލު ހޯދާދިނުމަށް ގެންނަން ޖެހޭ ޤާނޫނީ ބަދަލުތައް ހުރިނަމަ، އެކަން ނުކުރެވި ވަނީ އިޚުލާސްތެރިކަމެއް ނެތުމުން ކަމަށް އާޒިމް ވަނީ ވިދާޅުވެފައެވެ.
