ފިއޮރެންޓީނާ އަތުން ނާޕޮލީ މޮޅުވީ 3-0އިން
ނާޕޮލީ އާއި ފިއޮރެންޓީނާ ކުޅުނު މެޗުގެ ތެރެއިން
އިޓާލިއަން ސުޕަރ ކަޕްގެ ފައިނަލަށް ނާޕޮލީ ދަތުރުކޮށްފި އެވެ.
ސައޫދީ އަރަބިއްޔާގައި ކުޅޭ ހަތަރު ޓީމުގެ މުބާރާތުގެ ފައިނަލަށް ނާޕޮލީ ދަތުރުކުރީ ސެމީ ފައިނަލުގައި ފިއޮރެންޓީނާ 3-0އިން ބަލިކޮށްގެންނެވެ. ފައިނަލުގައި ވާދަކުރާނީ ސެމީގެ ފަހު މެޗުގައި މިރޭ ލާޒިއޯ އާއި އެންމެ ފަހުގެ ޗެމްޕިއަން އިންޓަމިލާން ކުޅޭ މެޗުން މޮޅުވާ ޓީމެކެވެ.
މި މެޗުގައި ނާޕޮލީ އަށް ލަނޑު ޖަހައިދިނީ ޖިއޮވާނީ ސިމިއޯނީ އާއި ފަހު ދެ ލަނޑު ޖެހި އަލެސިއޯ ޒާބިން އެވެ.
މެޗަށް ފަހު ނާޕޮލީގެ ކޯޗު ވޯލްޓަ މަޒާރީ ވަނީ ފަހުހާފުގައި ކުޅެން ނެރުނު ޒާބިން އަށް ވަރަށް ބޮޑަށް ތައުރީފްކޮށްފަ އެވެ.
އޭނާ އަދި ޓީމުގެ ބެންޗުގައި ވެސް ތިބީ މޮޅު ކުޅުންތެރިން ކަމަށާއި އެންމެނަށް ކުޅުމުގެ ފުރުސަތު އެއްވަރަކަށް ނުދެވުނަސް ކޯޗެއްގެ ގޮތުން އޭނާ އުފާވަނީ އެކުވެރިކަމާއެކު ކުޅުންތެރިން މުބާރާތް ކާމިޔާބު ކުރުމަށް ތައްޔާރަށް ތިބުމުން ކަމަށެވެ.
ފިއޮރެންޓީނާގެ ކޯޗު ވިންސެންޒޯ ބުނީ އޭނާގެ ޓީމަށް ލިބުނު ފުރުސަތުތައް ބޭނުން ނުކުރެވުމަކީ މެޗުން ބަލިވާން ދިމާވި އެންމެ މުހިންމު ސަބަބު ކަމަށެވެ. ހާއްސަކޮށް ލިބުނު ޕެނަލްޓީ ނަގާލެވުމުން މެޗުގެ އޮއިވަރު ބަދަލުވެއްޖެކަމަށެވެ. އޭނާ ބުނީ ނާޕޮލީ އަކީ މޮޅު ޓީމެއް ކަމަށާއި އެމީހުން އަތުން މޮޅުވާން ލިބޭ ފުރުސަތުގެ ބޭނުން ނުހިފޭނަމަ އެއީ އިދިކޮޅު ޓީމަށް ދެވޭ އެޑްވާންޓޭޖެއް ކަމަށެވެ.
