އިސްމާއީލްގެ މަރުގެ މައްސަލައިގައި 5 ބިދޭސީއަކަށް ދައުވާ ކުރަން ފޮނުވައިފި
ދައުވާ ކޮށްދިނުމަށް ޕީޖީއަށް ފޮނުވީ އާދީއްތަ ދުވަހު
އިހަވަންދޫގައި މަރާލާފައި އޮތް އިސްމާއީލް އުމަރު
ޒަޚަމް ތަކަކާއެކު ހއ އިހަވަންދޫ އައިސް ޕްލާންޓް ތެރޭގައި މަރާލާފައި އޮއްވާ ފެނުނު އިސްމާއިލް އުމަރުގެ މަރުގެ މައްސަލައިގައި 5 ބިދޭސީއެއްގެ މައްޗަށް ދައުވާ ކޮށްދިނުމަށް ފުލުހުން ޕީޖީއަށް ފޮނުވައިފިއެވެ.
ފުލުހުންގެ މީޑިޔާއިން ބުނީ އިސްމާއީލް އުމަރުގެ މަރުގެ މައްސަލައިގެ ތަހުގީގް ނިމިފައިވާ ކަމަށާއި 5 ބިދޭސީއެއްގެ މައްޗަށް ދައުވާ ކޮށްދިނުމަށް އެދި އާދީއްތަ ދުވަހު ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށެވެ.
ޅ ހިންނަވަރު އުމުރުން 54 އަހަރުގެ އިސްމާއީލް އުމަރު މަރާލާފައި އޮއްވާ ފެނުނީ މިދިޔަ ޖޫން މަހުގެ 16 ވަނަ ދުވަހުއެވެ. އެމައްސަލައިގާ ފުލުހުން ވަނީ 6 ބިދޭސީން ހައްޔަރުކޮށް ތަހުގީގް ކުރިއަށް ގެންގޮސްފައެވެ.
އިއްސެ މަރާލި މައްސަލައިގައި ތުހުމަތުކުރެވޭ ފަރާތްތައް ހޯދުމުގެ މަސައްކަތް ފަށައި އެންމެ ފުރަތަމަ ހައްޔަރު ކޮށްފައި ވަނީ އިއްސެއާ އެކު އައިސް ޕްލާންޓްގައި މަސައްކަތްކުރި ބަންގްލަދޭޝްގެ ރައްޔިތެއް ކަމުގައިވާ ޝުމޮން މިއާ (27އ) އެވެ. އޭނާ ވަނީ އިއްސެ މަރާލި ކަމަށް ފުލުހުންގެ ތަހުގީގުގައި އިއުތިރާފު ވެފަ އެވެ. އަދި އިސްމާއީލް އުމަރަށް ހަމަލާ ދިނުމަށް ޝުމަން މިއާ ބޭނުންކުރި ވަޅި އާއި އިސްމާއީލް އުމަރަށް ހަމަލާދިން އިރު، ޝުމަން މިއާ ލައިގެން ހުރި އަންނައުނު ފުލުުހުން ވަނީ ހޯދާފައެވެ.
ފުލުހުން ބުނެފައި ވަނީ އިއްސެ މަރާލި މައްސަލަ ފުލުހަށް ހުށަހަޅާފައިވަނީ މިދިޔަ މަހުގެ 16 ވަނަ ދުވަހުގެ 16:23 ހާއިރު ކަމަށާއި އިހަވަންދޫ ޕޮލިސް ސްޓޭޝަނުން އައިސް ޕްލާންޓަށް ދިޔައިރު އެތަނުގެ ދޮރުގައި ލޭގެ އަސަރު ހުރި ކަމަށެވެ. ފުލުހުން އައިސް ޕްލާންޓާއި އައިސް ޕްލާންޓްގެ އޮފީސް އަދި އެކޮމޮޑޭޝަން ބްލޮކް އިތުރަށް ބަލައި ފާސްކުރިއިރު، ޒަހަމްތަކާއެކު އިސްމާއީލްގެ ހަށިގަނޑު އޮތީ، އައިސް ޕްލާންޓްގެ އައިސް ޕްރޯސެސިންގ ޔުނިޓެގް ތެރޭގައި ކަމަށެވެ.
އެމަރުގެ ހާދިސާއަށް ފަހު އިހަވަންދޫ ކައުންސިލުން ވަނީ އެރަށުގައި އުޅޭ ބިދޭސީންނާމެދު ޚާއްޞަ ގޮތަކަށް އަމަލުކުރާ އުސޫލުތަކެއް ކަނޑައަޅާ ތަންފީޒް ކުރަން ފަށާފައެވެ. ނަމަވެސް ފަހުން ވަނީ އެކަން އުވާލާފައެވެ.
