ޗައިނާއިން 130 މިލިއަން ޑޮލަރުގެ ހިލޭ އެހީ ހަމަޖެހިފައިވޭ: ރައީސް
ރައީސް ވިދާޅުވީ، އޭގެ ތެރެއިން ބޮޑު ބައެއް ޚަރަދުކުރައްވާނީ މާލޭގެ މަގުތައް ހެދުމަށް ކަމަށް
ރައީސް ޑރ. މުހައްމަދު މުއިއްޒު، ޗައިނާގެ ރައީސް ޝީ ޖިން ޕިންއާ ސަލާމް ކުރައްވަނީ
ޗައިނާއިން 130 މިލިއަން ޑޮލަރުގެ ހިލޭ އެހީ ހަމަޖެހިފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އެހެން ވިދާޅުވީ ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހު އެނބުރި ރާއްޖެ ވަޑައިގެން، ވެލާނާ އިންޓަނޭޝަނަލް އެއާޕޯޓުގައި ހުންނަވައި ދެއްކެވި ވާހަކަފުޅުގައެވެ.
ރައީސް ވިދާޅުވީ، މި ދަތުރުފުޅުގައި ހިލޭ އެހީގެގޮތުގައި ޗައިނާއާއެކު އެއްބަސްވުންތަކެއް ހެދިފައިވާކަމަށެވެ. އޭގެ ދަށުން ޗައިނާއިން ރާއްޖެއަށް 920 މިލިއަން ޗައިނީޒް ޔެން ދިނުމަށް ހަމަޖެހިފައިވާކަން ފާހަގަކުރައްވައި ރައީސް ވިދާޅުވީ، އެއީ ގާތްގަނޑަކަށް 130 މިލިއަން ޔޫއެސް ޑޮލަރުގެ އެހީކަމަށެވެ.
ރައީސް ވިދާޅުވީ، އޭގެ ތެރެއިން ބޮޑު ބައެއް ޚަރަދުކުރައްވާނީ މާލޭގެ މަގުތައް ހެދުމަށް ކަމަށެވެ.
އޭގެ އިތުރުންވެސް އިތުރު ކަންކަމަށް އެ ފައިސާ ބޭނުން ކުރައްވާނެކަމަށް ރައީސް ވިދާޅުވިއެވެ.
ރައީސް ޝީ ޖިންޕިންގެ ދައުވަތަކަށް، ރައީސުލްޖުމްހޫރިއްޔާ ޗައިނާއަށް ކުރެއްވި ފުރަމާނަ ދަތުރުފުޅުގައި، ދިވެހިރާއްޖެއާ ޗައިނާއާ ދެ ގައުމުގެ ސަރުކާރުގެ މެދުގައި ކުރިއަށްގެންދިޔަ ރަސްމީ ވާހަކަތައް ކުރިއަށްގެންދަވާފައި ވާއިރު، ބައެއް އެއްބަސްވުންތަކުގައި ސޮއިކޮށްފައިވެއެވެ.
އޭގެތެރޭގައި ދެ ގައުމުގެ ދެމެދުގައި ފަތުރުވެރިކަމާއި ވައިގެ ދަތުރުފަތުރުގެ ޚިދުމަތްތައް އިތުރަށް ފުޅާކުރެވޭނެ ގޮތްތަކާ ބެހޭގޮތުން ރަސްމީ މަޝްވަރާތައް ކުރެއްވިއެވެ.
