މުދަލު ޒަކާތް ވާޖިބުވާ ނިޞާބު ކުޑަވެއްޖެ
މުދަލުގެ ޒަކާތް ނެެރުން ވާޖިބުވާ ނިޞާބަކީ 7140 ރުފިޔާ
އިސްލާމީ މަރުކަޒުގައި ޒަކާތް ބަލައިގަތުން ކުރިއަށްދަނީ- ފައިލް ފޮޓޯ
މި އަހަރު މުދަލު ޒަކާތުގެ ގޮތުގައި ދައްކަންޖެހޭ ނިޞާބުގެ ދިވެހި ރުފިޔާގެ މިންވަރު ދަށްކުރުމަށްފަހު އިސްލާމިކް މިނިސްޓްރީން އެ އަދަދު އާއްމުކޮށްފިއެވެ.
1445 ވަނަ އަހަރުގެ މުދަލުގެ ޒަކާތުގެ ނިޞާބު ކަނޑައެޅުމާއި ގުޅޭގޮތުން އިސްލާމިކް މިނިސްޓްރީން ބުނީ 11 ޖަނަވަރީ 2024 އިން ފެށިގެން ރާއްޖޭގެ ފައިސާއިން މުދަލުގެ ޒަކާތް ނެެރުން ވާޖިބުވާ ނިޞާބަކީ 7140 ރުފިޔާ ކަމަށެވެ.
މިދިޔަ އަހަރުގެ އޮގަސްޓު މަހު ކަނޑައަޅާފައިވާ މުދަލު ޒަކާތުގެ ނިޞާބުގެ މިންވަރަކީ 7151.90 ލާރިއެވެ.
މުދަލު ޒަކާތަކީ އިސްލާމްދީނުގެ ރުކުނެކެވެ. އެގޮތުން އެ މީހެއްގެ މިލްކިއްޔާތުގައި ނިސާބުހަމަވާ މިންވަރަށް ފައިސާ ހުރެ، އެ ފައިސާ ހުންނަތާ ހިޖްރީ 01 އަހަރުވުމުން ޝަރްއީ ހަމަތަކާ އެއްގޮތަށް އޭގެ ސާޅީސްބައި ކުޅަ އެއްބައި 2.5 ނެރުމަށް މިނިސްޓްރީން ވަނީ ނަސޭހަތްތެރިވެފައެވެ.
އާންމު ގޮތެއްގައި މުދަލުގެ ނިޞާބަށް ބަދަލު އަންނަނީ ދުނިޔޭގެ ބާޒާރުގައި ރަނާ ރިހީގެ އަގަށް އަންނަ ބަދަލުންނެވެ. ރާއްޖޭގައި ޒަކާތުގެ ނިޞާބުގެ މިންވަރު ކަނޑައަޅަނީ ރިހީގެ އަގަށް ބަލައިގެންނެވެ. ރިހީގެ އަގަށް އަންނަ ބަދަލަކާ ގުޅިގެން ޒަކާތުގެ ގޮތުގައި ދައްކަން ޖެހޭ ދިވެހި ފައިސާގެ މިންވަރު ވެސް ބަދަލުވެގެންދެއެވެ.
ރަނާއި ރިހި ބާޒާރުގައި ލިބެން ހުންނަ އަގު ހާމަކުރަނީ ރާއްޖޭގެ ސެންޓްރަލް ބޭންކް އެމްއެމްއޭ އިންނެވެ. އިލްމުވެރިން ވިދާޅުވާ ގޮތުގައި ރާއްޖެ ފަދަ ގައުމުތަކުގައި ޒަކާތުގެ ނިޞާބު ކަނޑައެޅުމުގައި ފަގީރުންނަށް އެންމެ ރަނގަޅު ގޮތަކީ ރިހީގެ އަގަށް ބިނާކޮށް ޒަކާތުގެ ނިޞާބު ކަނޑައެޅުމެވެ.
ނިޞާބު ހަމަވާ ވަރަށް އަތުގައި ފައިސާހުރެ އަހަރެއް ހަމަވެއްޖެނަމަ، އޭގެ ސާޅީސްބައިކުޅަ އެއްބައި މުދަލު ޒަކާތުގެ ގޮތުގައި ދެއްކުމަކީ ދީނީ ގޮތުން ވާޖިބެކެވެ.
