މި ސަރުކާރުން މިވީ ކުޑަ ދުވަސްކޮޅުގެ ތެރޭގައި ރައްޔިތުން މާޔޫސްކޮށްލައިފި - ރައީސް ޞާލިހު

މިވީ ކުޑަ ދުވަސްކޮޅުގެ ތެރޭގައި، މި ސަރުކާރުން ރައްޔިތުން މާޔޫސް ކޮށްލައިފި ކަމަށް ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

'ފެހި. ތަނަވަން. މާލެ' ކެމްޕޭން ނިމުމުގެ ރަސްމިއްޔާތުގައި ވާހަކަފުޅު ދައްކަވަމުން، ރައީސް ޞާލިހް ވިދާޅުވީ ދާދިފަހުން ރާއްޖޭގައި ރިޔާސީ އިންތިހާބެއް ނިމިގެން ހިންގައްޖެ ކަމަށެވެ. ރައްޔިތުން އައު ސަރުކާރެއް އިންތިހާބުކޮށްފައިވާ ކަމަށާއި، އަދި އެ ހެދި ދޮގުތަކާއި، ކުރި ކަންތައްތަކާއެކުގައި ނަމަވެސް ވެރިކަމަށް ބަޔަކު އަތުވެއްޖެ ކަމަށެވެ. ރައީސް ސާލިޙު ވިދާޅުވީ ރައްޔިތުންގެ އުއްމީދުތަކާއި ބޭނުންތަކެއް އޮތް ކަމަަށާއި، ރައްޔިތުން އުއްމީދުކުރީ ކުރިއަށްވުރެ ރަނގަޅަށް ރައްޔިތުންނަށް ހިދުމަތްތަކެއް މި ސަރުކާރުން ކޮށްދެއްވާނެ ކަމަށެވެ.

Advertisement

އެހެންނަމަވެސް މިވީ ކުޑަ ދުވަސްކޮޅުގެ ތެރޭގައި ރައްޔިތުން މާޔޫސް ކޮށްލައިފި ކަމަށާއި، ރައްޔިތުންގެ އުއްމީދު ގެއްލިއްޖެ ކަމަށް ރައީސް ޞާލިހު ވިދާޅުވިއެވެ. ދޮގުމައްޗަށް ދޮގު ހަދާތަން ފެންނަމުންދާ ކަމަށާއި، މި ދޮގުތައް ހަދަމުން ދަނީ މާލެ އަދި މުޅި ރާއްޖޭގެ ރައްޔިތުންނަށް ކަމަށެވެ. އަދި ރާއްޖޭގެ ރައްޔިތުން މިއަދު ތިބީ ކުރެވުނު ކަންތަކާއި ދޭތެރޭގައި ކަންބޮޑުވެފައި ކަމަށެވެ.

އެމްޑީޕީ މިއަދު އޮތީ އިދިކޮޅު ޕާޓިގެ ގޮތުގައި ކަމަށާއި، ސަރުކާރު ޖަވާބުދާރީ ކުރުމުގެ މަސައްކަތް އެމްޑީޕީން ކުރާނެ ކަމަށް ރައީސް ޞާލިހު ވިދާޅުވިއެވެ.

ރައީސް ޞާލިހު ވިދާޅުވީ ނިމިގެންދިޔަ އެމްޑީޕީ ސަރުކާރުގައި މާލޭގެ ރައްޔިތުންނަށް ދިމާވެފައިވާ އެންމެ ބޮޑު ދަތި އުނދަގުލަށް ހައްލެއް ހޯދުމަށް މަސައްކަތްތަކެއް ކުރެވުނު ކަމަށެވެ. ކޮވިޑްގެ ބޮޑު އާލަމީ ވަބާއާއި ދަތި އުނދަގުލަށް ފަހުގައި މާލެއަށް ރަނގަޅު ހައްލެއް ހޯދައި ދިނުމަށް މަސައްކަތްތަކެއް ކުރެވުނު ކަމަށެވެ.

ރައީސް ޞާލިހު ވިދާޅުވީ އެތައް ޒަމާނަކަށްފަހު މާލޭގެ ރައްޔިތުންނަށް ގޯތި ކަނޑާ ދެވިއްޖެ ކަމަށާއި، ފުލެޓް އަޅާ ފުލެޓް ހަވާލުކުރެވިއްޖެ ކަމަށެވެ. ނަމަވެސް މިހާތަނަށް އައި އިރުގައި އެ ހައްގުވާ ފަރާތްތަކަށް އެ ނުދީ ސަރުކާރުން ހިފަހައްޓާފައިވާ ކަމަށެވެ. އަދި މިކަމަށް ހައްލެއް ހޯދުމަށްޓަކައި ދެން ކުރެވެން އޮތް ކަމަކީ މާލެ ސިޓީ މޭޔަރުކަމަށް އެމްޑީޕީގެ މީހަކު ގެނައުން ކަމަށެވެ.

ރައީސް ޞާލިހު ވިދާޅުވީ އެމްޑީޕީ މިއޮތީ މާލޭގެ ރައްޔިތުންނަށް އެމްޑީޕީގެ ސަރުކާރުން ހޯދައިދިން، ގޯއްޗާއި ފުލެޓްތައް ހޯދައި ދިނުމަށް ކުރެވެން އޮތް ހުރިހާކަމެއް ކުރުމަށް ތައްޔާރަށް ކަމަށެވެ.

ރައީސް ޞާލިހު ވިދާޅުވީ ހިތާމައަކީ މިއަދު މިހާހިސާބަށް އައި އިރުގައި މި ސަރުކާރުން, އެމްޑީޕީގެ ސަރުކާރުން ކުރަން ފެށި އެތައް މަސައްކަތެއް ހުއްޓާލާފައިވާ ކަމެވެ. މިއީ ހަމައެކަނި މާލެ ވަށައިގެން ހިއްކައިގެން ހައްލު ލިބޭނެ ކަމެއް ނޫން ކަމަށާއި، މުޅި މައްސަލައަށް ހައްލު ލިބޭނީ މުޅި ރާއްޖެ ތަރައްގީކޮށްގެން ކަމަށެވެ.