އެކަކަށްވުރެ ގިނަ މީހުންނަށް ސިޔާސީ ޕާޓީ އުފެއްދުމަށް އެދި ހުށަހެޅޭގޮތަށް ސިޔާސީ ޕާޓީގެ ޤަވާއިދު އިސްލާޙުކޮށްފިއެވެ.

އާދިއްތަ ދުވަހު އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ނައިބްރައީސް އިސްމާއީލް ޙަބީބް ވިދާޅުވީ، އެ އިސްލާޙަކީ ގިނަ ބައެއްގެ ކަންބޮޑުވުމާއެކު، ކޮމިޝަނުން މަޝްވަރާކޮށްގެން ގެނެސްފައިވާ އިސްލާޙެއްކަމަށެވެ.

ސިޔާސީ ޕާޓީގެ ގަވާއިދަށް 8 ވަނަ އިޞްލާޙު ގެނައުމުގެ ގަވާއިދުގައި ބުނެފައިވަނީ، ސިޔާސީ ޕާޓީ އުފެއްދުމުގެ ހުއްދައަށް އެދި އެކަކަށްވުރެ ގިނަ ފަރާތްތަކަށް ހުށަހެޅިދާނެ ކަމަށެވެ. އެގޮތުން ހުށަހަޅާ ފޯމާއެކު މިކަމަށް އެދޭ ފަރާތުގެ ނުވަތަ ފަރާތްތަކުގެ ދިވެހި ރައްޔިތެއްކަން އަންގައިދޭ މުއްދަތު ހަމަނުވާ ކާޑުގެ ދެފުށުގެ ސާފު ކޮޕީއަކާއި ކުށުގެ ރިކޯޑު ފޯމު ހުށަހަޅަންޖެހޭނެކަމަށް ވަނީ ބަޔާންކޮށްފައެވެ.

އަދި ސިޔާސީ ޕާޓީއެއް އުފައްދަން އެދޭ ފަރާތަކުން ނުވަތަ ފަރާތްތަކުން ފޯމާއެކު ހުށަހަޅަންޖެހޭ ތަކެތި ކޮމިޝަނަށް ހުށަހެޅުމުން ސިޔާސީ ޕާޓީއެއް އުފެއްދުމުގެ ހުއްދަ 7 ދުވަހުގެ ތެރޭގައި އެ ފަރާތަކަށް ނުވަތަ އެ ފަރާތްތަކަށް ލިޔުމުން ދޭންޖެހޭނެކަމަށްވެސް ޤަވާއިދުގައި ބުނެއެވެ.

ސިޔާސީ ޕާޓީ އުފެއްދުމަށް ހުއްދަ ދޭ ދުވަހުން ފެށިގެން 3 މަސްދުވަހުގެ ތެރޭގައ،ި މަދުވެގެން 3,000 މީހުން މި ގަވާއިދުގައިވާ ފޯމު ފުރިހަމަކުރުމަށްފަހު ކޮމިޝަނަށް ހުށަހަޅަން ޖެހެއެވެ.

ޤަވާއިދަށް ގެނައި އިސްލާޙުގައި ސިޔާސީ ޕާޓީތަކަށް މެންބަރުންގެ ގޮތުގައި ދަފުތަރުކުރުމަށް ސިޔާސީ ޕާޓީތަކުން ނުވަތަ ސިޔާސީ ޕާޓީއެއް އުފެއްދުމުގެ ހުއްދަ ދީފައިވާ ފަރާތަކުން "ސިމެދަ ޕޯޓަލް" މެދުވެރިކޮށް ހުށަހަޅާ ފޯމުތަކަށް ޝަކުވާ ހުށަހެޅުމާބެހޭ އުސޫލުވެސް ވަނީ ހިމަނާފައެވެ. އެއީ "ސިމެދަ ޕޯޓަލް" މެދުވެރިކޮށް ހުށަހަޅާ ފޯމު ޕްރޮސެސް ކުރުމުގެ ކުރިން އެ ފޯމަކީ ޞައްޙަ ފޯމެއް ކަން ކަށަވަރު ކުރުމަށް ޓަކައ،ި ފޯމާ ގުޅޭގޮތުން އެއްވެސް ޝަކުވާއެއް އޮތްނަމަ އެ ޝަކުވާ ހުށަހެޅުމާއި އެ ޝަކުވާއާ ގުޅިގެން އިލެކްޝަންސް ކޮމިޝަނުން ޢަމަލުކުރާނެ ގޮތް ބަޔާންކޮށް އެކުލަވައިލައިފައިވާ އުސޫލެވެ.

މި އިސްލާޙުތަކާއެކު އާދިއްތަ ދުވަހުން ފެށިގެން މިވަނީ މި ޤަވާއިދަށް އަމަލުކުރަން ފަށާފައެވެ.