އީރާނުގައި ދިން ނިރުބަވެރި ޙަމަލާއެއްގައި 100 އަށްވުރެ ގިނަ މީހުން މަަރައިލައިފި

އީރާނުގެ އިރުދެކުނުގައިވާ އަވަށެއް ކަމަށްވާ ކަރްމާންގައި ދެ ބޮން ގޮއްވައިލައިގެން ދިން ނިރުބަވެރި ޙަމަލައެއްގައި ޢާންމުންގެ 103 މީހުން މަރާލައިފިއެވެ.

އަލްޖަޒީރާއިން ރިޕޯޓްކޮށްފައިވާ ގޮތުގައި ޙަމަލާތައް އަމާޒު ކޮށްފައި ވަނީ އަވަހާރަ ކޮށްލާފައިވާ އީރާނުގެ އިސްލާމީ އިންޤިލާބީ ލަޝްކަރުގެ ކުރީގެ އިސްވެރިޔާ ޤާސިމް ސުލައިމާނީގެ މަޤުބަރާ ކައިރީގައެވެ. ބޮންތައް ގޮއްވައިލާފައި ވަނީ ސުލައިމާނީ އަވަހާރަ ކޮށްލެވުނުތާ ހަތަރު އަހަރު ފުރުން ފާހަގަ ކުރުމަށް އޭނާއަށް އިޙުތިރާމު އަދާ ކުރުމުގެ ގޮތުން ގިނަ ޢަދަދެއްގެ ބަޔަކު މަޤުބަރާ ކައިރިއަށް ޖަމާވެފައިވާ ވަޤުތެއްގައެވެ.

ސުލައިމާނީ އަވަހާރަ ކޮށްލާފައިވަނީ އޭނާ އަވަށްޓެރި އިރާޤުގައި ހުންނަވަނިކޮށް 2020 ވަނަ އަހަރު އެމެރިކާއިން ޢިރާޤުގައި ދިން ޑްރޯން ޙަމަލައެއްގައެވެ. ބުދަދުވަހު އޭނާގެ މަޤުބަރާ ކައިރީގައި ބޮންތަކެއް ގޮއްވައިލައިގެން ދިން ޙަމަލާގައި އިތުރު 170 މީހުން ޒަޚަމުވެފައިވެއެވެ.

އީރާނުގެ މީޑިޔާތަކުން އާންމު ކޮށްފައިވާ ވީޑިޔޯތަކުން ފެންނަނީ ޙަމަލާގައި ޒަޚަމުވި މީހުންނަށް ފަރުވާ ދިނުމަށް ރެޑް ކްރެސެންޓުގެ ޞިއްޙީ ޚިދުމަތްތެރިން މަސައްކަތް ކުރަމުންދާ މަންޒަރެވެ. މި ޙަމަލާތަކުގައި ޒަޚަމްވި މީހުންގެ ޢަދަދު އިތުރުވާނެ ކަމަށް ބެލެވެއެވެ. މި ޙަމަލާތަކުގެ ޒިންމާ އަދި އެއްވެސް ފަރާތަކުން އުފުލާފައިވާ ނުވާއިރު، ހަމަލާތަކުގެ ފަހަތުގައި ތިބީ ކޮން ބަޔެއް ކަން އަދި ސާފެއް ނުވެއެވެ.

ސުލައިމާނީއަކީ، އީރާނުގެ އިސްލާމީ އިންޤިލާބީ ލަޝްކަރުގެ އެންމެ ބާރުގަދަ ގޮފި ކަމުގައިވާ ޤުދްޞް ފޯސްގެ އެންމެ އިސްވެރިޔާއެވެ. އޭނާ ޝަހީދު ކޮށްލުމަށް ޢަމުރު ކޮށްފައި ވަނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕެވެ. 62 އަހަރުގެ ސުލައިމާނީ ޝަހީދު ކޮށްލާފައި ވަނީ 2020 ވަނަ އަހަރުގެ ޖަނަވަރީ މަހުގެ 3 ވަނަ ދުވަހެވެ. އޭނާ ޝަހީދުކޮށްލާފައި ވަނީ އެމެރިކާގެ އަސްކަރިއްޔާއިން ދިން ޑްރޯން ހަމަލާއެއްގައެވެ.

ޖެނެރަލް ސުލައިމާނީ އަކީ އީރާންގައި ސުޕްރީމް ލީޑަރ އާޔަތުﷲ އަލީ ޚާމަނާއީ އާޖެހިގެން އެންމެ ބާރުގަދަ ފަރާތެވެ. ސުލައިމާނީއަކީ އީރާނުގެ ޢާންމުންގެ މެދުގައި ވަރަށް މަޤުބޫލު ބޭފުޅެކެވެ. އީރާނުން މެދުއިރުމަތީގެ ޤައުމުތަކުގައި ހިންގާ އަސްކަރީ އަދި ޖާސޫސީ ޙަރާކާތުގައި އެންމެ އިސްކޮށް ހަރަކާތްތެރިވެފައި ވަނީ އޭނާއެވެ. އަދި، އޭނާއަކީ 1980ން 1988 ވަނަ އަހަރާ ދެމެދު ކުރި އީރާން-ޢިރާޤު ހަނގުރާމައިގެ ބަޠަލެއްގެ ގޮތުގައި އީރާނުގެ ރައްޔިތުން ޤަބޫލު ކުރާ ބޭފުޅެކެވެ.

އެމެރިކާގެ އަސްކަރިއްޔާއިން ސުލައިމާނީ ޝަހީދު ކޮށްލާފައި ވަނީ އިރާޤުގެ ވެރިރަށް ބަޣްދާދުގެ ވައިގެ ބަނދަރަށް ދިން ޑްރޯން ޙަމަަލައެއްގައެވެ. މި ޙަމަލާގައި ޢިރާޤުގެ އަސްކަރިއްޔާގެ އިސްވެރިއެއް ކަމުގައިވާ ލެފްޓިނެންޓް އަބޫ މަޙުދީ އަލް-މުހަންދިސް ވެސް ޝަހީދުވިއެވެ.

އިރާނުގެ އޮފިޝަލުން ބުނީ މިހަމަލާގައި ޒިންމާވާ ބަޔަކު ހޯދާ އިންސާފުގެ ކުރިމައްޗަށް ގެނެސް ހައްޤު އަދަބު ދޭނެކަމަށެވެ.

ސުލޭމާނީގެ މަގްބަރާ ކައިރިޔަށް ބުދަދުވަހު ބާރުގަދަ ހަމަލާއެއްދީފައިމިވަނީ ލުބްނާންގައި ހުންނަވަނިކޮން ހަމާސްގެ ޑެޕިއުޓީ ލީޑަރެއްކަމަށްވާ ޞާލިޙް އަލް އަރޯރީ އަންގާރަދުވަހުގެރޭ އަވަހާރަ ކޮށްލުމާއި އުޅިގެން އެސަރަހައްދުގައި ނުތަނަވަސްކަން އިތުރު ވެފައިވާ ދަނޑިވަޅެއްގައެވެ.