އައިލެންޑް އޭވިއޭޝަންގެ ނިޒާމަށް ބަދަލުތަކެއް ގެންނާނެ
މަޑިވަރު އެއާޕޯޓުގައި މޯލްޑިވިއަންގެ ފްލައިޓެއް ޖައްސާފައި
ރާއްޖޭގެ އެތެރޭގެ އުދުހުންތަކުގެ އަގަށް ހެޔޮ ބަދަލެއް ގެނައުމަށްޓަކައި އައިލެންޑް އޭވިއޭޝަނުގެ ނިޒާމަށް ބަދަލުތަކެއް ގެނައުމުގެ މަސައްކަތް ފަށާފައިވާކަމަށް، ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެއެވެ.
ބުދަ ދުވަހު ޓްރާންސްޕޯޓު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ ރާއްޖޭގެ އެތެރޭގެ އުދުހުންތަކުގެ އަގުތައް ވަރަށް ބޮޑުކަން ގަބޫލުކުރައްވާ ކަމަށެވެ. އެގޮތުން އައިލެންޑް އޭވިއޭޝަންގެ ނިޒާމަށް ބަދަލުތަކެއް ގެނައުމުގެ މަސައްކަތް ކުރަމުންދާކަމަށް މިނިސްޓަރު ވިދާޅުވިއެވެ.
ފާހަގަކުރެވުނު ބައެއް ކަންކަމަށް އިޝާރާތްކުރައްވައި މިނިސްޓަރު ވިދާޅުވީ، އައިލެންޑް އޭވިއޭޝަނަކީ 2018އާ ހަމައަށް ފައިދާވަމުން އައި ކުންފުންޏެއް ކަމަށާއި، ދައުލަތުގެ ޓެކްސްޕޭ މަނީ ބޭނުންކުރަން ނުޖެހޭ ކުންފުންޏެއް ކަމަށެވެ. ނަމަވެސް 2018އިން 2023ށް ވިޔަފާރި ވަރަށް ބޮޑަށް ދަށްވެފައިވާކަމަށް މިނިސްޓަރު ވިދާޅުވިއެވެ.
އައިލެންޑް އޭވިއޭޝަން ރީސްޓްރަކްޗަރކޮށް، އައިލެންޑް އޭވިއޭޝަންގެ މިހާރުގެ އޮޕަރޭޝަންތައް ބަދަލުތަކެއް ގެނައުމުގެ މަސައްކަތް ކުރިއަށްދާކަން ފާހަގަކުރައްވައި މިނިސްޓަރު ވިދާޅުވީ، ވައިޑް ބޮޑީ އޮޕަރޭޝަންތައް ފެށި، ބައިނަލްއަގުވާމީ ފުރުސަތުތައް ހޯދައި، އިކޮނޮމިކް ކޮންޓްރިބިއުޝަންގެ އެހީގައި އެތެރޭގެ އުދުހުންތަކުގެ އަގުތަކަށް ބަދަލު އަންނާނެކަމަށެވެ. އަދި ވިދާޅުވީ ކުންފުންޏާ މަޝްވަރާކޮށްގެން ގެނެވެން ހުރި ބަދަލުތައް ވަރަށް އަވަހަށް ގެންނާނެކަމަށެވެ.
