އިންޑިއާ ސިފައިންނާ ގުޅޭގޮތުން ސަރުކާރުން ބުނީ އަނެއްކާވެސް އައު އަދަދެއް، މިހާރު 88!
އެންމެ ފަހުން ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ސަރުކާރުން ބުނެފައިވަނީ މިހާރު ރާއްޖޭގައި ތިބީ 89 ސިފައިންކަމަށް
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރާއްޖޭގައި މިހާރު ތިބީ އިންޑިއާގެ 88 ސިފައިންކަމަށް ސަރުކާރުން ބުނެފިއެވެ.
އަންގާރަ ދުވަހު އޮތް ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޒިމް އިބްރާހީމް ވިދާޅުވީ، އިންޑިއާ ސިފައިންގެ މައްސަލައަކީ ދިވެހިން ވަރަށް ކަންބޮޑުވާ މައްސަލައެއް ކަމަށާއި، ވެރިކަމާ ޙަވާލުވެވަޑައިގެންނެވި ފުރަތަމަ ދުވަހުން ފެށިގެން އެކަމާ ގުޅޭ މަސައްކަތްތައް ފެށިފައިވާކަމަށެވެ.
ނާޒިމް އިތުރަށް ވިދާޅުވީ، މިހާރު ލިބިވަޑައިގެންފައިވާ އަދަދުތަކަށް ބަލާއިރު، ރާއްޖޭގައި ތިބީ 88 ސިފައިންކަމަށެވެ. ނަމަވެސް އެންމެ ފަހުން ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ސަރުކާރުން ބުނެފައިވަނީ މިހާރު ރާއްޖޭގައި ތިބީ 89 ސިފައިންކަމަށް މައުލޫމާތު ލިބިފައިވާކަމަށެވެ.
އެ އަދަދު މިހާރު ތަފާތުވަނީ ކީއްވެތޯ ނޫސްވެރިއަކު ސުވާލު ދެންނެވުމުން ނާޒިމް ވިދާޅުވީ، މުހިއްމީ ސިފައިން ތިބި އަދަދެއް ނޫން ކަމަށާއި، މުހިއްމީ އިންޑިއާ ސިފައިން ބޭލުން ކަމަށެވެ.
މިހާރު ޑޯނިއަރ އެއަރކްރާފްޓު ވެސް ބޭނުން ނުކުރާއިރު، އިންޑިއާ ސިފައިން ރާއްޖޭގައި ތިބެގެން މިހާރު ކުރަނީ ކޮން ކަމެއްތޯ ނޫސްވެރިއަކު ކުރި ސުވާލަށް މި ނޫސްވެރިންގެ ބައްދަލުވުމުގައި ޖަވާބު ލިބިފައެއް ނުވެއެވެ.
އެ ސުވާލު ދެންނެވުމުން ނާޒިމް ވިދާޅުވީ، އެއީ ނުހަނު ހައްސާސް ބޮޑު މައުޟޫއެއް ކަމަށާއި، މި ނޫސްވެރިންގެ ބައްދަލުވުމުގައި އެ ވާހަކަ ނުދެއްކި ނަމަވެސް، ކެތްތެރިކަމާއެކު ރައްޔިތުން ސަރުކާރާއެކު ތިބުމަށް އެދޭކަމަށެވެ.
އެ އަދަދު ކަށަވަރު ނުވުމަކީ ޤައުމީ ސަލާމަތަށް ނުރައްކާވާ ކަމެއްތޯ ބަލާއިރު، އެއީ ޤައުމީ ސަލާމަތަށް ނުރައްކަލެއް ހުރި ކަމެއް ނޫންކަމަށް ސަރުކާރުން ބުނެއެވެ.
ރާއްޖޭގައި ތިބި އިންޑިއާ ސިފައިން ބޭލުމަކީ ސަރުކާރުގެ ވައުދެއް ކަމަށް ވާއިރު އެކަން ނުކުރެވި ލަސްވުމުން އާއްމުންގެ ފާޑުކިޔުން ވަނީ އަމާޒުވެފައެވެ. މުއިއްޒު އިންތިޚާބުގެ ތެރޭގައި ވިދާޅުވެފައިވަނީ އެންމެ ބޮޑު އެޖެންޑާއަކީވެސް ބޭރުގެ ސިފައިން ބޭލުން ކަމަށެވެ.
ރިޔާސީ އިންތިހާބުގެ ދެވަނަ ބުރުގައި ރައްޔިތުންގެ ބޮޑު ޕަސެންޓޭޖަކުން އިންތިހާބު ކާމިޔާބުކޮށްދީފި ނަމަ، ރާއްޖޭގައި ތިބި ބޭރުގެ ސިފައިން ބޭލުމަށް ފަސޭހަވާނެ ކަމަށާއި މިނިވަންކަން ކަށަވަރުވެގެންދާނެކަމަށް ވެސް މުއިއްޒު ވިދާޅުވެފައިވެއެވެ.
އޭގެ އިތުރުން، އެއްވެސް ޤައުމެއްގެ ސިފައިން ރާއްޖޭގައި ތިބޭ ނަމަ، އަޅުގަނޑުމެންނަށް މިނިވަންކަމާއި، އިސްތިޤުލާލު ގެއްލިދާނެކަމުގެ އިޙްސާސް ކުރެވޭކަމަށް މުއިއްޒު ކެމްޕޭނުގައި ވިދާޅުވެފައިވާއިރު، މި ސަރުކާރަށް މަހެއް ފުރިގެންދިޔައިރުވެސް އިންޑިއާ ސިފައިންގެ އަދަދުތައް ކަށަވަރު ނުވެގެން އުޅޭތީ ގިނަ ބަޔަކު ދަނީ އެކަމަށް ފާޑުކިޔަމުންނެވެ.
