ޑޮލަރު ލިމިޓް އުވާލައްވާނެ ކަމަށް މުއިއްޒު ކެމްޕޭނުގައި ވިދާޅުވިނަމަވެސް ސަރުކާރުގެ ރާގު މުޅިން ބަދަލުވެއްޖެ
ފުރަތަމަ ތިން މަހު ލިމިޓް ޑަބަލްކުރުމަށް ފަހު، ދެން އެއްކޮށް ލިމިޓް އުވާލާނީ ކަމަށް މުއިއްޒު ވިދާޅުވި
ޑރ މުޙައްމަދު މުއިއްޒު
ބޭންކް ކާޑުގައި ޑޮލަރު ލިމިޓެއް ކަނޑައަޅާފައި އޮތުމަކީ އެތައް ބަޔަކަށް ގިނަ ދަތިތަކެއް ކުރިމަތިވާކަމެއްކަމަށާއި، ވެރިކަން ލިބިވަޑައިގެންފިނަމަ ލިމިޓް އުވާލައްވާނެކަމަށް ޑރ މުޙައްމަދު މުއިއްޒު ކެމްޕޭނުގައި ވައުދުވެވަޑައިގެންނެވި ނަމަވެސް، ސަރުކާރުގެ ރާގު މިހާރު ބަދަލުވެއްޖެއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވިދާޅުވީ، މިހާރު އޮތް ޑޮލަރު ލިމިޓްގެ ސަބަބުން ގިނަ ފަރާތްތަކަށް އޭގެ ދަތިތައް ކުރިމަތިވާކަމަށެވެ.
މިހާރު ބޭރުގައި ކިޔަވާ ކުދިންނަށް ކާޑަކުން ބޭނުން ކުރެވޭ ލިމިޓަކީ 750 އެމެރިކާ ޑޮލަރެވެ.
އޭނާ ވިދާޅުވީ، ބޭރުގައި ކިޔަވާ ކުދިންނަށް 1 ފެބްރުއަރީން ފެށިގެން 1200 އެމެރިކާ ޑޮލަރަށް އިތުރު ކުރުމަށް ނިންމަވާފައިވާކަމަށެވެ.
ކެމްޕޭނުގައި މުއިއްޒު ވަނީ ކާޑުގައި ޑޮލަރު ލިމިޓެއް ކަނޑައަޅާފައި އޮތުމަކީ އެތައް ބަޔަކަށް ގިނަ ދަތިތަކެއް ކުރިމަތިވާ ކަމެއްކަން ފާހަގަ ކުރައްވައި، ވެރިކަން ލިބިވަޑައިގެންފިނަމަ އެ ލިމިޓު އުވާލައްވާނެކަމަށް ވިދާޅުވެފައެވެ.
އެކަން ކުރައްވާނީ މަރުހަލާތަކެއްގެ ތެރެއިން ކަމަށާއި، ފުރަތަމަ ތިން މަހު ލިމިޓް ޑަބަލްކުރުމަށް ފަހު، ދެން އެއްކޮށް ލިމިޓް އުވާލާނީ ކަމަށް މުއިއްޒު ވިދާޅުވި އެވެ.
ރާއްޖެއެމްވީގެ ނޫސްވެރިޔާ ވަނީ އޭރު ވިދާޅުވި ގޮތަށް އެ މަސައްކަތް ކުރިއަށް ނުދަނީ ކީއްވެތޯ ސުވާލު ކުރައްވާފައެވެ. އެގޮތުން ފުރަތަމަ ތިން މަހު ލިމިޓް ޑަބަލްކުރައްވާނެކަމަށް މުއިއްޒު ކުރީގައި ވިދާޅުވެފައި އޮތްއިރު، ވެރިކަމުގެ ދެވަނަ މަސް ފެށިގެންދާއިރުވެސް އެ މަސައްކަތް ނުކުރައްވާތީ ރާއްޖެއެމްވީން އެ ސުވާލު ކުރުމުން ނާޒިމް ވިދާޅުވީ، ރާއްޖޭގެ އިޤްތިސާދީ ޙާލަތަށް ރިއާޔަތްކޮށް، ޑޮލަރު ލިމިޓުގެ މައްސަލައަށް ޙައްލު ހޯދުމުގެ ކަންކަން ވަކި މަރުޙަލާތަކަކަށް ބަހާލައިގެން ކުރުމަށް ސަރުކާރުން ނިންމާފައިވާކަމަށެވެ.
ކުއްލިއަކަށް ލިމިޓު އުވާލެއްވުމަކީ އިޤްތިސާދީ ގޮތުންވެސް ލޮޅުންތަކެއް އަރާފާނެކަމެއް ކަމަށް ސަރުކާރުން މިހާރު ބުނެއެވެ.
އެހެންނަމަވެސް، ވެރިކަމުގެ ފުރަތަމަ 3 މަހު ޑޮލަރު ލިމިޓު ޑަބަލް ކުރައްވާނެ ކަމަށާއި، އެއަށްފަހު އުވާލައްވާނެކަމަށް އޭރު މުއިއްޒު ވައުދުވެވަޑައިގެންނެވީ އިޤްތިސާދީ ގޮތުން ބަލަންޖެހޭ ކަންކަން ނުބަލާތޯ ނޫސްވެރިން ތަކުރާރުކޮށް ކުރި ސުވާލުތަކަށް ސަރުކާރުން ސީދާ ޖަވާބެއް ދެއްވާފައެއް ނުވެއެވެ.
