އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ކުޅުނު މެޗުން ބަލިވުމަކީ، ޗެލްސީ އަށް ޙައްޤު މިންވަރު ނޫން ކަމަށް އެ ޓީމުގެ ކޯޗު މައުރީސިއޯ ޕޮޗެޓީނޯ ބުނެފި އެވެ.

މި ސީޒަންގެ ޕްރިމިއާ ލީގުގައި އިންތިހާ އަށް ނަތީޖާތައް ދަށްވެފައިވާ ޗެލްސީން، ވުލްވްސްއާ ދެކޮޅަށް ކުޅުނު މެޗުން ބަލިވެފައި ވަނީ 2-1 އިންނެވެ. އެ މެޗަށް ފަހު ވާހަކަ ދައްކަމުން ޕޮޗެޓީނޯ ބުނީ، އެއީ ޗެލްސީ އަށް ޙައްޤު މިންވަރު ނޫން ކަމަށާއި، ޗެލްސީން ހުއްޓުމެއް ނެތި ގަދަ އަޅާ މަސައްކަތް ކުރަން ޖެހޭ ކަމަށެވެ.

ޗެލްސީގެ ނަތީޖާތައް ދަށްވުމުގެ ސަބަބުން ޕޮޗެޓީނޯ އަށް އަންނަނީ ފާޑު ކިޔުންތައް އަމާޒުވަމުންނެވެ. އަދި ކުލަބުގެ އިސްވެރިންނާއި، ސަޕޯޓަރުންގެ ޕްރެޝަރު ވެސް ވަނީ އޭނާ އަށް ބޮޑުވެފަ އެވެ. ޗެލްސީގެ ނަތީޖާތައް ދަށްވާ މައްސަލައިގެ ޙައްލަކީ ކޮބައިތޯ ސުވާލު ކުރުމުން އޭނާ ބުނީ، ޗެލްސީގައި އޮތީ ވަރަށް ޒުވާން ޓީމެއް ކަމަށާއި، އެ ޓީމުން އަންނަނީ ކަންކަން ދަސްކުރަމުން ކަމަށެވެ. އެކަން ފާހަގަކޮށް އޭނާ ބުނީ، ޕްރިމިއާ ލީގުގައި އަލަށް ކުޅޭ ކުޅުންތެރިން ވެސް އެ ޓީމުގައި ތިބި ކަމަށެވެ. އެހެންކަމުން އެ ކުޅުންތެރިންގެ ހުނަރު ކުރިއަރުވަން ޖެހޭ ކަމަށް އޭނާ ވަނީ ފާހަގަކޮށްފަ އެވެ. ޚާއްސަކޮށް އެ ކުޅުންތެރިންގެ އިތުބާރާއި، ޔަގީންކަން އިތުރު ކުރަން ޖެހޭނެ ކަމަށް އޭނާ ޤަބޫލު ކުރެ އެވެ.

މި ސީޒަންގެ ޕްރިމިއާ ލީގުގައި ޗެލްސީން ވަނީ މިހާތަނަށް 18 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ އެންމެ ހަ މެޗުންނެވެ. ހަތަރު މެޗުން އެއްވަރުވެފައިވާއިރު، އަށް މެޗުން ވަނީ ބަލިވެފަ އެވެ. ކުޅުނު 18 މެޗުން ލިބުނު 22 ޕޮއިންޓާއެކު އެ ޓީމު އޮތީ ވެސް 10 ވަނައިގަ އެވެ. ހަމަ އެ އަދަދަށް މެޗު ކުޅެގެން، ޗެލްސީ އަތުން މޮޅުވި ވުލްވްސް އަށް ވެސް ލިބެނީ 22 ޕޮއިންޓެވެ. ޗެލްސީގެ ފަހަތުން އެ ޓީމު އޮތީ 11 ވަނައިގަ އެވެ. ޗެލްސީ އަށް ކުރި ލިބެނީ ލަނޑުގެ ތަފާތުންނެވެ.