ރަތް ކަނޑުގައި ދަތުުރާ އުޅަނދުތަކަށް ޔަމަނުގެ ޙޫޘީ ޖަމާޢަތުން ދެމުންދާ ޙަމަލާތަކުގައި އީރާނުން ބައިވެރި ނުވާކަމަށް އެގައުމުން ހާމަކޮށްފިއެވެ.

ޔަހޫދީންގެ ރަށްތަކަށް ދަތުރުކުރާ ބޯޓުތަކަށް ޔަމަނުގައި ޙަރަކާތްތެރިވާ ހަތިޔާރު އެޅި ޙޫޘީ ޖަމާޢަތުން ދެމުންދާ ޙަމަލާތަކުގައި އީރާނުން ބައިވެރިވާ ކަމަށް ކުރަމުންދާ ތުޙުމަތުތައް އެ ޤައުމުން ދޮގުކޮށްފައިވާއިރު، ޙޫޘީންގެ ޙަމަލާތަކުގައި އެ ޤައުމުން ފުރިހަމައަށް ބައިވެރިވާ ކަމަށް އެމެރިކާއިން ދަނީ ތުޙުމަތު ކުރަމުންނެވެ.

އީރާނުގެ ޚާރިޖީ ވަޒީރު ވިދާޅުވީ ޙޫޘީން ޢަމަލުކުރަނީ އެ މީހުންގެ އަމިއްލަ މިނިވަން ކަމާއެކުގައި ކަމަށާއި އެ ކަމުގައި އީރާނުގެ އަތެއް ނޯންނާނެ ކަމަށެވެ. އަދި ޙޫޘީންނަށް ސިޔާސީ ގޮތުން ތާޢިދުކުރި ނަމަވެސް ހަތިޔާރު ފޯރުކޮށްނުދޭ ކަމަށް އީރާންގެ ޚާރިޖީ ވުޒާރާއިން ބުނެފައިވެއެވެ.

ވެރިރަށް ޞަންޢާ ހިމެނޭ ގޮތަށް ޔަމަނުގެ ބޮޑު ސަރަޙައްދެއްގައި ވެރިކަންކުރާ ޙޫޘީން ވަނީ ރަތް ކަނޑުގައި ދަތުރުކުރި 10 ވިޔަފާރި އުޅަނދަކަށް އަމާޒުކޮށް 100 އަށް ވުރެ ގިނަ ޑްރޯން އަދި މިސައިލް ޙަމަލާ ދީފައެވެ. ޙޫޘީން އެ ޙަމަލާތައް ދީފައި ވަނީ ޔަހޫދީ ފައުޖުތަކުން ފަލަސްޠީނުގެ ޣައްޒާގައި ހިންގަމުންދާ ޢުދުވާނީ ޙަމަލާތަކަށް ބަދަލު ހިފުމުގެ ގޮތުންނެވެ.

އެމެރިކާއިން ތުޙުމަތު ކުރާ ގޮތުން އީރާނުން އަންނަނީ ހަތިޔާރާއި އެހެނިހެން ޖާސޫސީ މަޢުލޫމާތު ޙޫޘީންނަށް ފޯރުކޮށްދެމުންނެވެ. އެ ގޮތުން ޙޫޘީން އަތުގައި ރާޑަރެއް ނެތްއިރުވެސް އެފަދަ ހަމަލާތައް އެ ޖަމާޢަތުން ދިނުމުގައި ބަރޯސާވަނީ އިރާނުން ފޯރުކޮށްދޭ ޖާސޫސީ އަދި ސިއްރު މަޢުލޫމާތަށް ކަމަށް އެމެރިކާއިން ބުނެއެވެ. ނަމަވެސް ފާއިތުވި އަހަރުތަކުގެ ތެރޭގައި އަމިއްލައަށް ޖާސޫސީ ކަންކަން ދެނެގަނެވޭނެ އިންތިޒާމު ހަމަޖައްސާފައިވާ ކަމަށް ހޫޘީން ބުނެއެވެ.

ރަތް ކަނޑުން ޔަހޫދީންގެ ރަށްތަކަށް ދަތުކުރުކުރާ އާގުބޯޓުތަކަށް ޙަމަލާތައް އަމާޒުކުރާނެ ކަމަށް ޙޫޘީން ވަނީ ބުނެފައެވެ.

ޙޫޘީންގެ ޙަމަލާތަކުން ބޯޓުތައް ރައްކާތެރި ކުރުމުގެ މަސައްކަތް ކުރާނެ ކަމަށް އެމެރިކާއިން މިދިޔަ ހަފުތާގައި ވަނީ ބުނެފައެވެ. އެ ޙަރަކާތުގައި އިތުރު އެހެން ޤައުމުތަކުންވެސް ބައިވެރިވާ ގޮތަށް ވަނީ ހަމަޖެހިފައެވެ.

އެމެރިކާއިން ޙޫޘީންގެ ޙަމަލާތައް ހުއްޓުވުމަށް ޔަމަނަށް ޙަމަލާދީފި ނަމަ ރައްދުގައި އެމެރިކާގެ މަނަވަރުތަކަށް ޙަމަލާދޭނެ ކަމަށް އެ ޖަމާޢަތުން ވަނީ ބުނެފައެވެ.

ހޫޘީންނަކީ އެ ޖަމާޢަތް ފެށުނީއްސުރެވެސް ފަލަސްތީނަށް ތާއީދު ކޮށް އިސްރާއީލާށް ދެކޮޅަށް ފާޅުގައި ހަރަކާތްތެރިވަމުން އަންނަ ހަތިޔާރު އެޅި ޖަމާޢަތެކެވެ.