އިކޮނޮމިކް މިނިސްޓްރީގެ ކުރީގެ އޮފީހުގެ ދިދަ އަދިވެސް ބައިދަނޑީގައި
23 ޑިސެމްބަރު 2023 | ހޮނިހިރު 07:29އެ އިމާރާތުގެ ދިދަ އަދިވެސް ހުރީ ބައިދަނޑިއަށް ތިރިކޮށްފައި
އިކޮނޮމިކް މިނިސްޓްރީގެ ބައެއް ޚިދުމަތްތައް ދިނުމަށް ކުރިން ބޭނުންކުރި އިމާރަތުގައި ހުރި ދިދަ
އިކޮނޮމިކް މިނިސްޓްރީގެ ޚިދުމަތްތައް މީގެ ކުރިން ދެމުން ގެންދިޔަ އޮފީހުގެ ދިދަ އަދިވެސް ހުރީ ބައިދަނޑިއަށް ތިރިކޮށްފައެވެ.
މިނިސްޓްރީގެ ޚިދުމަތްތައް ކުރިން ދެމުން ގެންދިޔައީ ވެލާނާ ގޭގައާއި، ބޮޑުތަކުރުފާނު މަގުގައި ކޯސްޓްގާޑް ބިލްޑިންގާ އިންވެގެން ހުންނަ އިމާރާތެއްގައެވެ.
އެހެންނަމަވެސް، ވެރިކަން ބަދަލުވުމަށްފަހު، ކޯސްޓްގާޑް ބިލްޑިންގާ އިންވެގެން ހުންނަ އިމާރަތް ވަނީ ހޯމް މިނިސްޓްރީގެ ދަށަށް ބަދަލުކޮށްފައެވެ. އެކަން އިކޮނޮމިކް މިނިސްޓްރީގެ އޮފިޝަލަކު ރާއްޖެއެމްވީއަށް ވިދާޅުވިއެވެ.
އެ އިމާރާތުގެ ދިދަ އަދިވެސް ހުރީ ބައިދަނޑިއަށް ތިރިކޮށްފައެވެ. އެގޮތުން ހޮނިހިރު ދުވަހުގެ ހެނދުނު 11:30ގައި ރާއްޖެއެމްވީން ގޮސް ބެލިއިރުވެސް އެ އިމާރާތުގައި ހުރި ދިދަ ހުރީ ބައިދަނޑިއަށް ތިރިކޮށްފައެވެ.
ކުވައިތުގެ އަމީރު ޝައިޚް ނަވާފް އަލްއަޙްމަދު އަލްޖާބިރު އައްޞަބާޙް އަވަހާރަވުމުގެ ހިތާމައިގައި، ދިވެހި ގައުމީ ދިދަ ތިން ދުވަހަށް ބައިދަނޑިއަށް ތިރިކުރެއްވުމަށް ރައީސް ޑރ. މުޙައްމަދު މުޢިއްޒު މީގެ ކުރިން ނިންމެވިއެވެ. އެއީ 17 ޑިސެމްބަރުވީ އާދިއްތަ ދުވަހުން ފެށިގެން ތިން ދުވަހުގެ ނިޔަލަށެވެ. އެގޮތުން ބަލާއިރު، 20 ޑިސެމްބަރަށް 3 ދުވަސް ވަނީ ހަމަވެފައެވެ.
ބެލެވޭ ގޮތުގައި އޭރު ބައިދަނޑިއަށް ދިދަ ތިރި ކުރުމަށްފަހު، އަދިވެސް ދިދަ އެގޮތަށް ބެހެއްޓިފައި ހުރީއެވެ. ނަމަވެސް އެކަމާ ގުޅޭގޮތުން މަޢުލޫމާތު ހޯދާލުމަށް ރާއްޖެއެމްވީން ގުޅާލުމުން އެ މިނިސްޓްރީން ޖަވާބު ދީފައެއް ނުވެއެވެ.
