ސަރުކާރާ އިދިކޮޅު ސައިޓްތައް ބްލޮކްކުރުން - ހޫނުފެނަށް ވެއްޓުމުން އިސްތަރުޖަމާނު ނުކުންނަވާ އިތުރުފުޅު ހައްދަވައިފި
ސައިޓްތައް ބްލޮކްކުރުމުން އެމްޖޭއިން ކަންބޮޑުވުން ފާޅުކުރި
އިސް ތަރުޖަމާން ޝަހީބް
ސަރުކާރަށް ފާޑުކިޔާ ބައެއް މީޑިއާތައް ބްލޮކް ކުރަން މި ސަރުކާރުން ފެށީ އެއްވެސް އިންޒާރެއް ދިނުމަކާއި ނުލައެވެ. މިހާރު ދިވެހިންގެ ތެރޭގައި ބްލޮގް ލިޔުމާއި، ކޮލަމް ލިޔުމަކީ ރަސްމީ ނޫހެއްގައި އެކަނި ކުރާ ކަމެއް ނޫނެވެ. އަމިއްލަ ލިޔުންތައް ލިޔެ ޝާއިއުކުރާ މީހުންނާއި އަމިއްލަ ފޭސްބުކް އާއި ޓްވިޓާގައި ލިޔުންތައް ހިއްޞާ ކުރާ މީހުންވެސް މަދެއް ނޫނެވެ. ރަނގަޅު ވާހަކައެވެ. ގަވާއިދާއި އެއްގޮތަށް ހިންގާ ނޫސްތަކާއި ޚަބަރުފަތުރާ އެހެން ވަސީލަތްތަކުން ޚަބަރު ފަތުރަން ވާނީ ކަމުގެ ހަގީގަތް ހޯދާ ބަލައިގެންނެވެ. އެ ނޫސްތައް ޒިންމާދާރު ކުރެވޭނެ މަގުވެސް އޮންނަން ވާނެއެވެ. އެކަމަކު ސަރުކާރުން މި ކުރެއްވިކަމަކީ އެއްވެސް އިންޒާރެއް ދިނުމެއް ނެތި ރަޖިސްޓްރީކޮށްފައިވާ ނޫހެއްވެސް ހިމެނޭހެން ސަރުކާރާއި އިދިކޮޅު ޚަބަރުފަތުސާ ސައިޓްތައް ބްލޮކްކުރަން ފެށުމެވެ.
ހާމަކަން ބޮޑު ސިޔާސަތަކަށް ލޯބިކުރާ ދިވެހިންނަށް މިއީ ހަޖަމްކުރަން އެހާ ފަސޭހަކަމެއް ނޫނެވެ.
އާއްމުންގެ ފާޑުކިޔުންތައް ބޮޑުވުމުން އެކަމުގެ ދިފާއުގައި އިސާހިތަކު އިސްތަރުޖަމާން މުހައްމަދު ޝަހީބު ނުކުންނަވައިފިއެވެ. ރަޖިސްޓްރީނުކޮށް ހިންގަމުން އައި ދެ ނޫހަކާއި ރަޖިސްޓްރީކޮށްފައިވާ ނޫހެއް ބްލޮކް ކުރި މައްސަލައިގައި ޒިންމާންނެގެވުމުގެ ބަދަލުގައި އެ މަނިކުފާނު ދައްކަވަނީ ބަހަނާތަކެވެ. "ރަޖިސްޓްރީކޮށްފައިވާ އެއްވެސް ނޫހަކަށް ސަރުކާރަކުން ފިޔަވަޅެއް ނާޅާ ކަމަށް ބުނެ ކޮންމެ ވެބްސައިޓަކީ ނޫހެއް ނޫން ކަމަށް ފާހަގަކުރެއްވިއެވެ. މަސައްކަތްކުރައްވަނީ ތިމާމެންގެ ތަހައްމަލުކުރުމުގެ އާދަކުޑަކަން ބަހަނާތައް ދަައްކައިގެން ފޮރުވާށެވެ. އަދި އެކަމާއި ދެކޮޅަށް އެމްޖޭއިން އަޑު އުފުލުމުންވެސް ތަރުޖަމާނަށް ގޯސްވީ އެމްޖޭއޭއެވެ. އެމްޖޭއޭ އިން ބަޔާނެއް ނެރުމުގެ ކުރިން، ބަލަންވާ ވަރަށް ކަންކަން ބަލައި ދިރާސާކޮށްފައި ނެތްކަން ހިތާމައާއެކު ފާހަގަކުރައްވާކަމަށް ވިދާޅުވެ، އެމްޖޭއޭ ކުށްވެރިކުރައްވަން މަސައްކަތްކުރައްވާކަހަލައެވެ.
ސަރުކާރުގެ މިވާހަކަތަކަށް އަނެއްކާވެސް އެމްޖޭއިން ވަނީ ރައްދުދެއްވާފައެވެ.
ފުރަތަމަ.ކޮމް ބްލޮކް ނުކުރާ ކަމަށް ސަރުކާރުން ބުނާ ވާހަކައާ ގުޅޭ ގޮތުން ރައްދު ދެއްވަމުން އެމްޖޭއިން ބުނީ، ފުރަތަމަ.ކޮމް ބްލޮކް ކުރި ކަމަށް ބުނާ ވާހަކަ ސަރުކާރުން ދޮގު ކުރި ނަމަވެސް އެ ޖަމްއިއްޔާއިން ބަޔާން ނެރުމުގެ ކުރިން ވާނީ އެ ޖަމްއިއްޔާ އެފްލިއޭޓްވެފައިވާ ބޭރުގެ ސައިބާ ސެކިއުރިޓީ އެކްސްޕާޓުންގެ އެހީތެރިކަމާ އެކު ލިބެން ހުރި ހެކި ތަކުގެ މައްޗަށް ލަފާ ހޯދާފައި ކަމަށެވެ. އެ ބޭފުޅުން އެ ޖަމްއިއްޔާއަށް މައުލޫމާތު ދެއްވީ ފުރަތަމަ.ކޮމް ބްލޮކް ކޮށްފައި ވަނީ ސީދާ ރާއްޖޭގެ ސާވިސް ޕްރޮވައިޑާ ކަމާއި ފެންނަން ހުރި ހެކިތަކަށް ބަލާއިރު އެއީ ސައިޓުގެ ވެރިފަރާތުން ކުރި ކަމެއް ކަމަށް ނުބެލެވޭ ކަމަށެވެ. އަދި ސައިޓުގެ ވެރިފަރާތުން ވެސް އެގޮތަށް ޖަމްއިއްޔާއަށް ޝަކުވާ ހުށަހަޅާފައިވާ ކަމަށް ބުނެފައިވެއެވެ.
އެމްޖޭއޭ އިން ބަޔާނެއް ނެރުމުގެ ކުރިން އެކަމާ މެދު ފުޅާދާއިރާއެއްގައި ހިންގާ ކޮމިޓީގެ މެންބަރުންގެ މެދުގައި ބަހުސްކޮށް އެ ޖަމްއިއްޔާއިން އެފްލިއޭޓްވެފައިވާ ބައިނަލްއަގުވާމީ ނޫސްވެރިންނާ ގުޅުން ހުރި ޖަމްއިއްޔާތަކާ މަޝްވަރާކޮށް ހިޔާލު އަބަދުވެސް ހޯދާކަމަށް އެމްޖޭއޭ އިން ފަހުން ނެރުނު ބަޔާނުގައި ބުނެފައިވެއެވެ. އެމްޖޭއޭ އިން ކަންކަން އަބަދުވެސް ކުރާނީ ޒިންމާދާރު ކަމާއި އެކު ނޫސްވެރިކަމުގެ ހައްގު ހިފަހައްޓައި ނެގެހެއްޓޭނޭ ގޮތެއްގެ މަތިން ކަމުގައި ފާހަގަކޮށް، ބުނެފައިވަނީ، އެ މަސްއޫލިއްޔަތު އަދާކުރުމުގައި އެ ޖަމްއިއްޔާއިން ފަހަތަށް ނުޖެހި ދެމި ތިބޭނޭ ކަމުގެ ޔަގީންކަން ހުރިހާ ނޫސްވެރިންނަށް އަރުވާ ކަމަށެވެ.
މީގެ އިތުރުން އެ މައްސަލައިގައި ނޫސްވެރިންގެ ޖަމިއްޔާގެ ގްރޫޕަކަށް ފޮނުއްވި މެސެޖެއްގައި ރައީސް އޮފީހުގެ މިނިސްޓަރު އިބްރާހީމް ހަލީލު ވަނީ އެ ޖަމިއްޔާގެ ބަޔާނަކީ އެއްވެސް ޒިންމާދާރުކަމެއް ނެތި ނެރުން ބަޔާނެއް ކަމަށް ވިދާޅުވެފައެވެ. "ކޮންމެ ކަމެއްގައި ވެސް އިސްވާނީ ގައުމު" ކަމަށް ވެސް ވިދާޅުވިއެވެ. މިހެން ވިދާޅުވެފައިވާއިރު އެ މޭރުމުން ސައިޓްތައް ބްލޮކް ކުރުމުގެ ކުރިން އެކަން ނާންގަވާ ސައިޓްތައް ބްލޮކްކުރަން ފެށީ ކޮންކަމެއް ހާސިލްކުރަން ބޭނުންވެގެންތޯ ސުވާލު އުފެދެއެވެ. މިދިޔަ ސަރުކާރަށް ވެސް ފާޑުކިޔުންތައް އިންތިހާއަށް އަމާޒުކުރެއެވެ. ޖަމިއްޔާ ޖަމާއަތްތަކުން ބަޔާންވެސް ނެރެއެވެ. އެ ބޭފުޅުންނަށް ޖެއްސުންކޮށް ބިރުދައްކާކަށް ސަރުކާރުގެ ވަޒީރުންނާއި ސަރުކާރުގެ ތަރުޖަމާން އުޅުއްވާތަނެއް ނުފެނެއެވެ.
،މީޑިއާ ކައުންސިލުގެ ގާނޫނުގެ 36 ވަނަ މާއްދާ ބުނާގޮތުން "މީޑިއާ ކަމަށް ބުނެފައި އެ ވަނީ، ޓީވީއަށާއި، ރޭޑިއޯއަށާއި، އިންޓަރެކްޓިވް ސީޑީއަށާއި، ވެބްސައިޓަށާއި، ދުވަހުނޫސްތަކަށާއި، ހަފްތާނޫސްތަކަށާއި، މަޖައްލާތަކަށާއި، ޓްރޭޑް ޕަބްލިކޭށަންތަކަށާއި، މިނޫންވެސް ނަންނަމުގައި، ދިވެހިރާއްޖޭގައި ރަޖިސްޓަރީ ކޮށްގެންނާއި، ރަޖިސްޓަރީ ނުކޮށް މަހުލޫމާތާއި، ހަބަރާއި، ހިޔާލާއި، އިށްތިހާރު، ހާމަކޮށް ފެތުރުމަށްޓަކައި ގަންނަން ލިބޭ ގޮތަށް، ނުވަތަ އަގަކާނުލައި ލިބޭ ގޮތަށް، ޗާޕުކޮށްގެންނާއި، އިންޓަނެޓާއި، އެހެނިހެން ވަސީލަތްތައް މެދުވެރިކޮށް ޝާއިއު ކުރެވޭ ޝާއިއު ކުރުންތަކެވެ. އެކަމަކު މިއީ ހައިރާންވާން ޖެހޭ ކަމެއް ނޫނެވެ. ޝަހީބަކީ ކުރިންވެސް މީޑިއާ ކައުންސިލްގައި ހުންނަވައިގެން ވެސް ނޫސްވެރިންގެ އަނގަ ބަންދުކޮށް ނޫސްވެރިން ޖޫރިމަނާކުރުމުގައި އިސްކޮށް ހުންނެވި މޭސްތިރިޔާއެވެ. އެހެންވީމަ މިބާވަތުގެ ކަންކަން ދިފާއުކުރުމަށް މި މަނިކުފާނު ނުނިކުންނަވާނެ ކަމަށް އުންމީދުވެސް ނުކުރަމެވެ.
