ރައީސް ޑރ.މުހައްމަދު މުއިއްޒުގެ ސަރުކާރުގެ ވަޒީރުންނަށް ރުހުން ނުދޭން ޕީޕީއެމް އަދި ޕީއެންސީގެ ތެރެއިންވެސް އެދެމުންދާ ކަމަށް އެމްޑީޕީގެ ޗެއަރޕަރސަންގެ ނައިބު އިބްރާހިމް ވަހީދު ވިދާޅުވެއްޖެއެވެ.
އޭނާ ކުރެއްވި ޓްވީޓެއްގައި ވިދާޅުވީ ޕީޕީއެމް އަދި ޕީއެންސީގެ އިސް ބައެއްބޭފުޅުން ވަޒީރުކަމަށް ކުރާ އުއްމީދު ފުރިހަމަ ކުރުމަށް މުއިޒު ސަރުކާރުގެ ބައެއްވަޒީރުންނަށް އެމްޑީޕީން ރުހުން ނުދިނުމަށް އެދެމުންދާ ކަމަށެވެ. ނަމަވެސް ރުހުންދޭނެ ވަޒީރުންނާ ނުދޭނެ ވަޒީރުން ނިންމާނީ އެމްޑީޕީގެ ޕީޖީ ގްރޫޕުން ކަމަށް އޭނާ ވަނީ ވިދާޅުވެފައެވެ.
ވަޒީރުންނަށް މަޖިލީހުން ރުހުން ނުދޭ ނަމަ ޕާޓީގެ މީހުންގެ ފަހަތުން ދާނެ ކަމަށް ބުނެ، މި ސަރުކާރަށް ނިސްބަތްވާ އިސް މީހަކު އިންޒާރު ދީފައިވާ ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއީލް ވަނީ މީގެ ކުރިން ވިދާޅުވެފައެވެ. ދާދިފަހުން އުކުޅަހުގައި ބޭއްވި އެމްޑީޕީގެ ޤައުމީ މަޖިލީހުގެ ބައްދަލުވުމުގައި ފައްޔާޒް ވިދާޅުވީ މި ސަރުކާރުގެ އިސް މީހަކު އޭނާ އަށް ގުޅައި، ވަޒީރުންނަށް ރުހުން ނުދޭ ނަމަ އެމްޑީޕީގެ މީހުންގެ ފަހަތުން ދާނެ ކަަމަށް ބުނެފައިވާ ކަމަށެވެ. އަދި ވަޒީރުންނަށް ރުހުން ނުދޭ ކަމަށް ވާނަމަ އެމްޑީޕީގެ މީހުންގެ ފަހަތުން ދާނެ ކަަމަށް ބުނެ މަޖިލީހުގެ ބައެއް މެންބަރުންނަށް ވެސް މި ސަރުކާރުގެ އިސް މީހަކު ގުޅާފައިވާ ކަަމަށް އެމްޑީޕީން ވަނީ ބުނެފައެވެ.
މަޖިލީހުގެ މެންބަރުން ވެސް އެވާހަކަ ހިއްސާ ކުރެއްވި ކަަމަށާއި، އެގޮތަށް އެކަން ކުރި ނަމަވެސް އެކަހަލަ ކަންކަމާ މެދު ކުޑަކޮށް ވެސް ނުވިސްނުމަށް ފައްޔާޒް އެދިވަޑައިގެންނެވިއެވެ.
ވަޒީރުންނަށް ރުހުން ދިނުމާއި މެދު މެމްބަރުންގެ ޚިޔާލު ތަފާތެވެ. ބައެއް ވަޒީރުންނަށް ރުހުން ނުދޭނެ ކަމަށް މެމްބަރުން ވަނީ ވިދާޅުވެފައެވެ. ވަޒީރުންގެ ތެރޭގައި ރުހުން ދޭން އެކަށީގެން ނުވާ ފަދަ ބޭފުޅުންގެ ނަންތައް އެބަހުރި ކަމަށް މެމްބަރުން ދަނީ ފާހަގަކުރައްވަމުންނެވެ، ވަޒީރުން އައްޔަންކުރުމަށް ރުހުން ދިނުމުގެ މައްސަލަ ދިރާސާކުރުމަށް ކޮމިޓީ އަށް އަލުން ވަނީ ފޮނުއްވާފައެވެ. މި ސަރުކާރުގެ ވަޒީރުންގެ ގޮތުގައި ރައީސް ޑރ.މުހައްމަދު މުއިއްޒު ވަނީ 22 ބޭފުޅުން އައްޔަންކުރައްވާފައެވެ.
