ފުށިދިއްގަރު ފަޅު ހިއްކުން: ޢާންމުންގެ ޕްރެޝަރު ބޮޑުވެ، އާބަންކޯ އިން ނޫސްވެރިންގެ ބައްދަލުވުމެއް ބާއްވަނީ
އެ މަޝްރޫއު ހިންގުމުގައި އާންމުންގެ ކަންބޮޑުވުން އޮތީ، އެ މަސައްކަތަކީ ބަޖެޓުން ބޭރުން ކުރާ މަސައްކަތަކަށް ވެފައި، އެކަމުގެ ތަފްސީލެއް ނުދޭތީ
ފުށިދިއްގަރު ފަޅު ހިއްކުމުގެ މަސައްކަތް ފެށުން
ފުށި ދިއްގަރުފަޅު ހިއްކުމުގެ މަޝްރޫއުގައި ހުރި ސިއްރު ކަންތައްތަކުގެ ސަބަބުން އާންމުންގެ ކަންބޮޑުވުން އިތުރުވުމާއެކު، އެ މަޝްރޫއުގެ މަސައްކަތުގެ މައުލޫމާތު ދިނުމަށް އާބަންކޯ އިން ނޫސްވެރިންގެ ބައްދަލުވުމެއް ބާއްވަން ނިންމައިފި އެވެ.
ފުށި ދިއްގަރުފަޅު ހިއްކުމުގެ މަޝްރޫއުއަކީ އެންމެ ފުރަތަމަ މި އަންނަ އަހަރަށް ލަފާކޮށް ހުށަހެޅި ބަޖެޓުގައި ހިމެނި ކަމެކެވެ. އެގޮތުން އެ ފަޅު ހިއްކުމަށް 400 މިލިއަން ރުފިޔާ ބަޖެޓުގައި ހިމެނި ނަމަވެސް، ބަޖެޓު ދިރާސާ ކުރާ ކޮމެޓީން ވަނީ އެ މަޝްރޫއު ބަޖެޓުން އުނިކޮށް އެ 400 މިލިއަން ރުފިޔާގެ ތެރެއިން 200 މިލިއަން ރުފިޔާ އެހެނިހެން ކަންކަމަށް ޚަރަދު ކުރުމަށް ނިންމާފަ އެވެ.
އެގޮތުން އެ ކޮމިޓީގައި 200 މިލިއަން ރުފިޔާ ޚަރަދު ކުރުމަށް ނިންމީ ގިރާވަރު، ގުޅީފަޅު އަދި ހުޅުމާލޭގައި އިންފްރާސްޓްރަކްޗާ ގާއިމްކުރުމަށް އެ ފައިސާގެ ތެރެއިން ބައެއް ފައިސާ ހަމަޖެއްސުމާއެކު، ބައެއް ފައިސާ ރާއްޖޭގެ ތަރައްގީގެ އުމްރާނީ އެހެނިހެން ކަންކަމަށް ހަމަޖެއްސުމަށެވެ. އެ ބަޖެޓު ފާސްކުރީ ވެސް އެގޮތުގައި އެވެ.
ބަޖެޓު ފާސްކުރުމާއެކު، އާބަންކޯގެ މަސައްކަތެއްގެ ގޮތުގައި ކަމަށް ބުނެ، "ރަސް މާލެ" ހިއްކުމުގެ މަސައްކަތް މިދިޔަ ހޯމަ ދުވަހު ސަރުކާރުން ފެށި އެވެ. އެދުވަހު އެ ފަޅު ހިއްކުމުގެ މަސައްކަތް ފެށިއިރު، އެ މަސައްކަތަށް ބޭނުންވާ ބަޖެޓު ހަމަޖެއްސުނު ގޮތެއް، ލިބުނު ފައިސާގެ އަދަދެއް އަދި އެ މަސައްކަތް ކުރުމަށް ހަވާލުކުރި ފަރާތެއް ވެސް ސަރުކާރުން ހާމައެއް ނުކުރެ އެވެ. ހަމައެކަނި ސަރުކާރުން ދިން މައުލޫމާތަކީ ކުރިއަށް އޮތް އަށް މަސް ދުވަހުގެ ތެރޭގައި އެ މަސައްކަތް އެއްކޮށް ނިންމާލެވޭނެ ކަމެވެ.
އެއާއެކު އާންމުންގެ ކަންބޮޑުވުން އެކަމުގައި ބޮޑުވީ، ރާއްޖޭގައި މިހާތަނަށް ހިންގާ އެންމެ ބޮޑު ބިން ހިއްކުމުގެ މަސައްކަތުގެ ތަފްސީލެއް ސަރުކާރުން ނުދިނުމާއެކު އެވެ. އެގޮތުން ކަންކަން ހާމަ ކުރައްވާނެ ކަމަށް ބުނަމުން އައި ސަރުކާރަކުން އެފަދައިން ފޮރުވައިގެން އެކަންތައް ކުރުމަކީ ބަލައިގަނެވޭނެ ކަމެއްގެ ގޮތުގައި ނުދެކޭ ކަމަށް އާންމުން އަންނަނީ ބުނަމުންނެވެ.
ބުދަ ދުވަހު ރޭ ބެއްވީ "ކަންގަތި އެވޯޑް" ޙަފުލާގައި ރައީސް ޑރ، މުޙައްމަދު މުއިއްޒު ދެއްވި ތަޤުރީރުގައި ވެސް، ފުށިދިއްގަރު ފަޅު ހިއްކަނީ ބަޖެޓުގެ ބޭރުން ކަމަށް ވިދާޅުވި އެވެ. އެހެން ނަމަވެސް އެއީ ކޮން ގޮތަކަށް ކަމެއް، ކޮން ބައެއްގެ ފައިނޭންސިން އިން ކަމެއް ރައީސް ވިދާޅެއް ނުވެއެވެ.
މި ހުރިހާ ކަންބޮޑުވުންތަކާއެކު، އާބަންކޯ އިން ވަނީ ބުރާސްފަތި ދުވަހުގެ ހަވީރު ފުށިދިއްގަރު ފަޅު ހިއްކުމާ ގުޅޭ މައުލޫމާތު ދިނުމަށް ނޫސްވެރިންގެ ބައްދަލުވުމެއް ބާއްވަން ނިންމާފަ އެވެ.
