އަލް އިއްތިހާދުގެ މައްޗަށް ކުރި ހޯދައި، އަލް އަހްލީ ސެމީ ފައިނަލަށް
ސެމީ ފައިނަލްގައި އަލް އަހްލީ ނިކުންނާނީ ބްރެޒިލްގެ ފްލުމިނެންސޭއާ ދެކޮޅަށް
މެޗުގައި ލަނޑު ޖެހުމަށް ފަހު އަލް އަހްލީގެ ކުޅުންތެރިން އުފާ ފާާޅު ކުރަނީ
ފީފާ ކުލަބު ވޯލްޑް ކަޕްގެ ދެ ވަނަ ބުރުގައި ސައުދީ އަރަބިޔާގެ އަލް އިއްތިޙާދު ގެ މައްޗަށް ކުރި ހޯދައި، މިސްރުގެ އަލް އަހްލީ ސްޕޯޓްސް ކުލަބުން މުބާރާތުގެ ސެމީ ފައިނަަލްގެ ޖާގައެއް ކަށަވަރު ކޮށްފި އެވެ.
ހުކުރު ދުވަހުގެ ރޭ ކުޅުނު ދެ ވަނަ ބުރުގެ މެޗުގައި އަލް އަހްލީން ވަނީ، 3-1 އިން އަލް އިއްތިހާދު ބަލިކޮށްފަ އެވެ. މެޗުގައި އަލް އަހްލީން ލަނޑު ޖަހައި ލީޑު ނެގީ 21 ވަނަ މިނެޓުގަ އެވެ. އެ ޓީމަށް ލިބުނު ޕެނަލްޓީއެއް ކާމިޔާބުކޮށް، ލީޑު ނަގައިދިނީ އަލީ މާލޫލް އެވެ. އޭގެ ފަހުން ދެ ވަނަ ހާފުގައި އެ ޓީމުން ވަނީ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. 59 ވަނަ މިނެޓުގައި އެ ލަނޑު ޖަހައިދިނީ ޙުސެއިން އަލް ޝަހަތު އެވެ. އޭގެ ތިން މިނެޓު ފަހުން އެމާމް އަޝޯރް ވަނީ ތިން ވަނަ ލަނޑު ޖަހައި އަލް އަހްލީ އަށް މެޗުގެ ފުރިހަމަ ކޮންޓްރޯލް ހޯދައިދީފަ އެވެ. މެޗުގައި އަލް އިއްތިހާދުގެ ހަމައެކަނި ލަނޑު، އިތުރު ވަގުތުގައި ޖެހީ ކެޕްޓަން ކަރީމް ބެންޒެމާ އެވެ.
މުބާރާތުގެ ސެމީ ފައިނަލްގައި އަލް އަހްލީ ނިކުންނާނީ ބްރެޒިލްގެ ފްލުމިނެންސޭއާ ދެކޮޅަށެވެ. ސެމީ ފައިނަލްގެ ދެ ވަނަ މެޗުގައި މެންޗެސްޓަރ ސިޓީއާ ދެކޮޅަށް ނިކުންނާނީ ޖަޕާންގެ އުރާވާ ރެޑްސް އެވެ.
