މެޗު ނިމެން ދެމިނިޓަށް ވެފައިވަނިކޮށް, ޕެޑްރޯ ޖެހި ހަމައެކަނި ލަނޑުން މޮޅުވެ, ޔޫރޮޕާ ލީގުގެ ގަދަ 16 އިން ބްރައިޓަން ޖާގަ ހޯދައިފިއެވެ.

ބްރައިޓަން ގަދަ ސޯޅަ ޓީމްގެ ތެރެއިން ޖާގަ ޔަޤީންކުރީ 88 ވަނަ މިނިޓްގައި މާސޭ ކޮޅަށް ޕެޑްރޯ ޖެހި ލަނޑުން މޮޅުވެގެންނެވެ. މެޗު ބްރައިޓަން ކާމިޔާބުކުރީ 1-0 ނެވެ. މެޗަށް ނުކުތްއިރު 11 ޕޮއިންޓާއެކު ގްރޫޕްގެ އެއްވަނާގައި އޮތް ފްރާންސްގެ މާސޭ ފަހަތަށް ޖައްސާލާ, ބްރައިޓަން ވަނީ 13 ޕޮއިންޓާއެކު ގްރޫޕްގެ އެއްވަނަ ޔަޤީންކޮށްފައެވެ. ޕެޑްރޯއަކީ މިސީޒަންގެ ޔޫރޮޕާ ލީގުގައި މިހާތަނަށް ޓޮޕް ސްކޯރަރ އެވެ. މެޗަށްގަހު އޭނާ ބުނީ 88 ވަނަ މިނިޓްގައި މާސޭ ކޮޅަށް ލަނޑު ޖެހިވަގުތަކީ ކެރިއަރުގެ އެންމެ ޚާއްޞަ ވަގުތު ކަމަށެވެ. ގްރޫޕް ސްޓޭޖްގެ ހަ މެޗުން ޕެޑްރޯ ވަނީ ހަ ލަނޑު ޖަހާފައެވެ.

ޕެޑްރޯ ބުނީ ޔޫރޮޕާ ލީގުގެ ލަނޑު ލިސްޓްގެ ކުރީގައި ހުރެވުމުން ވަރަށް ބޮޑު އުފަލެއް އިހުސާސް ވާކަމަށެވެ. އައި ގްރޫޕްގެ އެއްވަނާގައި ބްރައިޓަން އޮވެ, ލަނޑު ލިސްޓްގެ ކުރީގައި ހުރެވުމަކީ ބޮޑު އުފަލެއްކަމަށް ޕެޑްރޯ ބުންޏެވެ. ޔޫރޮޕާ ލީގުގެ ގަދަ ސޯޅައިގެ މެޗުތައް ފަށާނީ އަންނަ އަހަރުގެ މާރޗް މަހުއެވެ. ގުރުއަތުލުން އޮންނާނީ ފެބުރުއަރީ މަހުގެ 23 ވަނަ ދުވަހުއެވެ. ގަދަ ސޯޅައިން ޖާގަ ހޯދަން މާސޭ އަށް ޖެހޭނީ ޗެމްޕިއަންސް ލީގުގެ ގްރޫޕް ސްޓޭޖުން ތިންވަނަ ހޯދި ޓީމްތަކުގެ ތެރެއިން ޓީމަކާ ދެކޮޅަށް ޕްލޭއޮފް ކުޅޭށެވެ.