ފުލުހުންގެ ވަޒީފާ އަދާކުރަމުންދަނިކޮށް މަޤާމުން ވަކި ކުރި ފުލުސް އޮފިސަރުންނަށް ވަޒީފާ ދިނުން މަޑުޖައްސާލަން ނެރުނު އަމުރު މުރާޖައާކުރަންޖެހޭ ސަބަބެއް ނެތްކަމަށް ދިވެހިރާއްޖޭގެ ހައިކޯޓުން ނިންމައިފިއެވެ.
ފުލުހުންގެ ވަޒީފާ އަދާކުރަމުން ދިޔަ ދެ އެސިސްޓެންޓް ޕޮލިސް ކޮމިޝަނަރަކު މަގާމުން ވަކިކޮށް، އިތުރު ހަތަރު އޮފިސަރަކު ވަކިކުރަން ނިންމިކަން އަންގައި، ފޮނުވާފައިވާ ނޯޓިސް ބާތިލުކަމަށް ސިވިލް ކޯޓުން ނިންމި ނިންމުން އެޓަރނީ ޖެނެރަލްގެ އޮފީހުން ދިވެހިރާއްޖޭގެ ހައިކޯޓުގައި ވަނީ އިސްތިއުނާފު ކޮށްފައެވެ.
ވަކިކުރި ޕޮލިސް އޮފިސަރުންނަށް ވަޒީފާ ދިނުމަށް ސިވިލް ކޯޓުން ނިންމި ނަމަވެސް ހައިކޯޓުން ވަނީ ސިވިލް ކޯޓުގެ ހުކުމް ތަންފީޒުކުރުން ފަސްކުރުމުގެ އަމުރެއް ނެރެފައެވެ. އެގޮތުން ހައިކޯޓުން ވަނީ ވަކިކުރި ޕޮލިސް އޮފިސަރުންނަށް ވަޒީފާ ދިނުން މަޑުޖައްސާލަން އަމުރެއް ނެރެފައެވެ.
އެ އަމުރު މުރާޖައާކޮށްދޭން އެދުމުން ހައިކޯޓުން މިވަނީ އަމުރު މުރާޖައާ ކުރަންޖެހޭ ސަބަބެއް ނެތްކަމަށް ނިންމާފައެވެ.
ފުލުހުންގެ ވަޒީފާއިން ވަކިކުރުމަށް ޕޮލިސް ބޯޑުން ނިންމާފައި އޮތުމުން، ފުލުހުންގެ ވަޒީފާއިން ވަކިކޮށްފައިވަނީ އެސިސްޓެންޓް ކޮމިޝަނަރ މުހައްމަދު ޖަމްޝީދާއި އެސިސްޓެންޓް ކޮމިޝަނަރ އަހުމަދު މުހައްމަދު (ޓޫފޯ)އެވެ.
އެ ދެމީހުންގެ ވަކީލު ވިދާޅުވީ، ޕޮލިސް ބޯޑުން ހިއްސާކޮށްފައިވާ ލިއުންތަކަށް ބަލާއިރު މި މައްސަލަ އިސްތިއުނާފުކުރަން ނިންމާފައިވަނީ ބޯޑުގެ މަޝްވަރާއެއް ނެތި ކަމަށް، އެ ބޯޑުން 25 ނޮވެމްބަރު 2023ގައި ބަންޑާރަނައިބުގެ އޮފީހަށް ފޮނުވާފައިވާ ސިޓީގައި ބަޔާންކޮށްފައި ވާކަމަށެވެ.
އަދި ސިވިލް ކޯޓުގެ އެ ނިންމުން އިސްތިއުނާފުކުރުމަށް ދިވެހި ފުލުހުންގެ ޚިދުމަތުންވެސް ބަންޑާރަނައިބުގެ އޮފީހުގައި އެދިފައިނުވާކަން ސިޓީން އެނގިގެންދާކަމަށް ވަކީލު ވިދާޅުވިއެވެ.
ވަކީލު ވަނީ ޕޮލިސް ބޯޑުން ވަކިކުރަން ނިންމި 7 މީހުންގެ ތެރެއިން މުހައްމަދު ޖަމްޝީދާއި އަހުމަދު މުހައްމަދު ފިޔަވައި ދެން ތިބި މީހުން ތިބީ ޚިދުމަތުގައިކަން ފާހަގަކުރައްވައި، އެ ދެމީހުންނަށް ފުރުސަތު ދީގެން ލިބޭނެ އިއާދަނުކުރެވޭވަރުގެ ގެއްލުމަކީ ކޮބައިތޯ ދަންނަވާފައެވެ.
އެއަށްފަހު ދައުލަތުންވެސް ވާހަކަ ދައްކާފައިވާއިރު، ދައުލަތުގެ ވަކީލު ވަނީ މި މައްސަލަ ސިވިލް ކޯޓުން ނިންމައި، ހައިކޯޓުން ހުކުމް ތަންފީޒުކުރުން ފަސްކުރުމުގެ އަމުރު ނެރުނުއިރު ހުރި ހާލަތަށް ބަދަލެއް އައިސްފައިނުވާތީ، އެ އަމުރު މުރާޖައާކޮށް، އަމުރާމެދު އަލުން ގޮތެއް ނިންމަންޖެހޭ ސަބަބެއް ނެތްކަމަށް ކަނޑައަޅުއްވައިދެއްވުމަށް އެދިފައެވެ.
ހައިކޯޓުގައި މި މައްސަލަ ބެއްލެވި ފަނޑިޔާރުންވެސް ވަނީ އަމުރު މުރާޖާ ކުރަން ޖެހޭ އެއްވެސް ސަބަބެެއް ނެތް ކަމަށް ނިންމަވާފައެވެ.
