އިންޑިއާ ސިފައިން ބޭލުމަށް ސަރުކާރަށް އެހީވުމަށް ހަނިމާދޫ ކައުންސިލުން "އިންޑިއާ އައުޓް" ބެނަރ ޖަހައިދޭން ހުށަހަޅައިފި
މި މައްސަލަ އެޖެންޑާ ކޮށްފައިވަނީ 14 ޑިސެމްބަރުވާ ބުރާސްފަތި ދުވަހުގެ 10:00ށް
ހދ ހަނިމާދޫ ކައުންސިލް
އިންޑިއާ ސިފައިން ބޭލުމަށް އައު ސަރުކާރުން ވީ ވައުދު ފުއްދައިދޭން ހަނިމާދޫ ކައުންސިލުން އިންޑިއާ އައުޓް ބެނަރ ޖަހައިދިނުމަށް ހުށަހަޅައިފިއެވެ.
ހދ.ހަނިމާދޫ ކައުންސިލްގެ 4 ވަނަ ދައުރުގެ 117 ވަނަ ޢާއްމު ބައްދަލުވުގެ އެޖެންޑާ ފާސްކޮށްފައިވާއިރު، އެޖެންޑާގައި ކައުންސިލު މެމްބަރު އަލީ އިބްރާހީމް ހުށައަޅުއްވާފައިވާ މައްސަލައެއް ހިމަނުއްވާފައިވެއެވެ.
މެމްބަރު ހުށަހެޅުއްވި މައްސަލައިގައި އެދިވަޑައިގެންފައިވަނީ ރައްޔިތުންގެ ނިންމުމާ އެއްގޮތަށް މި ސަރުކާރަށް އެއްބާރުލުންދީ ވައުދުފުއްދުމަށް އެހީތެރިވެދިނުމުގެ ގޮތުން ހަނިމާދޫގައި ތިބި އިންޑިއާ ސިފައިން ބޭލުމަށް، "އިންޑިއާ އައުޓް" ލިޔެ، ހަނިމާދޫގެ ހުރިހާ މަގެއްގައި ބެނާ ދެމުމާއިމެދު މަޝްވަރާކޮށް ގޮތެއް ނިންމުމަށެވެ.
މި މައްސަލަ އެޖެންޑާ ކޮށްފައިވަނީ 14 ޑިސެމްބަރުވާ ބުރާސްފަތި ދުވަހުގެ 10:00 އަށެވެ.
އެކަމާ ގުޅޭގޮތުން އިތުރު ތަފްސީލު ހޯދުމަށް ރާއްޖެއެމްވީން ގުޅުމުން އަލީ އިބްރާހިމް ވިދާޅުވީ، މިހާރުގެ ރައީސް ޑރ މުޙައްމަދު މުއިއްޒު ވެރިކަމަށް ވަޑައިގަތީ ހަނިމާދޫގައި އިންޑިއާ ސިފައިން ތިބި ވާހަކަ ފަތުރުއްވައިގެންކަމަށެވެ. މިއީ ހަނިމާދޫގެ ރައްޔިތުންގެވެސް ކަންބޮޑުވުމެއްކަން ފާހަގަ ކުރައްވައި އޭނާ ވިދާޅުވީ، މިހާރު އެ ވާހަކަ ނުދައްކަނީ ކީއްވެތޯ ރައްޔިތުންވެސް ސުވާލު އުފައްދަމުންދާކަމަށެވެ.
ހަނިމާދޫގައި ތިބި އިންޑިއާ ސިފައިން ބޭލުމަށް، ސަރުކާރަށް އެހީތެރިވެދިނުމަށް ހަނިމާދޫ ކައުންސިލުން އެއްބާރުލުން ދިނުމަށް ރައްޔިތުންވެސް އެދެމުންދާކަން ފާހަގަ ކުރައްވައި އޭނާ ވިދާޅުވީ، ޕީޕީއެމްގެ ރައްޔިތުންވެސް އެގޮތަށް އެދެމުންދާކަމަށެވެ.
އަދި، ހަނިމާދޫގައި ތިބި އިންޑިއާ ސިފައިންގެ އަދަދުވެސް ހާމަކޮށްދޭން ޖެހޭކަން އޭނާ ފާހަގަކުރެއްވިއެވެ. މީގެ ކުރިން އެ އަދަދުތައް ކައުންސިލަށް ސާފުވާ ކަމަށާއި، މިހާރު އައު ސަރުކާރު ވެރިކަމަށް އައިފަހުން އެ މައުލޫމާތުތައް ކައުންސިލަށް ކުރިން ލިބުނު ގޮތަށް ނުލިބޭކަމަށް ވެސް އޭނާ ވިދާޅުވިއެވެ.
