ދެވަނަ ޑިވިޝަން ފަށާނެ ދުވަހެއް އަދިވެސް ނޭނގޭ، ކްލަބްތައް މިނިސްޓަރު އަރިހަށް

އެކިފަހަރު މަތިން ފަސްވަމުން އައިސް, އަދިވެސް ފަށާނެ ވަކި ދުވަހެއް ނޭނގި އޮތް ދެވަނަ ޑިވިޝަން ފުޓްބޯޅަ މުބާރާތުގައި ވާދަކުރާ ޓީމްތަކުން, ކަންބޮޑުވުންތަކާއެކު ސްޕޯރޓްސް މިނިސްޓަރާ ބައްދަލުކޮށްފިއެވެ.

މިނިސްޓަރ ޑރ. އަބްދުﷲ ރާފިއުއާ ބައްދަލުކޮށް ކްލަބްތަކުން އެދުނީ މުބާރާތް އަވަހަށް ބޭއްވޭނެ ގޮތް ހައްދަވައިދެއްވައި، އެކަމަށް ބާރު އަޅުއްވައިދެއްވުމަށެވެ. އެގޮތުން މިމަހުގެ 20ގެ ކުރިން މުބާރާތް ބާއްވައިދޭން ބާރު އަޅުއްވައިދެއްވުމަށް ކްލަބްތަކުން އެދުނުކަމަށް މައުލޫމާތު ލިބެއެވެ.

ބައްދަލުވުގައި ބައިވެރިވި ކްލަބަކުން ބުނީ، މިމަހުގެ 20ގެ ކުރިން މުބާރާތް ބާއްވައިދޭން އެފްއޭއެމާއެކު މަސައްކަތްކޮށްދެއްވާނެ ކަމުގެ ޔަގީންކަން މިނިސްޓަރު ދެއްވި ކަމަށެވެ. މިނިސްޓަރުކަމާ ހަވާލުވެވަޑައިގަތުމާ ހަމައަށްވެސް ގައުމީ ޓީމުގެ މެޑިކަލް ކަންކަން ބަލަހައްޓަވަމުން ގެންދެވި ރާފިއުއާ ހަވާލާދީ ބައްދަލުވުމުގައި ބައިވެރިވި ކްލަބަކުން ބުނީ، އެފްއޭއެމުގައި ފައިސާގެ ދަތިކަން ހުރެގެން މުބާރާތް ނުބޭއްވޭނަމަ އެކަންވެސް ހައްލުކޮށްދެއްވުމަށް މަސައްކަތް ކޮށްދެއްވާނެކަމުގެ ޔަގީންކަން ދެއްވިކަމަށެވެ.

މުބާރާތް ފަށާނެ ދުވަހަކާ ގުޅޭގޮތުން މިއަދު ސުވާލުކުރުމުންވެސް އެފްއޭއެމުން ބުނީ ވަރަށް އަވަހަށް ބާއްވަން މަސައްކަތްކުރާކަމަށެވެ.

އެންމެ ފަހުން މުބާރާތް ފަށަން އެފްއޭއެމުން ދިން ތާރީޚަކީ މިމަހުގެ 10އެވެ. ނަމަވެސް އެ ތާރީޚު ކައިރިވެފައި ވަނިކޮށް އަނެއްކާވެސް މުބާރާތް ފަސްކުރީއެވެ. އެ ތާރީޚަށްވެސް ކްލަބްތަކުން ބިދޭސީ ކުޅުންތެރިންވެސް ގެނެސްގެން ދިޔައީ ޕްރެކްޓިސް ކުރަމުންނެވެ.

މިއަދު ކްލަބްތަކުން މިނިސްޓަރާއެކު ބޭއްވި ބައްދަލުވުމުގައި 12 ކްލަބަކުން ބައިވެރިވިކަމަށް މައުލޫމާތު ލިބެއެވެ. މުބާރާތުގައި ބައިވެރިވީ 15 ކްލަބެވެ. މުބާރާތް ފަށާނެ ތާރީޚެއް ނޭނގޭއިރު, މުބާރާތުގެ ފޯމެޓެއްވެސް އަދި ނޭނގެއެވެ.

މުބާރާތް ހިލޭ ސާބަހަށް ބާއްވައިދޭން މިހާރު ހަވާލުވެފައިވަނީ ބުރު ސްޕޯރޓްސް ކްލަބުގެ ކޯޗު، މުހައްމަދު ނިޒާމެވެ.