ނިއުކާސަލް އަތުން ޓޮޓްނަމް އަށް ބޮޑު މޮޅެއް

ނިއުކާސަލް ޔުނައިޓެޑް އަތުން ޓޮޓްނަމް ބޮޑު މޮޅެއް ހޯދައިފިއެވެ.

އިނގިރޭސި ޕްރިމިއަރ ލީގުގައި ޓޮޓްނަމް އިން ނިއުކާސަލްގެ މައްޗަށް ހޯދީ 4-1 ގެ މޮޅެކެވެ. ޓޮޓްނަމްގެ ދަނޑުގައި ކުޅުނު މެޗުގައި އެ ޓީމް ކުރި ހޯދީ 26 ވަނަ މިނެޓުގައެވެ. އެއީ އުޑޯޖީ ޖެހި ލަނޑުންނެވެ. ދެވަނަ ލަނޑު 38 ވަނަ މިނެޓުގައި ޖެހީ ރިޗާލިސަން އެވެ. ދެވަނަ ހާފްގައި ޓޮޓްނަމްގެ ތިންވަނަ ލަނޑު ވެސް ޖެހީ ބްރެޒިލްގެ ރިޗާލިސަންއެވެ. ހަތަރު ވަނަ ލަނޑު ސޮން ޖެހީ މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށެވެ. އޭނާ ލަނޑު ޖެހީ ޕެނަލްޓީ އަކުންނެވެ. މެޗުގައި ސޮން ވަނީ ދެ ލަނޑު ޖަހަން ފުރުޞަތު ތަނަވަސް ކޮށްދީފައެވެ. ޓޮޓްނަމް އިން ހަތަރު ލަނޑު ޖެހި ފަހުން, ނިއުކާސަލްގެ ހަމައެކަނި ލަނޑު މެޗުގެ އިތުރު ވަގުތުގައި ޖެހީ ޖޮއެލިންޓަންއެވެ. މިމެޗުގެ ކުރިން ކުޅުނު ފަސް މެޗުގެ ތެރެއިން ހަތަރު މެޗުން ބަލިވެ, ޓޮޓްނަމް އޮތީ ގޯސް ހާލަތެއްގައެވެ.

މިމޮޅާއެކު ޓޮޓްނަމް ފަސް ވަނާގައި އޮތީ 30 ޕޮއިންޓާ އެކުއެވެ. ހަތަރު ވަނާގައި އޮތް މެންޗެސްޓަރ ސިޓީއާ ދެމެދު އޮތީ ތިން ޕޮއިންޓްގެ ފަރަގެކެވެ. ނިއުކާސަލް ޔުނައިޓެޑް އޮތީ 26 ޕޮއިންޓާއެކު ހަތް ވަނާގައެވެ.