ހަތަރު މެޗަށްފަހު މެންޗެސްޓަރ ސިޓީ މޮޅުވެއްޖެ

އިނގިރޭސި ޕްރިމިއަރ ލީގުގައި މޮޅެއް ނުލިބި ދިޔަ ހަތަރު މެޗަށްފަހު, ޗެމްޕިއަން މެންޗެސްޓަރ ސިޓީން މޮޅެއް ހޯދައިފިއެވެ.

ހަތަރު މެޗަށްފަހު ވެސް ސިޓީ އަށް ލިބުނީ އުނދަގޫ މޮޅެކެވެ. އެއީ ލޫޓަން ޓައުންއާ ވާދަކޮށް 2-1 ން ކުރިހޯދައިގެން ހޯދި މޮޅެވެ. މެޗު ސިޓީން ކާމިޔާބުކުރީ ފަހަތުން އަރާ ދެ ލަނޑު ޖަހައިގެންނެވެ. ލޫޓަން ޓައުންއިން މެޗުގައި ލީޑް ނެގީ ފުރަތަމަ ހާފްގެ އިތުރު ވަގުތުގައި އަޑެބަޔޯ ޖެހި ލަނޑުންނެވެ. ޕެނަލްޓީ އޭރިޔާ ތެރެއިން ގެއްލުނު ބޯޅައެއް ހޯދައިގެން 62 ވަނަ މިނެޓުގައި ސިޓީ އަށް ނަތީޖާ ހަމަހަމަކޮށްދިނީ ބާނާޑޯ ސިލްވާއެވެ. އަދި އޭގެ ދެ މިނެޓުފަހުން އިނގިރޭސި މިޑްފީލްޑަރ ގްރީލިޝް ލަނޑު ޖަހާ ސިޓީއަށް ތިން ޕޮއިންޓް ހޯދައިދިނެވެ.

މެޗަށްގަހު ސިޓީގެ ކޯޗު ޕެޕް ގާޑިއޯލާ ބުނީ ހަތަރު މެޗު މޮޅެއް ނުލިބި ދިއުމުން, ސިޓީގެ ކަންތައް ނިމުނީ ކަމަށް ބައެއް މީހުން ހީކުރާ ކަމަށެވެ. އެއީ އޭނާގެ ޓީމަށް އޮތް ޗެލެންޖެއް ކަމަށް ވެސް ގާޑިއޯލާ ބުންޏެވެ. އެކަމަކު އެއީ ގޯސް ނިންމުމެއްކަން ޓީމުން ސާބިތުކޮށްދީފި ކަމަށާއި އަދި ސާބިތުކޮށްދޭނެ ކަމަށް ވެސް ގާޑިއޯލާ ބުންޏެވެ. މެޗުން މޮޅުވިޔަސް ލީގު ތާވަލްގައި ސިޓީގެ މަގާމަށް ބަދަލެއް ނާދެއެވެ. 33 ޕޮއިންޓާ އެކު ސިޓީ އޮތީ ހަތަރު ވަނާގައެވެ. އެއްވަނާގައި އޮތް ލިވަޕޫލާ ދެމެދު ހަތަރު ޕޮއިންޓްގެ ފަރަގެއް އެބައޮތެވެ. ލޫޓަން ޓައުން އަކީ ރެލިގޭޝަން ޒޯންގައި އޮތް ޓީމެކެވެ.