ކޮންމެ ކަމަކަށް ވަކި ކުލައެއްގެ ހޯދަން ޖެހޭތަ؟ މި އޮތީ ހައްލު!

ޒަމާނުއްސުރެ ކުދިންގެ މެދުގައި މަގުބޫލުކަން ހޯދާފައިވާ ކާޓޫނެއް ކަމަށްވާ ސިންޑަރެއްލާގެ މަންޒަރެއް ހަނދާނަށް ގެނެސް ބަލާށެވެ. އުނދުނު ފުއްޑަނުގައި އުޅެބޮޑުވި ސިންޑަރެއްލާގެ ޕަރީދައްތަ ކޮށްލާ އަތުގެ އިޝާރާތަކުން، ޝާހީ ކޮއިލު އާޝޯޚުކުރުވި ރަންޏަކަށް އޭނާ ބަދަލުވިގޮތުގެ މަންޒަރެވެ. އެއީ ޚިޔާލީ މަންޒަރުތަކެކެވެ. ހަގީގަތަކަށް ވެދާނެ ނަމައޭ ކުޑައިރު ހިތާހިތާ އެދެވުނު، އެހެންނަމަވެސް ހޭޖެހެން ފެށި ވަރަކަށް، ނުވާނެކަމަށް ގަބޫލު ކުރެވުނު ކަމެކެވެ. ނަމަވެސް، މިއަދު އެކަން ބަދަލުވެއްޖެއެވެ. ޕަރީދައްތައެއް ނެތެއްކަމަކު، އަތުގެ އިޝާރާތުން ރަންޏަކަށް ބަދަލުވުމުގެ ފުރުސަތު، އަދުގެ ދުނިޔޭގައި އެބަ އޮތެވެ. އާރޓިފިޝަލް އިންޓެލިޖެންސް (އޭއައި) ނުވަތަ މަސްނޫއީ ތޫނުފިލިކަމާއި ފެޝަންގެ ދުނިޔެ ބައްދަލުވީއެވެ.

މަސްނޫއީ ތޫނުފިލިކަން ބޭނުންކޮށްގެން ކުލަ ބަދަލުވާ ފޮތި އުފައްދާފައިވަނީ ހޮންކޮންގުގެ ދިރާސާ ޓީމަކުންނެވެ. މި ފޮތިގަނޑުގައި ކުޑަކުޑަ ކެމެރާއެއްވެސް ހަރުކޮށްފައި ހުރެއެވެ.

ކުޑައިރުގެ ދުވަސްވަރު އެތައް ކުދިންނެއް ދެކެމުންދިޔަ ފޮނި ހުވަފެންތައް ހަގީގަތަކަށް ވެދާނެކަމުގެ ކޮޅުމަތި އެންމެ ފުރަތަމަ ދައްކާލީ މިއަހަރުގެ ފެބުރުއަރީ މަހު އޮތް މިލާން ފެޝަން ވީކްގައެވެ. އެ ޝޯވގައި ބައިވެރިވި މޮޑެލުން ވަނީ ޕޮލިމަރިކް އޮޕްޓިކަލް ފައިބަރ އެކުލެވޭ ފޮތި ބޭނުންކޮށްގެން ތައްޔާރުކޮށްފައިވާ ހެދުމާއި ދަބަސް ފަދަ ސާމާނުތައް ދައްކާލާފައެވެ. އެ ފަހަރުގެ ޝޯވއިން ފެނިގެން ދިޔައީ ނޫ، އޮރެންޖު އަދި ފެއްސާއި ދަނބުކުލައިގެ އުފެއްދުންތަކެވެ.

މި އުފެއްދުންތަކުގައި ބޭނުންކޮށްފައިވާ ފޭރާން ތައްޔާރުކޮށްފައި ވަނީ ހޮންކޮންގުގައި މަރުކަޒުކޮށްގެން ހިންގާ، ލެބޯޓްރީ ފޮރ އާރޓިފިޝަލް އިންޓެލިޖެންސް އިން ޑިޒައިން (އެއިޑްލެބް) އިންނެވެ. އެއިޑްލެބްއަކީ އޭއައި ބެހިގެންދާ ދާއިރާތަކުގެ ތެރެއިން 'ޑީޕް ލަރނިންގް'އާއި 'ކޮމްޕިއުޓަރ ވިޜަން' ބޭނުންކުރާ ކުންފުންޏެވެ. އެ ޓެކްނޮލޮޖީއަކީ އެކި މަންޒަރުތައް ބަލައިގެން މައުލޫމާތު ލިބިގަތުމަށް ކޮމްޕިއުޓަރުތައް ތަމްރީނުކުރާ ޓެކްނޮލޮޖީއެކެވެ.

އެއިޑްލެބަކީ ހޮންގްކޮންގް ޕޮލިޓެކްނީކް (ޕޮލީޔޫ)އާއި އިނގިރޭސިވިލާތުގެ ރޯޔަލް ކޮލެޖް އޮފް އާރޓް (އާރްސީއޭ) ގުޅިގެން ހިންގާ ދިރާސާ މަޝްރޫއެކެވެ. މަގުސަދަކީ އޭއައި ޓެކްނޮލޮޖީއާއި ފަރުމާގެ ސިނާއަތް ގުޅާލުމެވެ.

ފޭރާމުގައި ހަރުކޮށްފައިވާ ކެމެރާއަކީވެސް އޭއައި ޓެކްނޮލިޖީ ބޭނުންކުރާ ކެމެރާއެކެވެ. އޭއައި އެލްގޮރިދަމްތަކުގެ އެހީގައި ތަފާތު އެކި ކުލަތަކުން ހެދުމަށް ކުލަ ގެނެސްދެއެވެ. މި ފޭރާމަކީ އަތާއި ހަށިގަނޑުގެ އިޝާރާތްތަކުގެ އިތުރުން މޯބައިލް ފޯނު ނުވަތަ ރިމޯޓަކުންވެސް ފަރުމާތައް ކޮންޓްރޯލް ކުރެވޭ ގޮތަށް އުފައްދާފައިވާ ފޭރާމެކެވެ.

ކުޑަ މިސާލަކަށް ބަލާނަމަ، އާންމު ގޮތެއްގައި ހުރިހާ ކަމެއް ރަނގަޅު ކަމަށް އަތުގެ އިޝާރާތުން ދެއްކުމަށް ހުރިހާ އިނގިއްޔެއް މުށްކަވާލުމަށްފަހު ބޮޑުވައި އިނގިލި ހިއްލާލުން، ނުވަތަ 'ބެސްޓް' ދައްކާލުމުން، ފޭރުމާގެ ކުލަ ބަދަލުވަނީ ގަދަ ނޫ ކުލައަކަށެވެ. އަތުގެ އިނގިލިތަކުން ހިތެއްގެ ބައްޓަން ދައްކާލުމުން ފިޔާތޮއްޓަށް ބަދަލުވާއިރު 'އޯކޭ' ނިޝާން ދައްކާލުމާއެކު، ފެންފިޔާޒު ފަދަ ޖަވާހިރު ފެއްސަކަށް ފޭރާމުގެ ކުލަތައް ބަދަލުކޮށްލައެވެ.

އެވަރުން އަދި ނިމުނީއެއް ނޫނެވެ. ފޯނުގައި ހުންނަ ފޮޓޯތަކުން ފެންނަ ކުލަތަކަށްވެސް އެ ހެދުމުގެ ކުލަތައް ބަދަލުކޮށްލެވޭ ފީޗަރެއް މި އީޖާދުގައި ވަނީ ހިމަނާފައެވެ. އެވެނި މިވެނި މީހަކު ލާފައި ހުރި ކަހަލަ ހެދުމެއް ލާން ބޭނުން ވެގެން، އެ ގަތް ތަނެއް ނޭނގިގެން އުޅޭކަށް ދެން ނުޖެހޭނެތާއެވެ!

މިހާތަނަށް މުޅިންވެސް މި ވާހަކަދެއްކުނީ ފެޝަންގެ ރާސްތާއަކުންނެވެ. ނަމަވެސް މި ޓެކްނޮލޮޖީއަކީ އެ އިމުން ބޭރަށްވެސް ނުކުންނަ ޓެކްނޮލޮޖީއެކެވެ. މި ޓެކްނޮލޮޖީގެ ފަހަތުގައި މަސައްކަތް ކުރި ޓީމުގެ މެންބަރެއް ކަމަށްވާ ޕްރެފެސަރ ޖީން ޓޭން ފާހަގަކުރިގޮތުގައި، މި އުފެއްދުމަކީ ރީހެބިލިޓޭޝަން މަޝްރޫއުތަކުގައިވެސް ބޭނުންކުރެވިދާނެ އުފެއްދުމެކެވެ.

މަސްނޫއީ ތޫނުފިލިކަން ލިބިފައިވާ ފޭރާން ބޭނުންކޮށްގެން، ހޮންގްކޮންގްގެ ވޮންގް ޓާއި ސިން ޑިސްޓްރިކްޓް ހެލްތު ސެންޓަރުގައި މިހާރުވެސް 3 އުފެއްދުމެއް ވަނީ ތަރައްގީކޮށްފައެވެ. ވަގުތުން ވަގުތަށް ލިބޭ ފީޑްބެކަށް ބަލައި، އެ މައުލޫމާތުތަކަށް ބިނާކުރެވޭފަދަ ގޮތަކަށެވެ.

ލޯބިކުރާ އެއްޗެއްސާއި ފެޝަންގެ ރަހައަކީ ތާއަބަދުމެ ބަދަލެއްގައި އުޅޭ ކަންކަމާއި ތަކެއްޗަށް ވާއިރު، މިފަދަ ޓެކްނޮލީއެއްގެ ސަބަބުން ފައިދާކުރާނީ ހަމައެކަނި ފެޝަންގެ ސިނާއަތަކަށް ނޫނެވެ. ވެށީގެ މޭރުމަކުން ބެލިނަމަވެސް، ފައިދާތަކުގެ ވާހަކަ ނުދައްކައި ދޫކޮށްލެވޭކަށް ނެތެވެ. ޚިޔާލު ބަދަލުވެގެން، ނޫނީ ލޯބިކުރަމުން އައި ސްޓައިލް ބަދަލުކޮށްލަން ބޭނުންވާ ހިނދެއްގައި، އަތުގައި ހުރި ހުރިހާ ހެދުމަށް އުކާލައި، އައު ހެދުންތަކެއް ގަތުމަށް އެތައް ޚަރަދެއް ކުރާ ކުރުމަށްވެސް ނިމުން ގެނުވާނެއެވެ. ކުނީގެ މައްސަލައާއި ދަރަނީގެ މައްސަލައަށްވެސް ހައްލު ލިބޭނެތާއެވެ!

އެއިޑްލެބްގެ އުންމީދަކީ، މަސްނޫއީ ތޫނުފިލިކަން ލިބިފައިވާ ފޭރާމުގެ ޓެކްނޮލޮޖީ، ވިޔަފާރި އުސޫލުން އާންމުންނާ ހިސާބަށް ފޯރާ ގޮތް ވުމެވެ. މިވަގުތު އެ ޓެކްނޮލޮޖީ ތަޖުރިބާކޮށްލަން ލިބެންހުރީ ހޮންގްކޮންގް ޝޮޕިންގް މޯލް ފަދަ ތަންތަނުގައި ހަދާފައިވާ ޚާއްސަ ޑިސްޕްލޭތަކުގައި އެކަންޏެވެ.