ވިނަރެސް ފްލެޓުތަކުގެ އިންޓްރެސްޓް ރޭޓް ކުޑަކޮށްދިން ކަމަށް ބުނެ، ސަރުކާރުން ދޮގުހަދައިފި
ވިނަރެސްގެ ފްލެޓްތަކުގެ އިންޓްރެސްޓް ރޭޓް 6 އިންސައްތައަށް ކުޑަކޮށްދިނީ ރައީސް ސާލިހުގެ ސަރުކާރުގައި
އާބަންކޯގެ މެނޭޖިންގ ޑިރެކްޓަރު، އިބްރާހީމް ފަޒުލް ރަޝީދު
ވިނަރެސް ފްލެޓުތަކުގެ އިންޓްރެސްޓް ރޭޓް ކުޑަކޮށްދިން ކަމަށް ބުނެ، ސަރުކާރުން ދޮގު ހަދައިފިއެވެ.
ވިނަރެސްގެ ފްލެޓްތަކުގެ އިންޓްރެސްޓް ރޭޓް 9 އިންސައްތައިން 6 އިންސައްތައަށް ކުޑަކޮށްދިނީ ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގައެވެ. ރިޔާސީ އިންތިޚާބުގެ ކެމްޕޭންގެ ތެރޭގައި ވިނަރެސްގެ ޑައުންޕޭމަންޓާއި ކުލީގެ އަގު ބޮޑުވުމުގެ ކަންބޮޑުވުން، ފްލެޓް ލިބުނު ފަރާތްތަކުންވަނީ ރައީސް ސާލިހާ ހިއްސާކޮށްފައެވެ. މިއާއެކު ރައީސް ސާލިހު ވަނީ ވިނަރެސް ކުލީގެ އަގަށް ހެޔޮ ބަދަލެއް ގެންނަވާނެކަމަށް ވިދާޅުވެފައެވެ. އަދި ރައީސްގެ އެ ނިންމެވުމާއެކު، އެ ބަދަލު އޭރު އާބަންކޯއިން ވަނީ ގެނެސްފައެވެ.
ނަމަވެސް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވީ، ވިނަރެސް ޑައުންޕޭމަންޓަށް ދައްކާ އަދަދު 50 އިންސައްތަ ކުޑަކުރުމަށް ވަޒީރުންގެ މަޖިލީހުގެ މަޝްވަރާގެ މަތިން ނިންމަވާފައިވާތީ، އެއާ އެގޮތަށް އަމަލުކުރުމަށް ބުދަ ދުވަހު ބޯޑުން ނިންމަވާފައި ވާކަމަށެވެ. އަދި މަހުން މަހަށް ދައްކާ އަދަދުން އާންމުގޮތެއްގައި 4,200 ރުފިޔާ އުނިކޮށްދިނުމަށް ނިންމަވާފައި ވާކަމަށެވެ.
މިކަމާ ގުޅޭގޮތުން ކުރީގެ ޕްލޭނިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ، ވިނަރެސްގެ ފްލެޓްތަކުގެ އިންޓްރެސްޓް ރޭޓް 9 އިންސައްތައިން 6 އިންސައްތައަށް ކުޑަކޮށްދިނީ 22 އޮކްޓޫބަރު 2023ގައި ކަމަށެވެ. އަދި މުޅިން މަސައްކަތްކުރަނީ ރައްޔިތުންނަށް އޮޅުވާލުމަށް ކަމަށް އަކްރަމް ވިދާޅުވިއެވެ.
ވިނަރެސް ފްލެޓްތަކުގެ އަގު އުޅެނީ 2.52 މިލިއަން ރުފިޔާއާ 2.59 މިލިއަން ރުފިޔާއާ ދެމެދުގައެވެ. މި ފްލެޓްތަކަށް ދެ ގޮތަކަށް ފައިސާ ދެއްކޭނެ އިންތިޒާމު ވަނީ ހަމަޖައްސާފައެވެ. އެއީ އެއްފަހަރާ ފައިސާ ދައްކައިގެން ފްލެޓް ގަތުން، ނުވަތަ 20-25 އަހަރަށް ބަހާލައިގެން މަހުން މަހަށް ފައިސާ ދައްކާ ނިންމާގޮތަށެވެ.
