ފެނަކައިގައި މަސައްކަތް ކުރާ މުވައްޒަފުންގެ ކުށުގެ ރެކޯޑު ސާފުކުރުމުގެ މަސައްކަތް ފަށައިފި
4 ޑިސެމްބަރު 2023 | ހޯމަ 04:27ޚިދުމަތުގެ ފެންވަރު ރަނގަޅުކޮށް، މުވައްޒަފުންގެ ރައްކާތެރިކަން ކަށަވަރު ކުރުމުގެ މަސައްކަތް ވަނީ ފަށާފައި
ފެނަކައިގެ މެނޭޖިން ޑިރެކްޓަރު މުއާޒު މުހައްމަދު ރަޝީދު
ފެނަކައިގައި މަސައްކަތް ކުރާ މުވައްޒަފުންގެ ކުށުގެ ރެކޯޑު ސާފުކުރުމުގެ މަސައްކަތް ފަށާފައިވާ ކަމަށް އެކޯޕްރޭޝަންގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވެއްޖެއެވެ.
ރާއްޖެއެމްވީއަށް މުއާޒު ވިދާޅުވީ ފެނަކައަކީ ވަރަށް ގިނަ އަދަދެއްގެ މުވައްޒަފުން މަސައްކަތް ކުރަމުންދާ ކޯޕްރޭޝަނެއް ކަމަށާއި ރައްޔިތުންނާއި ގާތުން ޚިދުމަތް ދެމުންދާ ކުންފުންޏެއް ކަމަށެވެ. ޚިދުމަތުގެ ފެންވަރު ރަނގަޅުކޮށް، މުވައްޒަފުންގެ ރައްކާތެރިކަން ކަށަވަރު ކުރުމުގެ މަސައްކަތް ފަށާފައިވާ ކަމަށް މުއާޒު ވިދާޅުވިއެވެ.
އެގޮތުން މިހާރު ފެނަކާގައި މަސައްކަތް ކުރާ ހުރިހާ މުވައްޒަފުންގެ ކުށުގެ ރިކޯޑު ފޯމް ސާފުކުރުމުގެ މަސައްކަތް ކުރަމުންދާ ކަމަށް މުއާޒު ވިދާޅުވިއެވެ.
މީގެ އިތުރުން މުއާޒު ވިދާޅުވީ ކުންފުނީގައި ހުރި މައްސަލަތައް ދެނެގަނެ، އެ މައްސަލަތައް ހައްލު ކުރުމަށް ކުރަންޖެހޭ މަސައްކަތްތައް ފަށާފައިވާ ކަމަށެވެ.
މާލެސިޓީގެ އިތުރުން އަތޮޅުތެރޭގެ ގިނަ ރަށްރަށުގައި ފެނަކާގެ މުވައްޒަފުން ދަނީ ހަރަކާތްތެރިވަމުންނެވެ.
ފެނަކައިގައި މަސައްކަތް ކުރާ މުވައްޒަފުންގެ ކުށުގެ ރެކޯޑު ސާފުކުރުމުގެ މަސައްކަތް ފަށާފައި މިވަނީ، މަރުގެ މައްސަލައެއްގައި ހައިކޯޓުގައި އިސްތިއުނާފު މަރުހަލާ ކުރިއަށް ދިޔައިރު، އެ މައްސަލާގައި ހިމެނޭ ފަރާތްތަކުން ފެނަކާގައި ވަޒީފާ އަދާކުރާކަމުގެ ލިޔުން ހުށަހަޅާފައިވާ މައްސަލައެއް ދާދިފަހުން ފެންމަތިވެފައި ވަނިކޮށެވެ.
