މަޓާޓޯއިން ދިވެހިރާއްޖޭގެ އެންމެ ބޮޑު އެއް ފަންނުވެރި މުބާރާތާއި މައުރަޒު "ފްރޭމް ބައި މަޓާޓޯ" އިޢުލާންކޮށްފި

މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓަރސް (މަޓާޓޯ) އިން، އެ ޖަމްޢިއްޔާގެ އަހަރީ އާޓް މުބާރާތާއި މައުރަޒު، "ފްރޭމް ބައި މަޓާޓޯ" ގައި ބައިވެރިވުމަށް ފުރުސަތު ހުޅުވާލައިފިއެވެ.

ހޯމަ ދުވަހު އެ ޖަމްޢިއްޔާއިން ނެރުނު ނޫސް ބަޔާނެއްގައި ބުނެފައި ވަނީ ފަތުރުވެރިކަމުގެ ދާއިރާއިން ދިވެހިރާއްޖޭގެ މުއްސަނދި ސަގާފަތް ފަންނުވެރިން ބޭނުންކޮށްގެން ދައްކާލުމަށް ޚާއްޞަކޮށްގެން ބާއްވާ މި ހަރަކާތުގައި ދިވެހި އުފެއްދުންތެރިންގެ ހުނަރު ފާހަގަކުރެވޭނެކަމަށެވެ.

މަޓާޓޯ އިން ބުނި ގޮތުގައި 2025 ވަނަ އަހަރުގެ މަޢުޟޫއަކީ "ދަ މޯލްޑިވިއަން މިސްޓިކް" އެވެ. މިއީ އާޓްގެ ޒަރިއްޔާއިން ދިވެހި ރާއްޖޭގެ ފުލޯކު ވާހަކަތައް ދިރުވައި އާލާކުރުމަށް ރާއްޖޭގައި ބާއްވާ ފުރަތަމަ މައުރަޒެވެ.

ހަތަރު އުމުރުފުރައެއްގެ ފަންނުވެރިންނަށް ބައިވެރިވެވޭނެހެން ބާއްވާ މި މުބާރާތުގައި ބައިވެރިވުމުގެ ފުރުސަތު ހުޅުވާލައިފައި ވަނީ 10 ޑިސެމްބަރު 2024 އިން 20 ޖަނަވަރީ 2025 އަށެވެ.

ރާއްޖެއާއި ރާއްޖެއިން ބޭރުގެ މާހިރުން ހިމެނޭ ޕެނަލައަކުން މި މުބާރާތުގައި ހުށަހެޅޭ ފަންނުވެރިންގެ މަސައްކަތްތައް ފަނޑިޔާރުކަން ކުރައްވާނެއެވެ.

މަޓާޓޯގެ ނޫސް ބަޔާނުގައި އިތުރަށް ބުނެފައި ވަނީ މި ހުށަހެޅުންތަކުގެ ތެރެއިން ކޮންމެ އުމުރުފުރައަކުން 10 މަސައްކަތެއް ޝޯޓްލިސްޓްކޮށް، 2025 ވަނަ އަހަރުގެ ފެބްރުއަރީ މަހުގެ ނެޝަނަލް އާޓް ގެލެރީގައި ބޭއްވުމަށް ހަމަޖެހިފައިވާ މަޓާޓޯގެ އާޓް މައުރަޒުގައި ބައިވެރިކުރާނެ ކަމަށެވެ.

މަޓާޓޯގެ އާޓް މުބާރާތާއި މައުރަޒު ބާއްވަނީ ފަތުރުވެރިކަމާ ބެހޭ ވުޒާރާ އާއި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ އިތުރުން ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާ، ދިވެހިބަހާއި ސަގާފަތާއި ތަރިކައާ ބެހޭ ވުޒާރާ، ނޭޝަނަލް ސެންޓަރ ފޮރ ދި އާޓްސް (އެންސީއޭ)، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)، މޯލްޑިވިއަން އާޓިސްޓް ކޮމިއުނިޓީ (އެމްއޭސީ)، އަދި ނޭޝަނަލް ހޮޓެލްސް އެންޑް ގެސްޓްހައުސެސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) ގެ އެއްބާރުލުމާއި އެކުގައެވެ.

މި މުބާރާތާއިބެހޭ އިތުރު މަޢުލޫމާތު އަދި މަސައްކަތްތައް ހުށަހަޅާނެގޮތުގެ މަޢުލޫމާތު ފްރޭމް ބައި މަޓާޓޯގެ ވެބްސައިޓް (www.framebymatato.com) އިން ލިބޭނެއެވެ.

މަޓާޓޯއިން ބުނެފައި ވަނީ ދިވެހިރާއްޖޭގެ ފަންނުވެރިންނަށް އެމީހުންގެ ހުނަރާއި ޤާބިލުކަން ދައްކާލުމުގެ މުހިންމު ފުރުސަތެއް މި މުބާރާތް މެދުވެރިކޮށް ލިބޭނެކަމަށެވެ.

މީގެ އިތުރުން، މި މުބާރާތުން ދިވެހިރާއްޖޭގެ ފަތުރުވެރިކަމުގެ ދާއިރާއަށް އައު ވައްޓަފާޅިއެއް ގެނެސްދޭނެ ކަމަށް އުންމީދު ކުރެވޭކަމަށް މަޓާޓޯއިން ބުނެފައިވެއެވެ.

މި މުބާރާތް ކާމިޔާބުކުރާ ފަރާތްތަކަށް ދިވެހިރާއްޖޭގެ ފަތުރުވެރިކަމުގެ ދާއިރާގައި އެމީހުންގެ މަސައްކަތްތައް ދެއްކުމުގެ ފުރުސަތުތަކެއްވެސް ހުޅުވިގެންދިޔުމުގެ އިތުރުން، އެމީހުންގެ މަސައްކަތްތައް ބައިނަލްއަޤްވާމީ މައިދާނެއްގައި ދެއްކުމުގެ ފުރުސަތު ލިބިގެންދާނެއެވެ.

މަޓާޓޯގެ އަހަރީ އާޓް މުބާރާތާއި މައުރަޒު މެދުވެރިކޮށް ދިވެހިރާއްޖޭގެ ފަތުރުވެރިކަމުގެ ދާއިރާއަށް އިތުރު ކުރިއެރުމެއް ލިބި، ދިވެހި ފަންނުވެރިންގެ ހުނަރު މުޅި ދުނިޔެއަށް ދައްކާލުމުގެ ދޮރެއް ހުޅުވިގެންދާނެއެވެ.