ޕީކް އެންޑް ޕްލޭ ޑޭކެއަރ ސެންޓަރަކީ ކުޑަކުދިން މުނިފޫހިފިލުވައި، އެކިކަހަލަ ކުޅިވަރުތައް ކުޅެވޭގޮތަށް ފަރުމާކޮށްފައިވާ ޑޭކެއަރ ސެންޓަރެކެވެ.

ތިން ގިންތިއެއްގެ އުމުރުފުރާއަކަށް މި ޑޭކެއަރއިން ޚިދުމަތްދޭއިރު، ހަ މަހުން ފެށިގެން 10 އަހަރާ ދެމެދުގެ ކުދިން އޭގެތެރޭގައި ހިމެނެއެވެ.

އަމީނީމަގާ ގުޅިފައިވާ "މެޓަލް ސައިން" ގޯޅިތެރޭގައި ހުންނަ މި ޑޭކެއަރ ސެންޓަރުގައި ކުޑަކުދިންނަށް ޚާއްސަ ކޮށްފައިވާ ނިދާ ކޮޓަރި ހުރެއެވެ. އެތަނުގައި ކުޑަކުދިންނަށް ކާންދެވޭ ގޮތަށް އިންތިޒާމުތައް ހަމަޖައްސާފައިވާއިރު، އެންމެ ތުއްތު ކުދިން ނިދުމަށް ވަކި ޚާއްސަ އޭރިއާއެއް ކަނޑައެޅިފައިވެއެވެ.

ޑޭކެއަރ ސެންޓަރުގައި މުނިފޫހިފިލުވައި، ކުޅިވަރުތައް ކުޅުމަށް ގާއިމުކޮށްފައިވާ އެކި ސްޓޯލްތަކަށް ބަލާއިރު، ކްލިނިކާއި، ޕެޓް ސްޓޯރ އަދި ސުޕަމާކެޓާއި، ގަރާޖަކާއި، ފޮތް ކިޔާ ތަނެއްވެސް ހިމެނެއެވެ.

އޭގެ އިތުރުން، މަގުމަތީގެ ގަވާއިދުތައް ދަސްކޮށްދިނުމަށްވެސް ޚާއްސަ ޓްރެކެއް ހުރެއެވެ.

މިއީ ކުދިން ބޮޑުވަމުން އަންނައިރު އެކުދިންގެ އިޖުތިމާއީ ހުނަރުތައް ތަރައްގީކޮށް، އެކުވެރިކަން ބަދަހިކުރުމަށް ރަނުގެ ފުރުސަތަކަށްވެސް ވެގެންދާނެއެވެ.

ޑޭކެއަރގެ މި ޚިދުމަތް އިތުރަށް ފުރިހަމަކޮށްދެނީ ކުދިންނަށް ކެއުމަށް ޚާއްސަކޮށްފައިވާ ކަސްޓަމައިޒް މެނޫތަކުންނެވެ.

މި ތަނުގައި ސާފުތާހިރުކަމަށްވެސް ޚާއްސަ އިސްކަމެއްދޭއިރު، ކޮންމެ ދުވަހަކުވެސް ދުވަސް ފެށޭއިރާއި ދުވަސް ނިންމާލާއިރު މުޅި ތަން އެއްކޮށް ސާފުކުރެއެވެ.

އޭގެ އިތުރުން، ކުދިންގެ ރައްކާތެރިކަން ކަށަވަރުކުރުމަށް ތަނުގެ މުވައްޒަފުން ދޭ އަހައްމިއްޔަތުކަމުގެ އިތުރުން، މުޅި ތަނުގައި ހަރުކުރެވިފައިވާ ސީސީޓީވީތައްވެސް މުހިއްމު ރޯލެއް އަދާކުރެއެވެ.

މިއީ އެކި ވަޒީފާތަކުގައި އަވަދިނެތި އުޅޭ ބެލެނިވެރިންނަށްވެސް، އިތުބާރާއެކު ޚިދުމަތް ލިިބިގަނެވޭނެ ޑޭކެއަރ ސެންޓަރެކެވެ. އެގޮތުން ކުދިން ޑޭކެއަރގައި ހޭދަކުރަންޖެހޭ ވަގުތުތަކާއި، ކުދިންގެ އުމުރަށް ބަލައި، ކަސްޓަމައިޒް ޝެޑިއުލްތައްވެސް ޕީކްއެންޑް ޕްލޭ ޑޭކެއަރ ސެންޓަރުން ހަަދައިދެއެވެ.