މަޖިލީހުގެ އިންތިޚާބަށް ކުރިމަތިލާއިރު ޝަރުތު ފުރިހަމަވޭތޯ ދުރާލާ ބެލުން މުހިންމު: ހަބީބު
1 ޑިސެމްބަރު 2023 | ހުކުރު 14:04އެ ހުކުމުން ކަނޑައެޅުނު އަދަބު މައާފްކުރެވުނުތާ 3 އަހަރު ނުވާ މީހަކަށް ވާދައެއް ނުކުރެވޭނެ
އިލެކްޝަން ކޮމިޝަންގެ ނާއިބު ރައީސް އިސްމާއީލް ހަބީބު
ރައްޔިތުންގެ މަޖިލީހުގެ އިންތިޚާބަށް ކުރިމަތިލާއިރު ޝަރުތު ފުރިހަމަވޭތޯ ދުރާލާ ބެލުން ވަރަށް މުހިންމު ކަމަށް އިލެކްޝަން ކޮމިޝަންގެ ނާއިބު ރައީސް އިސްމާއީލް ހަބީބު ވިދާޅުވެއްޖެއެވެ.
ހަބީބު ވިދާޅުވީ ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް ޕްރައިމަރީ ބާއްވާއިރު ނުވަތަ ރައްޔިތުންގެ މަޖިލީހުގެ އިންތިޚާބަށް ކުރިމަތިލާއިރު، ޝަރުތު ފުރިހަމަވޭތޯ ދުރާލާ ބޭލުން މުހިންމު ކަމަށެވެ.
އެގޮތުން މަޖިލީހަށް ކުރިމަތިލާ މީހެއްގައި ހުންނަންޖެހޭ ޝަރުތުތަކުގެ ތެރޭގައި، ދިވެހި ރައްޔިތަކަށްވުން، ބޭރުގައުމެއްގެ ރައްޔިތަކަށް ނުވެވުން، މުސްލިމަކު ކަމުގައިވުމާއި، ސުންނަތް ޖަމާއަތުގެ މީހަކުކަމުގައިވުން، އުމުރުން 18 (އަށާރަ) އަހަރު ފުރިފައިވުން، ބުއްދި ސަލާމަތުން ހުރި މީހަކު ކަމުގައިވުން މިއެވެ. އަދި ބޭރުގައުމެއްގެ ރައްޔިތަކު ދިވެހި ރައްޔިތަކަށް ވެފައިވާ ނަމަ، އެ މީހަކަށް ރައްޔިތުންގެ މަޖިލީހުގެ މެންބަރުކަމަށް ކުރިމަތިލެވޭނީ، އެ މީހަކު ދިވެހި ރައްޔިތަކަށްވީތާ 5 (ފަހެއް) އަހަރު ފުރުމަށްފަހުކަމަށާ އަދި އެ މީހަކީ ދިވެހިރާއްޖޭގައި ދިރިއުޅެމުންދާ މީހަކު ކަމުގައި ވާންވާނެ ކަމަށް ހަބީބު ވިދާޅުވިއެވެ.
މީގެ އިތުރުން ހަބީބު ވިދާޅުވީ ރައްޔިތުންގެ މަޖިލީހުގެ އިންތިޚާބުގައި ވާދަނުކުރެވޭ ސަބަބުތަކެއްވާ ކަމަށެވެ. އެއީ އަދާކުރަންޖެހޭ ސާބިތު ދަރަންޏެއް އޮތް މީހަކު ނަމަ، ހުކުމާ އެއްގޮތަށް އެ ދަރަނި އަދާކުރަމުން ނުދާ މީހަކު ކަމުގައިވުމާއި، ޖިނާއީ ކުށެއް ކުރިކަން ސާބިތުވެ 12 (ބާރަ) މަސްދުވަހަށްވުރެ ދިގުމުއްދަތެއްގެ ހުކުމެއް ތަންފީޒު ކުރަމުންދާ މީހަކު ކަމުގައިވުމާއި، ޖިނާއީ ކުށެއް ކުރިކަން ސާބިތުވެ 12 (ބާރަ) މަސްދުވަހަށްވުރެ ދިގު މުއްދަތެއްގެ ހުކުމެއް ކުރެވިފައިވާ މީހަކު ނަމަ އެ ހުކުމެއް ތަންފީޒުކޮށް ނިމުނުތާ، ނުވަތަ އެ ހުކުމުން ކަނޑައެޅުނު އަދަބު މައާފްކުރެވުނުތާ 3 (ތިނެއް) އަހަރު ނުވާ މީހަކު ކަމުގައިވުން އަދި ފަނޑިޔާރަކު ކަމުގައިވެއްޖެނަމަ އިންތިޚާބުގައި ވާދަނުކުރެވޭނެ ކަމަށެވެ.
2024 ވަނަ އަހަރު އެންމެ އަވަހަށް ބޭއްވިގެންދާނީ 20 ވަނަ ރައްޔިތުން މަޖިލީހުގެ އިންތިޚާބެވެ. މި އިންތިޚާބަށް ކެންޕޭން ކުރުމުގެ މަސައްކަތްތައް ސިޔާސީ ޕާޓީތަކުން ދަނީ ކުރަމުންނެވެ.
