މަޖިލިސް އިންތިޚާބުގެ ތާރީޚު ކަނޑައެޅުމުގެ އިޚްތިޔާރު ކޮމިޝަނަށް ދިނުމަށް އެދިއްޖެ
ރޯދައިގެ ފަހުން އިންތިޚާބު ބާއްވާނަމަ ގިނަ މަސައްކަތްތައް ކުރަންޖެހޭނީ ރޯދަމަހުގެ ތެރޭގައި
އިލެކްޝަންސް ކޮމިޝަނުގެ މެންބަރުން، މިނިވަން މުއައްސަސާތަކުގެ ކޮމިޓީގައި
މަޖިލިސް އިންތިޚާބު ބާއްވާނެ ތާރީޚެއް ކަނޑައެޅުމުގެ ކަންކަން އިލެކްޝަންސް ކޮމިޝަނަށް ނިންމޭނެ ގޮތަކަށް ހައްދަވައިދެއްވުމަށް، އެ ކޮމިޝަންގެ ރައީސް ފުއާދު ތައުފީގު އެދިވަޑައިގެންފިއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަފުޅުދައްކަވަމުން، އިލެކްޝަންސް ކޮމިޝަންގެ ރައީސް ފުއާދު ތައުފީގު އެދިވަޑައިގަތީ، މަޖިލިސް އިންތިޚާބުގެ ތާރީޚު ކަނޑައެޅުމަކީ އިލެކްޝަންސް ކޮމިޝަނުގެ ކަމެއްގެ ގޮތުގައި ކޮމިޓީން ނިންމަވައިދެއްވުމަށެވެ.
ފުއާދު ވިދާޅުވީ، މީޑިއާގައި މި މައްސަލައާ ގުޅޭގޮތުން އެއްޗެއް ވިދާޅުވަން ޖެހިވަޑައިގަތީ، ރޯދަ މަހުގެ ފަހުން މަޖިލިސް އިންތިޚާބު ބާއްވަން މިނިވަން މުއައްސަސާތަކުގެ ކޮމިޓީން ނިންމާފައިވާކަމަށް ޚަބަރުތަކުގައި އޮތުމުން ކަމަށެވެ. ފުއާދު ވިދާޅުވީ އިންތިޚާބު ފަސްކުރާނަމަ މައްސަލަތައް ދިމާވާ ކަމަށާއި، އެހެންކަމުން އަދި ދުވަހެއް ކަނޑަނާޅާ ކަމަށެވެ. ނަމަވެސް ވިސްނުންފުޅު ހުރީ އިންތިޚާބު އަވަސްކުރުމަށް ކަމަށް ފުއާދު ވިދާޅުވިއެވެ.
މަޖިލިސް އިންތިޚާބުގެ ވޯޓުލުން ރޯދަމަހަށްފަހު ބާއްވަން އީސީއަށް ހުށަހެޅުމަށް، ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީން ފާސްކޮށްފައިވަނީ 26 ނޮވެންބަރު 2023 ވީ އާދިއްތަ ދުވަހެވެ.
މީގެ އިތުރުން، އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބު ވިދާޅުވީ، އިންތިޚާބުތަކުގެ ތަޖުރިބާއާއެކު މި ކަންބޮޑުވުންތައް މަޖިލީހުގެ މިނިވަން މުއައްސަސާތަކާބެހޭ ކޮމިޓީއާ ހިއްސާކޮށްފައި ވާކަމަށެވެ. ނަމަވެސް މަޖިލީހުގެ ލަފައަށް އިހުތިރާމުކުރައްވާ ކަމަށް ހަބީބު ވިދާޅުވިއެވެ. އަދި ވިދާޅުވީ މަޖިލީހުގެ ނިންމުމާއެކު ކޮމިޝަނުން އަދި ވަކި ގޮތެއް ނިންމާފައި ނުވާކަމަށާއި، ކޮމިޝަނުން ބާއްވާ ބައްދަލުވުމަށްފަހު އިންތިޚާބު ބާއްވާނެ ތާރީޚެއް ކަނޑައަޅާނެ ކަމަށެވެ.
