ވެރިކަމަށް ވަޑައިގެން ކުރައްވަނީ ހޮޅި ކަންކަން، މިއީ ޖޯކު ސަރުކާރެއް: މެންބަރު ޙުސައިން މުޙައްމަދުދީދީ

ވެރިކަމަށް ވަޑައިގެން ކުރައްވަނީ ހޮޅި ކަންކަން ކަމަށާއި މިއީ ޖޯކު ސަރުކާރެއް ކަމަށް ރައްޔިތުންގެ މަޖިލީހުގެ ފުވައްމުލަކު މެދު ދާއިރާގެ މެންބަރު ޙުސައިން މުޙައްމަދުދީދީ ވިދާޅުވެއްޖެއެވެ.

ބުދަ ދުވަހު މަޖިލީހުގައި ވާހަކަފުޅު ދައްކަވަމުން އޭނާ ވިދާޅުވީ މިހާރުގެ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތީ ވަރަށް ގިނަ އިތުރުފުޅުތަކެއް ހައްދަވައިގެން ކަމަށެވެ. އަދި އެކަން މިހާރު ރައްޔިތުންނަށް ވެސް ހާމަވަމުންދާ ކަމަށް އޭނާ ވިދާޅުވިއެވެ. އިންޑިއާ ސިފައިންގެ އެތައް ބަޔަކު ރާއްޖޭގައި ތިބި ކަމަށް ވިދާޅުވެ މުއިއްޒު ދެއްކެވި ވާހަކަފުޅާއި ރާއްޖޭގެ ކަނޑު ވިއްކާލި ކަމަށް ވިދާޅުވެ، މި ސަރުކާރުން ވެރިކަމަށް އަންނަން ހަގީގަތާއި ހިލާފު ދޮގު ވާހަކަތައް ފަތުރާފައިވާ ކަަމަށް މެންބަރު ހުސެއިން ވިދާޅުވިއެވެ.

މީގެ އިތުރުން ހުވާ ކުރައްވާ ފުރަތަމަ ދުވަހު ކުރީގެ ރައީސް އަބްދުﷲ ޔާމީން މިނިވަން ކުރައްވާނެ ކަމަށް ވިދާޅުވެ، ރައީސް މުއިއްޒު ވެވަޑައިގެންނެވީ ދޮގު ވައުދުފުޅެއްކަން މިހާރު ހާމަވަމުންދާ ކަމަށް ވެސް މެންބަރު ހުސެއިން ވިދާޅުވިއެވެ. އަދި އުތުރު ތިލަފަޅުގައި އިންޑިއާ ސިފައިން ތިބި ވާހަކަ އާއި ވެރިކަމަށް ވަޑައިގަތުމަށް ފަހު ކުރީ ސަރުކާރުން ދީފައިވާ ގޯތިތަކާއި ފްލެޓުތައް އަތުނުލައްވާނެ ކަމަށް ވިދާޅުވެ ދެއްކެވި ވާހަކަފުޅުތަކުގައި ވެސް ހަގީގަތެއް ނެތްކަން ހާމަވަމުންދާ ކަމަށް އޭނާ ވިދާޅުވިއެވެ.

ފުވަމުއްލަކު މެދު ދާއިރާގެ މެންބަރު ޙުސައިންގެ ވާހަކަފުޅުގައި އިތުރަށް ވިދާޅުވީ، ވެރިކަމަށް 11 ދުވަސްވި އިރު ކޮންމެ ދުވަހަކު ވެސް ކޮންމެެވެސް 'ހޮޅިކަމެއް' ސަރުކާރުން ކުރާ ކަމަށެވެ. އަދި ސަރުކާރުން ކުރާ ކަމެއް ދެތިން ފަހަރު ކުރަން ޖެހޭ ކަމަށް ވެސް އޭނާ ވިދާޅުވިއެވެ. އެގޮތުން ސަރުކާރުން މީހަކަށް މަޤާމެއް ދިނަސް ދެ ދުވަސް ފަހުން އެ މަޤާމު އަތުލާ ކަމަށާއި އެކަމުގެ ސަބަބުން މި ސަރުކާރު ސިފަވަނީ ވާނުވާ ނޭނގޭ ޖޯކު ސަރުކާރެއްގެ ގޮތުގައި ކަަމަށް އޭނާ ވިދާޅުވިއެވެ. އެގޮތުން ދޮގު ބުހުތާނުގެ މައްޗަށް ވެރިކަމަށް ވަޑައިގެންނެވި ބޭފުޅަކަށް އެ ނޫން ދަތުރެއް ނުޖެހޭނެ ކަމަށް ވެސް އޭނާ ވިދާޅުވިއެވެ.