ވައުދު ވާން ވާނީ ޤައުމުގެ ޙާލަތު ރަނގަޅަށް އެނގިގެން، ސަރުކާރުން ރައްޔިތުންނަށް އޮޅުވާނުލައްވާ: މެންބަރު ހުސައިން

ވައުދު ވާން ވާނީ ޤައުމުގެ ޙާލަތު ރަނގަޅަށް އެނގިގެން ކަމަށާއި، ރައްޔިތުންނަށް އޮޅުވާލައިގެން ވައުދުތައް ވެގެން ނުވާނެކަމަށް ފުވައްމުލަކު މެދު ދާއިރާގެ މެމްބަރު ހުސައިން މުޙައްމަދު ދީދީ ވިދާޅުވެއްޖެއެވެ.

މެމްބަރު ވިދާޅުވީ، ވައުދު ވާން ވާނީ ޤައުމުގެ ޙާލަތު ރަނގަޅަށް އެނގިގެން ކަމަށާއި، ރައްޔިތުންނަށް އޮޅުވާލައިގެން ވައުދުތައް ވެގެން ނުވާނެ ކަމަށެވެ.

މިސާލަކަށް ރައީސް ވައުދުވެވަޑައިގެންނެވީ 48 ގަޑިއިރު ތެރޭގައި މަސްވެރިންނަށް ފައިސާ ދިނުމަށްކަމަށްވާނަމަ އެކަން އެގޮތަށް ކުރައްވަންވާނެކަން މެމްބަރު ފާހަގަ ކުރެއްވިއެވެ.

އޭގެ އިތުރުން، އިންޑިއާ ސިފައިންނާ ގުޅޭގޮތުން މި ސަރުކާރު ވެރިކަމަށް އައިއިރު ދެއްކި ވާހަކައަށް އަލިއަޅުވާލައްވާ މެމްބަރު އިތުރަށް ވިދާޅުވީ، އިންޑިއާ ސިފައިންގެ ޔުނިފޯމް ބޭލުމަކީ އިންޑިއާ ސިފައިން ބޭލުމެއް ނޫން ކަމަށެވެ.

އޭރުވެސް ތިބި ބަޔަކު އެ މިންވަރަށް މިއަދުވެސް ރާއްޖޭގައި އެބަތިބިކަން ފާހަގަ ކުރައްވައި މެމްބަރު ވިދާޅުވީ، އެންމެ ކުޑަމިނުން އިންޑިއާ ސިފައިންގެ އަދަދުވެސް މި ސަރުކާރަށް ސާފުކޮށް ނުދެވޭކަމަށެވެ.

އެކަމުންވެސް އެނގިގެންދަނީ ޤައުމުގެ މިނިވަންކަމާއި، އިސްތިޤުލާލު ގެއްލިގެން ދިޔަކަމަށް ބުނެ އޭރު ދެއްކި ވާހަކައާ ގުޅޭ ޙާލަތު މިއަދުވެސް އެގޮތުގައި އޮތްކަން ކަމަށް މެމްބަރު ވިދާޅުވިއެވެ.

މެމްބަރު ވިދާޅުވީ، ރައްޔިތުންނަށް އެގޮތަށް އޮޅުވާލުމަކީ ނުހަނު ކަންބޮޑުވާކަމެއް ކަމަށެވެ. އެގޮތުން މަސްވެރިންނާއި ޤައުމިއްޔަތާ ގުޅުވައި ރައްޔިތުންނަށް އޮޅުވާލައްވާފައިވާކަމަށެވެ.

އޭގެ އިތުރުން އަހަރެއްގެ ތެރޭގައި 20 އައު ރިސޯޓު ހުޅުވާނެކަމަށްވެސް މި ސަރުކާރުން ބުނެފައިވާކަން ފާހަގަ ކުރައްވައި މެމްބަރު އިތުރަށް ވިދާޅުވީ، މިއީވެސް އަނެއްކާވެސް ކަނޑައެޅިގެން ރައްޔިތުންނަށް އިތުރުފުޅު ހައްދަވަން ދެއްކެވި ވާހަކައެއްކަން އެނގިގެންދާކަމަށެވެ.

މެމްބަރު ވަނީ އޭގެ އިތުރުންވެސް އިތުރު ބައެއް ކަންކަމަށް އަލިއަޅުވާލައްވާފައެވެ.