މަސް ކިލޯއެއް 25ރ ގަތުމަކީ ދައުލަތަށް ވަރަށް ބޮޑު މާލީ ބުރައެއް ކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހްމަދު ޝިޔާމް ވިދާޅުވެއްޖެއެވެ.
ހޮނިހިރު ދުވަހުގެ ރޭ ރާއްޖޭގެ މީޑިއާއަކަށް ދެއްވި އިންޓަވިއުއެއްގައި ޝިޔާމް ވިދާޅުވީ ބޮޑު ސަބްސިޑީއެއް ދެމުން އަންނަނިކޮށް މިފްކޯއަށް މަސް ގަންނަ އަގު، ކިލޯއަކުން ގާތްގަނޑަކަށް 8ރ. ބޮޑުކުރުމަކީ ދައުލަތުން ނަގަން ޖެހުނު ވަރަށް ބޮޑު ބުރައެއް ކަމަށެވެ. މަސްވެރިންނާއި އަދި އެހެނިހެން ފަރާތްތަކާ ވާހަކަ ދައްކައިގެން މަހުގެ އަގު ބަދަލު ކުރެވޭނެ ކަމަށް ޤަބޫލުފުޅު ކުރައްވާ ކަމަށް ވެސް ވިދާޅުވިއެވެ.
ޝިޔާމް އިތުރަށް ވިދާޅުވީ މިއަދު ޕްރައިވެޓް ސެކްޓަރގައި ހަރަކާތްތެރިވާ ފަރާތްތަކަށް ވެސް 25 ރުފިޔާއަށް މަސް ގަނެވެން ނެތް ކަމަށާއި އެވަރުގެ ބެކަޕެއް ނުހުންނަ ކަމަށެވެ.
25ރ އަށް މަސް ގަތުމަކީ ބޮޑު އަގެއްކަން މަސްވެރިންނަށް އެނގޭކަން ފާހަގަކުރައްވާ ޝިޔާމް ވިދާޅުވީ މަސްވެރިންނާއެެކު އެކި މަޝްވަރާތައް ކުރެވޭ ކަމަށެވެ. މަަސް ގަންނަ އަގަށްވުރެ މަސްވެރިންނަށް މުހިންމީ ލަސްނުވެ އަވަހަށް ފައިސާ ލިބޭނެ އިންތިޒާމު ހަމަޖެހިގެންދިޔުން ކަމަށް ވެސް ވިދާޅުވިއެވެ.
ދިވެހި މަސްވެރިންނަށް ހަމައަގު ހޯއްދަވައިދެއްވުމަށް ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވެވަޑައިގެންފައިވާ ވައުދުފުޅުގެ ދަށުން، މިފްކޯއިން މަސް ގަންނަ އަގު ބޮޑުކުރީ 16 ސެޕްޓެންބަރުގައެވެ.
ބާނާ މަހަށް ހަމައަގު ނުލިބުމާއި، އައިސް ލިބުމުގައި ދަތިތައް ކުރިމަތިވުމާއި، މަސް ކިރޭނެވަރުގެ ކެޕޭސިޓީ ރާއްޖޭގައި ނެތުމަކީ ޒަމާނުއްސުރެ އޮންނަ މަސްވެރިންގެ ވަރަށް ބޮޑު ކަންބޮޑުވުމެކެވެ.
