މައިންބަފައިންގެ ލޯބި އެންމެ ބޭނުންވި ދުވަހު އިޒްރޭލުގެ ޖަލު ގޮޅިއަށް ފައްތާލި މާރާ، އަނބުރާ މަންމަގެ އަތު ތެރެއަށް!

އެއީ މީގެ 8 އަހަރު ކުރިއެވެ. ފަލަސްޠީނުގެ ބިންތަކަށް ވެރިވެގަނެގެން އުޅޭ ޔަހޫދީ އިޒްރޭލުން ފޯރިމަރަމުން ދިޔަ ބޯޑަރު ބަލަހައްޓާ ފުލުހަކަށް ތޫނު އެއްޗަކުން ޙަމަލާ ދިން ކަމުގެ ކުށުގެ ތުހުމަތުގައި ފަލަސްޠީނުގެ އަންހެން ކުއްޖަކު ހައްޔަރު ކުރިއެވެ. އެއީ ޢުމުރުން އޭރު އެންމެ 16 އަހަރުގެ މާރާ ބަކީރްއެވެ. އިޒްރޭލުން އޭނާ ހައްޔަރުކޮށް، 8 އަހަރާއި 6 މަސް ދުވަހުގެ މުއްދަތަށް ޖަލަށް ޙުކުމްކޮށް، ޔަހޫދީ ތޭރިތަކުގެ ފަހަތުގައި އޭނާ ޤައިދު ކުރިއެވެ.

ކުޑަ ކުއްޖެއްގެ ގޮތުގައި ޔަހޫދީ ޖަލު ބަންދަށް ދިޔަ މަރާ، އެ ޙާލުގައި 8 އަހަރު ދުވަސް ހޭދަ ކުރުމަށް ފަހު، މިނިވަން ކަމުގެ ނޭވާއެއް ކިރިޔާވެސް ލެވޭ ވަރުވީ ޢުމުރުން 24 އަހަރު ފުރުނު ފަހުންނެވެ. އެއީ ނިމިގެން މިދާ 2023 ވަނަ އަހަރުގެ ނޮވެމްބަރު މަހުން 24 ވީ ހުކުރު ދުވަހުގެ ރެއެވެ. ޔަހޫދީ އިޒްރޭލުން ފަލަސްޠީނުގެ ޣައްޒާގައި ހިންގަމުންދާ ޤަތުލުޢާންމު ދޮޅު މަހަށް ވުރެ ދިގުލައި ގޮސްފައި ވަނިކޮށް، ޙަމަލާ ދިނުން ވަގުތީ ގޮތުން މަޑުޖައްސާލަން އެއްބަސްވެ، އެކަން ތަންފީޒު ކުރަން ފެށި ދުވަހެވެ. ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ބެލުމުގެ ދަށުގައި ތިބި އިޒްރޭލުގެ އަސީރުން މިނިވަން ކުރުމުގެ ބަދަލެއްގެ ގޮތުގައި، އިޒްރޭލުގެ ޖަލުތަކުގައި ތިބި ފަލަސްޠީނުގެ ޤައިދީން ދޫކޮށްލުމުގެ ފުރަތަމަ މަރުހަލާ ކުރިއަށް ދިޔަ ދުވަހެވެ.

މާރާ ހިމެނުނީ މި ދެންނެވި ފަދައިން، އިޒްރޭލުން ފުރަތަމަ ބުރުގައި މިނިވަން ކުރި 39 ޤައިދީންގެ ތެރޭގައެވެ. އޭގެ ތެރޭގައި ހިމެނުނީ 24 އަންހެނަކީ، ފުރާވަރު ޢުމުރުގެ 15 ފިރިހެން ކުދިންނެވެ.

ނަސްލު ދޮވެލުމަށް ޔަހޫދީން ހިންގަން ފެށި ޤަތުލުޢާންމުގައި ހަފުސްކޮށްލާފައިވާ ޣައްޒާއަށް އާދެވުމާއެކު މާރާއަށް ކަރުނަ ހިފަހައްޓާލެވޭ ގޮތެއް ނުވިއެވެ. އޭނާގެ ލޮލުން އޮހެމުން ދިޔައީ އުފަލާއި ހިތާމައިގެ ކަރުނައެވެ. މާރާގެ މަންމަ، ސަވްސަންގެ ޙާލަކީވެސް ހަމަ އެއީއެވެ. އަންހެން ދަރިއަކު ފުރާވަރު ޢުމުރުން ޒުވާން ކަމުގެ ދައުރަށް އަޅާފައި ވަނިކޮށް ލޯ ކުރިމަތިން ގެއްލުނު ގޮތަށް، އެ ދަރިފުޅު ދެން އެ ފެނުނީ ހޭޖެހޭ، ބޮޑު މީހެއްގެ ގޮތުގައި ހުއްޓާއެވެ.  

މީޑިޔާއާ ވާހަކަދައްކަމުން މާރާ ކިޔައިދިން ގޮތުގައި، އޮކްޓޯބަރ 7 ވަނަ ދުވަހު، ޙަމާސް ޖަމާޢަތުން ދިން ޙަމަލާއާއެކު، އެކަހެރި ޖަލު ގޮޅިއަކަށް އޭނާ ބަދަލުކުރިއެވެ. އޭނާއާއެކު ޖަލުގައި ދުވަސްތައް ގުނަމުން ދިޔަ އެހެން ޤައިދީންނާ މުޅިން ވަކިކޮށްލިއެވެ. އެއްބަސްވުމުގެ ދަށުން، އޭނާ މިނިވަން ވާ ކަން މާރާއަށް އެނގުނީ އަދި އޭގެ  މާ ފަހުންނެވެ. އެކަން ވީ، މާރާއަށް ލިބުނު ކުއްލި ސިހުމަކަށެވެ.

އަމިއްލަ މިނިވަންކަމަށް މަސައްކަތް ކުރަމުންދާ ޙަމާސް ޖަމާޢަތުން، އިސްތިޢުމާރީ ޔަހޫދީންނާ ދެކޮޅަށް ތެދުވެ، އޮކްޓޯބަރ 7 ވަނަ ދުވަހު ދިން ޙަމަލާގެ ތެރެއިން 240 މީހަކު ރަޙީނު ކުރިއެވެ. އޭގެ ތެރެއިން 50 މީހަކު މިނިވަން ކުރުމަށް ޙަމާސްއިން އެއްބަސްވިއެވެ. އިޒްރޭލުން ޤައިދީންތަކެއް މިނިވަން ކުރަންވެސް އެއްބަސްވިއެވެ. މެދުވެރިއެއްގެ ގޮތުގައި މަސައްކަތް ކުރީ ޤަޠަރާއި މިޞްރެވެ. އިޒްރޭލުން އެއްބަސްވީ 150 އަންހެން ޤައިދީއަކާއި ފުރާވަރު ޢުމުރުގެ ފިރިހެން ކުދިންތަކެއް މިނިވަން ކުރުމަށެވެ.