މި ސަރުކާރުގެ ފުރަތަމަ ދުވަހު ވެސް އަނިޔާވެރިކަން ރައްޔިތުންނަށް ފެނިފައިވޭ: މެންބަރު ރޮޒައިނާ
24 ނޮވެމްބަރު 2023 | ހުކުރު 07:53ރައްޔިތުންނަށް ލިބިފައިހުރި މުދާތަކާއި، ފްލެޓްތައް ފޭރިގަތުމަށް ދަނީ މަސައްކަތް ކުރަމުން
އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވާހަކަފުޅުދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ފުރަތަމަ ދުވަހު ވެސް އަނިޔާވެރިކަން ރައްޔިތުންނަށް ފެނިފައިވާ ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ބުރާސްފަތި ދުވަހުގެ ރޭ އއ.އުކުޅަހުގައި ކުރިއަށް ގެންދިޔަ އެމްޑީޕީގެ ގައުމީ މަޖިލީހުގެ ބައްދަލުވުމުގައި މެންބަރު ރޮޒައިނާ ވިދާޅުވީ ރައީސް މުއިއްޒު ހުވާކުރެއްވިފަހުން ވިސްނާލަންޖެހޭ އެތައް ކަމެއް ހިނގާފައިވާ ކަމަށާއި، އިދިކޮޅު ޕާޓީއެއްގެ ހައިސިއްޔަތުން މިކަންކަމަށް ވަރަށް ބޮޑަށް ފާރަވެރިވާންޖެހޭ ކަމަށެވެ.
މި ސަރުކާރުގެ ފުރަތަމަ ދުވަހުން ފެށިގެން ރައްޔިތުންނަށް އަނިޔާވެރިވެފައިވާކަން ފާހަގަކުރައްވައި މެންބަރު ރޮޒައިނާ ވިދާޅުވީ ރައްޔިތުންނަށް ލިބިފައިހުރި މުދާތަކާއި ފްލެޓްތައް ފޭރިގަތުމަށް މިސަރުކާރުން މަސައްކަތް ކުރަމުންދާ ކަމަށެވެ. އަދި ވިދާޅުވީ ސިޔާސީ ވަޒީފާތައް މެނުވީ އެހެން އެއްވެސް ވަޒީފާއަކުން މުވައްޒަފުން ވަކިނުކުރާނެ ކަމަށް ވައުދުވެވަޑައިގެން ވެރިކަމަށް ވަޑައިގެންނެވި ނަމަވެސް، ދައިމީ ވަޒީފާތަކުގައި ތިބި ގިނަ އަދަދެއްގެ މުވައްޒަފުން ވެސް ވަޒީފާއިން ވަކިކޮށްފައިވާ ކަމަށެވެ. ރައްޔިތުންނަށް ލިބޭ އަނިޔާ ހުއްޓުވުމަށް ޕާޓީގެ ފަރާތުން ހަރުދަނާ މަސައްކަތްތަކެއް ކުރަންޖެހޭ ކަމަށާއި، ސަރުކާރު ޖަވާބުދާރީ ކުރުވަންޖެހޭ ކަމަށް މެންބަރު ރޮޒައިނާ ވިދާޅުވިއެވެ.
މީގެ އިތުރުން މެންބަރު ރޮޒައިނާ ވަނީ ތައުލީމީ ދާއިރާއަށް މި ސަރުކާރުން ގެންނަ ބަދަލުތައް ފާހަގަކުރައްވައި ވާހަކަފުޅު ދައްކަވާފައެވެ.
އެގޮތުން މެންބަރު ރޮޒައިނާ ވިދާޅުވީ ޖެނުއަރީ މަހު ދިރާސީ އައު ފެށުމަށް ނިންމާފައިވާ ކަމަށެވެ. މިނިންމުމާއެކު ދަރިވަރުންނަށް ގެއްލުމެއް ލިބިގެން ނުވާނެ ކަމަށާއި، ކުދިންގެ އުމުރުން އިތުރު ވަގުތުތަކެއް ބޭކާރުވެގެން ނުވާނެ ކަމަށެވެ. އަދި ވިދާޅުވީ ރައްޔިތުން އެގޮތަށް އެދޭ ނަމަ ބަދަލުކުރުމަކީ މައްސަލައެއް ނޫން ކަމަށެވެ. ނަމަވެސް މިކަންކަން ބަދަލު ކުރުމުގައި ވަކި ޕްލޭނެއް އޮންނަންޖެހޭނެ ކަމަށާއި، އެކަންކަން ރައްޔިތުންނާއި ހިއްސާކުރުމަށް މެންބަރު ރޮޒައިނާ ގޮވާލެއްވިއެވެ.
މީގެއިތުރުން އޯލަވްއާއި އޭލަވަލްގެ ޓޮޕްޓެން ފާހަގަކުރުމަށް މި ސަރުކާރުން ދެކޮޅު ހަދާތީ އެކަމަށް ނުރުހުންފާޅު ކުރައްވައި މެންބަރު ރޮޒައިނާ ވިދާޅުވީ ޓޮޕްޓެން އޮތުމުގެ ސަބަބުން ވާދަވެރިކަން އުފެދި އެކަމަށް އިތުރު ހިތްވަރަކާއެކު ކިޔަވާ ކުދިން އުޅޭ ކަމަށެވެ. އަދި ދުނިޔޭގެ ނިސްބަތުން ރާއްޖޭގެ ދަރިވަަރުން ކާމިޔާބީތައް ހޯދަމުންދާ ކަމަށް އޭނާ ވިދާޅުވިއެވެ.
މެންބަރު ރޮޒައިނާ ވިދާޅުވީ މިސަރުކާރުގައި ދަރިވަރުން އަނެއްކާ ވެސް ފަހަތަަށް ޖައްސާނެ ސިޔާސަތުތައް ބައްޓަންކުރާނެ ފުރުސަތު ނުދޭނެ ކަމަށެވެ. އަދި ރައްޔިތުން މިކަމަށް ބޮޑަށް ހޭލުންތެރިކުރާނެ ކަމަށް ވެސް ވިދާޅުވިއެވެ.
