މަންޓާގެ ފްލައިޓެއްގައި ދޫންޏެއް ޖެހި، ބޯޓަށް ގެއްލުން ވެއްޖެ

ރާއްޖޭގައި ހިންގާ މަންޓާ އެއާގެ މަތިންދާބޯޓެއް ރަންވޭގައި ޖައްސަން އުޅުމުގެ ތެރޭގައި ދޫންޏެއް ޖެހި، ބޯޓަށް ގެއްލުން ވެއްޖެ އެވެ.

ދައުރުވަމުންދާ ވީޑިޔޯތަކުން ފެންނަ ގޮތުން، މަންޓާގެ މަތިންދާ ބޯޓުގެ ކުރީކޮޅަށް ދޫންޏެއް ޖެހި، ބޯޓުގެ ކުރީކޮޅުން ތަންކޮޅެއް ވަނީ ފަޅާލާފަ އެވެ.

މިކަމާ ގުޅޭ ގޮތުން މަންޓާގެ އޮފިޝަލަކު ބުނީ، ވަކިން ޚާއްސަކޮށް ބޯޓުތައް ޖެއްސުމުގެ ތެރޭގައި ދޫނިތައް ޖެހުން ނުވަތަ "ބާޑް ސްޓްރައިކް" އަކީ އާންމު ކަމެއް ކަމަށެވެ. އަދި ހޯމަ ދުވަހު ހިނގި މި ހާދިސާގައި ބޯޓަށް ގެއްލުންވި ނަމަވެސް، އެއްވެސް ޕަސެންޖަރަކަށް ގެއްލުމެއް ނުލިބި ފްލައިޓް ޖައްސާފައިވާ ކަމަށް އޭނާ ވިދާޅުވި އެވެ.

އަދި އެ ބޯޓު މަރާމާތު ކުރުމަށްފަހު، އަލުން އޮޕަރޭޝަނަށް ނެރެފައިވާ ކަމަށް މަންޓާގެ އޮފިޝަލް ވިދާޅުވި އެވެ.

އެ ޙާދިސާ ހިނގީ ކޮން އެއާޕޯޓަކަށް ބޯޓު ޖައްސަން އުޅުމުގެ ތެރޭގައެއް ކަމެއް ކަށަވަރު ކުރެވިފައެއް ނުވެ އެވެ.