20 އަހަރު ދުވަހަށް ޚާއްސަކޮށް ޤައުމީ ތަރައްޤީގެ މާސްޓަރ ޕްލާން އެއް އެކުލަވާލާ، ޤާނޫނީ ބާރުވެރިކަން ހޯދާދޭނަން: ރައީސް
17 ނޮވެމްބަރު 2023 | ހުކުރު 13:40އެކި ދާއިރާތަކުގައި މަސައްކަތް ކުރާ ފަރާތްތަކަށް އިލްމީ ޒަމާނީ ކުރިއެރުން ގެނެސްދެއްވާނެ ކަމަށް ރައީސް ވިދާޅުވި
ރައީސުލްޖުމްހޫރިއްޔާ ޑރ.މުއިއްޒު
20 އަހަރު ދުވަހަށް ޚާއްސަކޮށް ޤައުމީ ތަރައްްޤީގެ މާސްޓަރ ޕްލާން އެއް އެކުލަވާލައްވާނެ ކަމަށް ރައީސުލްޖުމްހޫރިއްްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސްކަމުގެ ހުވާކުރެއްވުމަށް ފަހު ވާހަކަފުޅުދައްކަވަމުން ރާއްޖެ ކުރިއަރުވާނީ ސަރަހައްދުތަކަށް ތަރައްޤީ އާއި ރަށްވެހިކަމުގެ މަންފާ ލިބިގެންވާނެ ފަދައިން ބެހިގެންދާ ގޮތަށް އެކަށައެޅޭ ޒަމާނީ މަހްފޫމްގެ ތެރެއިން ކަމަށް ވެސް ރައީސް ވަނީ ވިދާޅުވެފައެވެ. އެކަމަށްޓަކާ މެދު ރާސްތާގެ އަމާޒުތަކާއި ދުރު ރާސްތާގެ އަމާޒުތައް ކަނޑައަޅުއްވާނެކަން ރައީސް ވަނީ ފާހަގަކުރައްވާފައެވެ. އިތުރަށް ރައީސް މުއިއްޒު ވިދާޅުވީ އެކި ދާއިރާތަކުން ފަންނީ މީހުންނާއި އާއްމުންގެ ޚިޔާލަށް ވެސް ފުރުސަތު ހުޅުވާލައްވާނެ ކަމަށެވެ. އެ ޚިޔާލުތަކާއި އެހީގެ އަލީގައި 20 އަހަރު ދުވަހަށް ޤައުމީ ތަރައްްޤީގެ މާސްޓަރ ޕްލާން އެއް އެކުލަވާލައްވަން ގަސްތުކުރައްވާ ކަމަށް މުއިއްޒު ވިދާޅުވިއެވެ. އަދި އެ ޕްލޭނަށް ޤާނޫނީ ބާރުވެރިކަން ދެއްވާނެ ކަމަށް ވެސް ވަނީ ވިދާޅުވެފައެވެ.
ރައީސް މުއިއްޒު ވަނީ ރާއްޖޭގެ އިގްތިޞާދީ ހާލަތު ރަނގަޅުކުރަން އަވަސް ފިޔަވަޅުތަކެއް އަޅަން ޖެހޭ ކަމަށް ފާހަގަކުރައްވާފައެވެ. އަދި ރާއްޖޭގެ އިގްތިޞާދު އޮތީ އަނދަވަޅެއްގައި ކަމަށް ވެސް ވިދާޅުވިއެވެ. އަދި ކުރިމަގުގައި އިޤްތިޞާދު ރަނގަޅުކުރުމަށް ދުރު ރާސްތާ ޕްލޭނެއް ކުރައްވާނެ ކަމަށް ވަނީ ފާހަގަކުރައްވާފައެވެ.
7 ސަރަހައްދެއްގައި އުމްރާނީ ބިނާވެށި އަރބަން ސެންޓަރތައް ޤާއިމްކުރައްވާނެ ކަމަށް ވެސް ރައީސް ވަނީ ވިދާޅުވެފައެވެ. އަދި މަސްވެރިންނާއި، ދަނޑުވެރިން އަދި އިގްތިސާދީ އެހެން ދާއިރާތަކުގައި މަސައްކަތް ކުރާ ފަރާތްތަކަށް އިލްމީ ޒަމާނީ ކުރިއެރުން ގެނެސްދެއްވާނެ ކަމަށް ވައުދުވެވަޑައިގަންނަވާފައެވެ.
ރައީސް ވިދާޅުވީ ރާއްޖެ އަށް ދެމެހެއްޓެނެވި އަދަލުވެރި ތަރައްޤީގެ ނިޒާމެއް ބޭނުންވާ ކަމަށެވެ. އަދި އާ ސަރުކާރުން ތަރައްޤީގެ ކަންކަން ކުރިއަށް ގެންދާނީ އެ ވިސްނުމުގެ ތެރެއިން ކަމަށް ރައީސް ވިދާޅުވިއެވެ. ރައީސް އިތުރަށް ވިދާޅުވީ ސަރުކާރުން ތަރައްޤީ ގެންނާނީ ސަރަހައްދީ ތަރައްޤީގެ ވިސްނުމާއި އެއްގޮތަށް ކަމަށެވެ.
