ހުވާ ކުރުމުގެ ރަސްމިއްޔާތު ބާއްވާތީ ހުކުރު ދުވަހު މެންދުރުފަހު މާލޭގައި ބޮޑެތި ވެހިކަލްތައް ދުއްވުން މަނާ
17 ނޮވެމްބަރު 2023 | ހުކުރު 00:22ހުކުރު ދުވަހުގެ މެންދުރުފަހު 14:00 އިން 18:00އަށް މިފަދަ އުޅަނދުތައް ދުއްވުން މަނާވާނެ
މާލޭގެ މަގުމަތި
ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު މަޤާމުގެ ހުވާ ކުރެއްވުމުގެ ރަސްމިއްޔާތު ހުކުރު ދުވަހު ބޭއްވުމަށް ހަމަޖެހިފައިވާތީ ހުކުރު ދުވަހުގެ މެންދުރު ފަހު މާލޭގައި ބޮޑެތި ވެހިކަލު ދުއްވުން ޓްރާންސްޕޯޓް މިނިސްޓްރީން މަނާކޮށްފިއެވެ.
އެކަމާއި ގުޅިގެން ޓްރާންސްޕޯޓް މިނިސްޓްރީން ކޮށްފައިވާ އިއުލާނެއްގައި ބުނެފައިވަނީ އެރަސްމިއްޔާތުގެ ޓްރެފިކް ސެކިއުރިޓީ ކަންތައްތައް އަމާންކަމާއި އޮމާންކަމާއި އެކު ގެންދިއުމަށް މާލޭގެ މަގުތަކުގައި ދުއްވާ ބޮޑެތި އުޅަނދުތަކުގެ ތެރެއިން ސީ 1 ކެޓަގަރީގެ 350 ކިލޯގްރާމްގެ ކުދި ޕިކަޕް ފިޔަވައި އެހެން ބަރު އުޅަނދުތައް ދުއްވުން މަނާވާނެކަމަށެވެ. އެގޮތުން ހުކުރު ދުވަހުގެ މެންދުރުފަހު 14:00 އިން 18:00އަށް މިފަދަ އުޅަނދުތައް ދުއްވުން މަނާވާނެކަމަށް މިނިސްޓްރީން ބުނެއެވެ.
ދުއްވުން މަނާ ވާނީ "ސީ2"، "ސީ0"، "ޑީ"، "އީ" އަދި "ވީ" ކެޓަގަރީގެ ވެހިކަލްތައް ކަމަށް ވެސް ޓްރާންސްޕޯޓް މިނިސްޓްރީން ބުނެއެވެ. އެ ކެޓަގަރީތަކުގެ ތެރޭގައި ހިމެނޭ ސަލާމަތީ ބާރުތަކުގެ އުޅަނދުތަކާއި ސަރުކާރުގެ އިދާރާތަކުގެ އާންމު ހިދުމަތް ދިނުމަށް ބޭނުންކުރާ އުޅަނދުފަހަރު އެ ވަގުތުތަކުގައި ދުއްވުން މަނާ ނުވާނެ ކަމަށް މިނިސްޓްރީން ބުނެއެވެ.
ދުއްވުން މަނާ ކެޓަގަރީތަކުގެ ވެހިކަލްތަކުގެ ތެރޭގައި ބޮޑެތި ވޭނާއި ކާރާއި މުދާ އުފުލުމަށް ބޭނުންކުރާ ވެހިކަލްތަކާއި ކޮންސްޓްރަކްޝަން މަސައްކަތަށް ބޭނުންކުރާ ވެހިކަލްތައް ހިމެނެއެވެ.
މިނިސްޓްރީން ބުނީ އެ އުސޫލާ ހިލާފަށް ދުއްވާ ވެހިކަލްތައް އެއްގަމު ދަތުރުފަތުރުގެ ގާނޫނުގެ ދަށުން 750 ރުފިޔާއިން އިން ޖޫރިމަނާކުރާނެ ކަމަށެވެ.
އިންތިޚާބީ ރައީސް ހުވާކުރެއްވުމުގެ ރަސްމިއްޔާތު އޮންނާނީ ހުކުރު ދުވަހުގެ ހަވީރު 4:45 ގައި ޖުމްހޫރީ މައިދާނުގައެވެ.
